រាជធានីភ្នំពេញ ៖ ក្នុង១ថ្ងៃៗ ថង់ប្លាស្ទិក ប្រមាណ១០លានថង់ត្រូវបានប្រើប្រាស់នៅក្នុងរាជធានីភ្នំពេញ ដែលបាននិងកំពុងបង្កផលប៉ះពាល់ដ៏ធ្ងន់ធ្ងរដល់សោភ័ណភាពទីក្រុង និងប៉ះពាល់ដល់សេដ្ឋកិច្ចជាតិ ។ ដើម្បីកាត់បន្ថយការប្រើប្រាស់ថង់បា្លស្ទិក រាជរដ្ឋាភិបាលបានសម្រេចថា…
រាជធានីភ្នំពេញ ៖ ក្នុង១ថ្ងៃៗ ថង់ប្លាស្ទិក ប្រមាណ១០លានថង់ត្រូវបានប្រើប្រាស់នៅក្នុងរាជធានីភ្នំពេញ ដែលបាននិងកំពុងបង្កផលប៉ះពាល់ដ៏ធ្ងន់ធ្ងរដល់សោភ័ណភាពទីក្រុង និងប៉ះពាល់ដល់សេដ្ឋកិច្ចជាតិ ។
ដើម្បីកាត់បន្ថយការប្រើប្រាស់ថង់បា្លស្ទិក រាជរដ្ឋាភិបាលបានសម្រេចថា ៖« ប្រជាពលរដ្ឋដែលទិញទំនិញនៅតាមមជ្ឈមណ្ឌលពាណិជ្ជកម្ម និងផ្សារទំនើបនានាក្នុងប្រទេសកម្ពុជា ហើយវេចខ្ចប់ដោយថង់ប្លាស្ទិកមានដៃយួរ នឹងត្រូវបង់កម្រៃបន្ថែម ចាប់ពីថ្ងៃទី១០ ខែមេសា ឆ្នាំ២០១៨ ខាងមុខនេះ » ។
សេចក្តីសម្រេចនេះ ធ្វើឡើងនៅក្នុងពិធីផ្សព្វផ្សាយខ្លឹមសារសំខាន់ៗនៃអនុក្រឹត្យ១៦៨ ស្តីពីការគ្រប់គ្រងប្លាស្ទិក និងប្រកាសអន្តរក្រសួងលើការកំណត់កម្រៃបន្ថែមលើការផ្តល់ប្លាស្ទិកដល់អតិថិជន កាលពីថ្ងៃទី២៣ មីនា កន្លងទៅនេះ ។
លោក ហេង ណារ៉េត អគ្គនាយកនៃអគ្គនាយកដ្ឋានគាំពារបរិស្ថាន នៃក្រសួងបរិស្ថាន បានប្រាប់កោះសន្តិភាព នាព្រឹកថ្ងៃទី២៥ មីនាម្សិលមិញថា យើងនឹងធ្វើការអនុវត្តជាលើកដំបូងនៅតាមមជ្ឈមណ្ឌលពាណិជ្ជកម្ម និងតាមផ្សារទំនើបទាំងអស់សិន បន្ទាប់មក គឺគ្រប់ផ្សារទាំងអស់នៅក្នុងប្រទេសកម្ពុជាទាំងមូល ។
លោកថ្លែងថា ៖« យើងចាប់ផ្ដើមធ្វើនៅតាមមជ្ឈមណ្ឌលពាណិជ្ជកម្ម និងនៅតាមផ្សារទំនើបជាមុនសិន ដើម្បីសាកល្បង ព្រោះវាជាកន្លែងប្រមូលផ្តុំ ងាយស្រួលក្នុងការគ្រប់គ្រង និងត្រួតពិនិត្យថា តើការអនុវត្តនោះបានជោគជ័យឬអត់ ។ បើកាលណាគាត់ទិញអីវ៉ាន់ ហើយត្រូវការថង់សម្រាប់ច្រក អតិថិជនត្រូវបន្ថែមតម្លៃ១កាក់ដុល្លារ ឬស្មើនឹង៤០០រៀលទៅលើទំនិញនោះបន្ថែម » ។
ការតម្រូវឲ្យហាងទំនិញគិតកម្រៃបន្ថែមពីអតិថិជននេះ មិនមែនជាការធ្វើអាជីវកម្មដើម្បីរកចំណូលនោះទេ តែជាការពញ្ញាក់ស្មារតី ក៏ដូចជាការអប់រំដល់ប្រជាពលរដ្ឋឲ្យគិតគូរពីបញ្ហាបរិស្ថាន តាមរយៈការកាត់បន្ថយការប្រើប្រាស់ថង់ប្លាស្ទិក ។
លោក ហេង ណារ៉េត បន្តថា ៖« ចាប់ពីថ្ងៃទី១០ ខែមេសា ឆ្នាំ២០១៨នេះតទៅ យើងនឹងចាប់ផ្ដើមអនុវត្តនៅតាមមជ្ឈមណ្ឌលពាណិជ្ជកម្ម និងតាមផ្សារទំនើបជាមុនសិន បន្ទាប់មកចាប់ពីឆ្នាំ២០២០ទៅ យើងនឹងបន្តគម្រោងការអនុវត្តនេះនៅតាមផ្សារទាំងអស់ក្នុងប្រទេសកម្ពុជា » ។
លោកបញ្ជាក់ថា រយៈពេល៣ឆ្នាំកន្លងទៅនេះ ខាងក្រសួងសេដ្ឋកិច្ច និងហិរញ្ញវត្ថុ បានផ្ដល់ថវិកាប្រមាណជា៨ពាន់លានរៀល ឬស្មើនឹង២លានដុល្លារក្នុង១ឆ្នាំជូនក្រុងចំនួន២៦ សម្រាប់ធ្វើការផ្គត់ផ្គង់ និងប្រមូលសំរាមជារៀងរាល់ឆ្នាំ ។
ការប្រើប្រាស់ថង់ប្លាស្ទិក មិនត្រឹមតែប៉ះពាល់ដល់បរិស្ថានទេ ថែមទាំងប៉ះពាល់ដល់សេដ្ឋកិច្ចជាតិទៀតផង ។ តាមការសិក្សាបានបញ្ជាក់ថា ប្រជាពលរដ្ឋនៅក្នុងទីប្រជុំជន ក្នុងមួយនាក់ប្រើថង់ប្លាស្ទិកប្រមាណ២ពាន់ថង់ក្នុង១ឆ្នាំ ឬប្រើច្រើនជាង៥ថង់ក្នុង១ថ្ងៃ ។
លោក សាយ សំអាល់ រដ្ឋមន្ត្រីក្រសួងបរិស្ថាន បានថ្លែងនៅក្នុងពិធីផ្សព្វផ្សាយខ្លឹមសារសំខាន់ៗនៃអនុក្រឹត្យ១៦៨ ស្តីពីការគ្រប់គ្រងប្លាស្ទិក និងប្រកាសអន្តរក្រសួងលើការកំណត់កម្រៃបន្ថែម លើការផ្តល់ប្លាស្ទិកដល់អតិថិជនថា បញ្ហាគ្រប់គ្រងប្លាស្ទិក គឺជារឿងសំខាន់ និងលំបាក មិនត្រឹមតែនៅក្នុងប្រទេសកម្ពុជានោះទេ ក៏ប៉ុន្តែសម្រាប់ពិភពលោកទាំងមូល ។
លោកបន្តថា គ្រប់ភាគីពាក់ព័ន្ធទាំងអស់ ជាពិសេសក្រុមហ៊ុនឯកជន គួរពិចារណាពីការប្រើប្រាស់ និងនាំចូលសារធាតុប្លាស្ទិក និងត្រូវចូលរួមបញ្ចេញមតិយោបល់ក្នុងការប្រមូលធាតុចូល ដើម្បីឱ្យការអនុវត្តអនុក្រឹត្យ១៦៨នេះ មាននិរន្តរភាព ។
សូមរំលឹកថា គ្រាន់តែនៅក្នុងរាជធានីភ្នំពេញ ថង់ប្លាស្ទិកដែលត្រូវបានប្រើប្រាស់ មានចំនួនរហូតដល់ទៅ១០លានថង់ជារៀងរាល់ថ្ងៃ ។ ក្នុងនោះថង់ផ្លាស្ទិកដែលត្រូវគេប្រមូលបានតាមរយៈការបោសសម្អាតផ្លូវ មានប្រមាណ១លាន៧សែនថង់នៅក្នុងរាជធានីភ្នំពេញ ។
គួរបញ្ជាក់ថា រាជរដ្ឋាភិបាលកម្ពុជាបានចេញអនុក្រឹត្យលេខ១៦៨ ស្តីពីការគ្រប់គ្រងថង់ប្លាស្ទិក កាលពីថ្ងៃទី១០ ខែតុលា ឆ្នាំ២០១៧។ អនុក្រឹត្យនេះមានគោលបំណងបង្កើនប្រសិទ្ធភាពលើការកាត់បន្ថយការនាំចូល ការផលិត និងការប្រើប្រាស់ថង់ប្លាស្ទិក ក៏ដូចជាសំដៅកាត់បន្ថយផលប៉ះពាល់សុខភាព និងបរិស្ថាន ៕
ចែករំលែកព័តមាននេះ