រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍នៅព្រឹកថ្ងៃទី២៦ ខែមីនា ឆ្នាំ២០១៨នេះថា ប្រទេសជប៉ុនបានដើរតួនាទីយ៉ាងសំខាន់ ក្នុងការតភ្ជាប់ HighWay Asean តាមរយៈការផ្តល់ឥណទានសម្បទានក្នុងការកសាង និងធ្វើឲ្យប្រសើរឡើងនូវកំណាត់ផ្លូវជាតិលេខ៥ ពីស្ពានព្រែកក្តាម ដល់ទីក្រុងប៉ោយប៉ែត នៃព្រំដែនប្រទេសថៃ ។
នាយករដ្ឋមន្ត្រីកម្ពុជាក៏បានបញ្ជាក់ថា ជូនប្រជាពលរដ្ឋ និងមន្ត្រីរាជការក៏ដូចជា មន្ត្រីទូតជប៉ុន អំពីដំណើការកសាង និងធ្វើឲ្យប្រសើរឡើងនូវកំណាត់ផ្លូវជាតិលេខ៥ ថា គឺមាន៣ដំណាក់កាលដែលដំណាក់កាលទី១ គឺចាប់ពីផ្នែកខាងជើងបាត់ដំបង ទៅសេរីសោភ័ណ្ឌ និងផ្លូវវាងក្រុងបាត់ដំបង និងក្រុងសេរីសោភ័ណ្ឌដែលមានសរុបប្រវែងជាង៨៤គីឡូវម៉ែត្រ ។
ចំណែកផ្នែកទី២ គឺចាប់ពីខាងត្បូងពីស្ពានព្រែកក្តាមរវាងក្រុងកំពង់ឆ្នាំងទៅទីរួមខេត្តពោធិសាត់ ១៣៥,៤ គីឡូម៉ែត្រ ដំណាក់កាលទី២ នៃការអនុវត្តគម្រោងនេះ ។ បន្ទាប់មក គឺពីពោធិសាត់មកបាត់ដំបង និងពីសិរីសោភណ្ឌទៅប៉ោយប៉ែត គឺដំណាក់កាលទី៣ មានប្រវែង១៤៩ គីឡូម៉ែត្រទាំងផ្លូវមេ និងផ្លូវវាងក្រុងពោធិសាត់ និងផ្លូវក្រុងសេរីសោភ័ណ្ឌ ។
ដូច្នេះប្រវែងសរុបពីភ្នំពេញមកព្រំដែនថៃ គឺ៤០០គីឡូម៉ែត្រសម្រាប់ការសាងសង់ និងធ្វើឲ្យប្រសើរឡើងនៃផ្លូវជាតិលេខ៥ ។ ប៉ុន្តែរាជរដ្ឋាភិបាលបានកសាងបានខ្លះៗ អញ្ចឹងតាមរយៈឥណទានសម្បទានរបស់ជប៉ុន គឺជប៉ុនចាប់ធ្វើពីព្រែកក្តាមមកព្រំដែនថៃមានប្រវែងជាង ៣៧០ គីឡូម៉ែត្រ ។
សម្តេចតេជោ ហ៊ុន សែនបានគូសបញ្ជាក់ថា នាយករដ្ឋមន្ត្រីជប៉ុនលោក ស៊ីនហ្សូ អាបេ (Shinzo Abe) បាននិយាយពីការសម្រចចិត្តអនុវត្តគម្រោងនេះ ពេលសម្តេចតេជោអញ្ជើញទៅប្រជុំស្តីពីគ្រោះមហន្តរាយនៅជប៉ុន ហើយក៏បានចុះហត្ថលេខាលើឥណទានចំនួន២ ដែលកិច្ចព្រមព្រៀងឥណទានទី១ បានចុះហត្ថលេខានៅថ្ងៃទី១៦ ឧសភា ២០១៣ ជាមួយទឹកប្រាក់ ៨,៨៥២ លានយ៉េនជប៉ុន និងឥណទានទី២ បានចុះហត្ថលេខាកាលពីថ្ងៃទី៣១ មីនា ២០១៧ ជាមួយទឹកប្រាក់ ១១,១៣៦ លានយ៉េនជប៉ុន ដូច្នេះសរុបទឹកប្រាក់នៃឥណទានទាំង ២ គឺមានចំនួន១៩,៩៨៩ លានយ៉េនជប៉ុន ដែលត្រូវនឹងទឹកប្រាក់ប្រមាណ១៨០លានដុល្លារអាមេរិក ។
សម្តេចបានបន្ថែមថា លក្ខខណ្ឌឥណទានរបស់ជប៉ុនសម្រាប់ហេដ្ឋារចនាសម្ព័ន្ធប្រកបដោយគុណភាព គឺមានសម្បទានកម្រិតខ្ពស់ក្នុងនោះអត្រាការប្រាក់ត្រឹមតែ០,០១% ក្នុងមួយឆ្នាំ ហើយរយៈពេលសងគឺ ៤០ឆ្នាំ និងរយៈពេលអនុគ្រោះចំនួន១០ឆ្នាំ ។ សម្តេចតេជោ ហ៊ុន សែនបញ្ជាក់ថា ៖ «ដូច្នេះឥណទានរបស់ជប៉ុន គឺជាឥណទានដែលមានកម្រិតសម្បទានខ្ពស់ នៅក្នុងក្របខណ្ឌនៃគោលនយោបាយនៃការផ្តល់សម្រាប់ការអភិវឌ្ឍន៍ហេដ្ឋារចនាសម្ព័ន្ធ ប្រកបដោយគុណភាពរបស់ជប៉ុន» ។ សម្តេចតេជោ ហ៊ុន សែន ក៏បានបញ្ជាក់ជូនអំពីតូនាទីរបស់ជប៉ុនសម្រាប់ការកសាងហេដ្ឋារចនាសម្ព័ន្ធ និងការតភ្ជាប់នៅកម្ពុជាថា ៖ «ហើយផ្លូវមួយខ្សែនេះ តួនាទីរបស់ជប៉ុនបានដើរតួនាទីមួយនៅក្នុងការតភ្ជាប់គេហៅថា ហាយវ៉េ អាស៊ានទី១ ឬក៏របៀងខាងត្បូង គឺតភ្ជាប់ពីទីក្រុងបាងកក ចូលមកកាន់ទីក្រុងភ្នំពេញ ហើយតភ្ជាប់ពីទីក្រុងភ្នំពេញទៅទីក្រុងហូជីមិញ តាមរយៈផ្លូវជាតិលេខ៥ផង និងតាមរយៈផ្លូវជាតិលេខ១ និងស្ពានអ្នកលឿងផងដែរ ។ អញ្ចឹងចំណុចនេះ ជាចំណុចយុទ្ធសាស្ត្រមួយរបស់កម្ពុជា ហើយផ្លូវជាតិលេខ៥ របស់យើង គឺនៅចំកណ្តាលតែម្តង ដែលមានតួនាទីសំខាន់នៅក្នុងការអភិវឌ្ឍន៍ប្រទេសរបស់យើង» ។
សម្តេចតេជោ ហ៊ុន សែន ក៏បានកោតសរសើរឯកអគ្គរាជទូតជប៉ុនលោក ហូរីណូអ៊ូជិ ហ៊ីដេហ៊ីសា (Horinouchi Hidehisa) ដែលមានវត្តមាននៅឯកម្មវិធីបើកការដ្ឋានសាងសង់ និងធ្វើឲ្យប្រសើរឡើងនូវកំណាត់ផ្លុវជាតិលេខ៥ពីបាត់ដំបងទៅកាន់ក្រុងសិរីសោភ័ណ ខេត្តបន្ទាយមានជ័យ ប្រវែងជិត៨៥គីឡូម៉ែត្រព្រឹកថ្ងៃទី២៦ ខែមីនាថា ជាឯកអគ្គរាជទូតមួយរូបដែលរៀនភាសាខ្មែរ និងចេះភាសាខ្មែរបានលឿនផងដែរ ។ សម្តេចបានកោតសរសើរលោក ហូរីណូអ៊ូជិ ហ៊ីដេហ៊ីសាថា៖ « គាត់អាចនិយាយភាសាយើង ហើយប្រើពេលវេលាខ្លីនៅក្នុងការធ្វើសុន្ទកថា សម្រាប់ប្រជាពលរដ្ឋកម្ពុជា» ៕
ចែករំលែកព័តមាននេះ