ខេត្តប៉ៃលិន ៖ គេដឹងថាជំនឿនៃការធ្វើបុណ្យភូមិ ត្រូវបានប្រជាពលរដ្ឋទូទាំងប្រទេសកាន់ជាប់ និងធ្វើតាមតៗគ្នាតាំងពីសម័យបុរាណរហូតមកដល់បច្ចុប្បន្ន ពិសេសបន្ទាប់ប្រមូលផលកសិកម្មរួចរាល់ ពួកគេយកផលដែលបានមួយចំនួនទៅដាក់សែនព្រេន លាបំណន់ សុំសេចក្តីសុខ និងដឹងគុណម្ចាស់ទឹកម្ចាស់ដី…
ខេត្តប៉ៃលិន ៖ គេដឹងថាជំនឿនៃការធ្វើបុណ្យភូមិ ត្រូវបានប្រជាពលរដ្ឋទូទាំងប្រទេសកាន់ជាប់ និងធ្វើតាមតៗគ្នាតាំងពីសម័យបុរាណរហូតមកដល់បច្ចុប្បន្ន ពិសេសបន្ទាប់ប្រមូលផលកសិកម្មរួចរាល់ ពួកគេយកផលដែលបានមួយចំនួនទៅដាក់សែនព្រេន លាបំណន់ សុំសេចក្តីសុខ និងដឹងគុណម្ចាស់ទឹកម្ចាស់ដី ។
ជាក់ស្តែងកាលពីរសៀលថ្ងៃទី២៥ ខែមីនា ឆ្នាំ២០១៨ ស្ថិតនៅភូមិភ្នំដំបង សង្កាត់អូរតាវ៉ៅ ក្រុងប៉ៃលិន លោក ឡុង វុទ្ធី មេភូមិភ្នំដំបង បានរៀបចំធ្វើបុណ្យភូមិ ដើម្បីសុំសេចក្តីសុខរំដោះគ្រោះចង្រៃឆ្នាំចាស់ និងអរគុណដល់ម្ចាស់ទឹកម្ចាស់ដី ។
បើតាមការរៀបរាប់ពីលោក ឡុង វុទ្ធី មេភូមិភ្នំដំបង បានឱ្យដឹងថា ជារៀងរាល់ឆ្នាំភូមិរបស់លោកតែងតែរៀបចំធ្វើបុណ្យភូមិ ជាពិសេសបន្ទាប់ពីប្រជាពលរដ្ឋប្រមូលផលកសិផលដំណាំដាំដុះ ដូចជាពោតក្រហម ដំឡូងមី ចេក ស្វាយ ល្ហុង សណ្តែក ល្ង និងកសិផលផ្សេងៗទៀត ។
លោកបន្តទៀតថា ការធ្វើបុណ្យភូមិនេះ ប្រជាពលរដ្ឋប្រមូលយកផលដំណាំទាំងនោះមួយចំនួនមកដាក់នៅកន្លែងរោងបុណ្យ រួចនិមន្តព្រះសង្ឃឱ្យមកសូត្រមន្តរំដោះគ្រោះចង្រៃ ថ្លែងអំណរគុណដល់ម្ចាស់ទឹកម្ចាស់ដី ហើយលើសពីនេះ សុំឱ្យមានភ្លៀងធ្លាក់គ្រប់គ្រាន់ទទួលបានផលច្រើននៅឆ្នាំក្រោយៗទៀត ។ លោកបញ្ជាក់ទៀតថា ការធ្វើបុណ្យភូមិនាឆ្នាំ២០១៨នេះ ក៏មិនខុសពីឆ្នាំមុនៗដែរ ដោយការពូនភ្នំខ្សាច់ ហើយប្រជាពលរដ្ឋក្នុងភូមិទាំងអស់ចូលរួមយ៉ាងច្រើនកុះករជាបន្តបន្ទាប់ មានការសែនព្រេន មាន់ខ្វៃ ក្បាលជ្រូក ដល់អារុកអារក្សអ្នកតា ឱ្យជួយថែរក្សាកូនចៅដែលរស់នៅក្នុងភូមិ ទទួលបានសេចក្តីសុខសាន្ត កុំឱ្យមានជំងឺរោគា និងកុំឱ្យមានការខូចខាតដំណាំដាំដុះនាពេលខាងមុខបន្តទៀតផងដែរ ។
ជាចុងក្រោយ នៅរសៀលថ្ងៃដដែល ប្រជាពលរដ្ឋក្នុងភូមិទាំងអស់ ដែលបានសហការណ៍គ្នាធ្វើបុណ្យភូមិនេះ ក៏បាននាំគ្នាទទួលទាននំបញ្ចុក បង្កភាពសប្បាយរីករាយ រួចក៏ត្រលប់ទៅផ្ទះរៀងៗខ្លួន ៕
ចែករំលែកព័តមាននេះ