ខេត្តកំពត ៖ ដើម្បីពង្រឹងនូវការអនុវត្តន៍ភូមិឃុំមានសុវត្ថិភាព កងកម្លាំងនគរបាលទាំងអស់តាំងពីថ្នាក់មូលដ្ឋានរហូតដល់ខេត្ត ក្រោមការចង្អុលបញ្ជារបស់លោកឧត្តមសេនីយ៍ទោ ម៉ៅ ចន្ទ័មធុរិទ្ធ ស្នងការខេត្ត និងមានការសម្រួលនីតិវិធីពី លោក…
ខេត្តកំពត ៖ ដើម្បីពង្រឹងនូវការអនុវត្តន៍ភូមិឃុំមានសុវត្ថិភាព កងកម្លាំងនគរបាលទាំងអស់តាំងពីថ្នាក់មូលដ្ឋានរហូតដល់ខេត្ត ក្រោមការចង្អុលបញ្ជារបស់លោកឧត្តមសេនីយ៍ទោ ម៉ៅ ចន្ទ័មធុរិទ្ធ ស្នងការខេត្ត និងមានការសម្រួលនីតិវិធីពី លោក ឯក ឆេងហ៊ួត ព្រះរាជអាជ្ញាអមសាលាដំបូងខេត្ត ។ កាលពីរសៀលថ្ងៃទី២៤ ខែមីនា ឆ្នាំ២០១៨ កម្លាំងនគរបាលស្រុកកំពង់ត្រាច បានសហការណ៍ជាមួយកម្លាំងនគរបាលអន្តរាគមន៍ឈុតខ្មៅស្នងការខេត្ត ដឹកនាំដោយលោកវរសេនីយទោ លក ញ៉ាវ នាយការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលខេត្ត បានចុះបង្ក្រាបទីតាំងសង្វៀនជល់មាន់មួយកន្លែង ស្ថិតនៅភូមិកោះក្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។
លោកវរសេនីយទោ លក ញ៉ាវ បានឲ្យដឹងថា ក្នុងការចុះបង្ក្រាបបទល្មើសល្បែងជល់មាន់ខាងលើ កម្លាំងសមត្ថកិច្ចយើងឃាត់ខ្លួនជនញៀនល្បែងបានចំនួន៦នាក់ រួមនិងវត្ថុតាងមួយចំនួនមាន មាន់ជល់ចំនួន២ក្បាល, កន្ត្រកដាក់មាន់ចំនួន៥, ជញ្ជីងថ្លឹងមាន់១គ្រឿង, ម៉ូតូគ្រប់ប្រភេទចំនួន១៨គ្រឿង ។
លោកបានបន្តទៀតថា ចំពោះជនសង្ស័យទាំង៦នាក់ ដែលឃាត់ខ្លួននាំមកកាន់ស្នងខេត្តមាន ទី១.ឈ្មោះ ខូវ មាវ ភេទប្រុស អាយុ៣៥ឆ្នាំ នៅភូមិកោះក្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។ ទី២.ឈ្មោះ អ៊ុក ទន់ ភេទប្រុស អាយុ៤៧ឆ្នាំ មានទីលំនៅភូមិកំពង់ត្រាចទី១ ឃុំកំពង់ត្រាចខាងលិច ស្រុកកំពង់ត្រាច ទី៣.ឈ្មោះ យ៉ិន រីម ភេទប្រុស អាយុ៤០ឆ្នាំ នៅភូមិកំពង់ត្រាចខាងកើត ឃុំកំពង់ត្រាច ស្រុកកំពង់ត្រាច ទី៤.ឈ្មោះ ពេជ្រ ធឿន ភេទប្រុស អាយុ២៥ឆ្នាំ មានទីលំនៅភូមិកោះសោម ឃុំពងទឹក ស្រុកដំណាក់ចង្អើរ ខេត្តកែប ទី៥.ឈ្មោះ យេន ពី ភេទប្រុស អាយុ២៨ឆ្នាំ នៅភូមិដើមចារ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត និងទី៦.ឈ្មោះ សុខ ពុធ ភេទប្រុស អាយុ២០ឆ្នាំ នៅភូមិកោះក្លូតឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។ ជនសង្ស័យ រួមនិងវត្ថុតាងយើងបានកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី ៕
ចែករំលែកព័តមាននេះ