រាជធានីភ្នំពេញ ៖ ចៅក្រមសាលដំបូងរាជធានីភ្នំពេញ កាលពីព្រឹកថ្ងៃទី២៥ មិនា ២០១៨ បានសម្រេចចេញដីការឃុំខ្លួនស្ត្រីម្នាក់ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទប៉ុនប៉ងឃាតកម្មដោយប្រើថ្នាំពុល និងបោះបង់អនីតិជន តាមបញ្ញាតិ្តមាត្រា២៧ ,២០១ និងមាត្រា៣២១ នៃក្រមព្រហ្មទណ្ឌ ។
ជនសង្ស័យមានឈ្មោះ ម៉េត ជិន ភេទស្រី អាយុ៣៨ឆ្នាំ មានទីលំនៅផ្ទះជួលលេខ១៦ ភូមិតាងួន សង្កាត់កាកាប ខណ្ឌពោធិសែនជ័យ រាជធានីភ្នំពេញ មុខរបររកស៊ីលក់ដូរមុខរោងចក្រ ។ ប្តីជាជនរងគ្រោះឈ្មោះ ស៊ឹម ស៊ុយ អាយុ៤០ឆ្នាំ មានកូនក្នុងបន្ទុកចំនួន៣នាក់ ។ ជនសង្ស័យត្រូវបានសមត្ថកិច្ចកងរាជអាវុធហត្ថរាជធានីភ្នំពេញចាប់ខ្លួន កាលពីថ្ងៃទី២៤ មិនា ២០១៨ ដែលបានប្រព្រឹត្តអំពើដាក់ថ្នាំពុលសម្លាប់ប្តី និងវេចលុយរត់ទៅរស់នៅជាមួយសហាយចោលកូន៣នាក់ ។
ដើមចមក្នងរឿងនេះត្រូវបានសមត្ថកិច្ចឲ្យដឹងថា កាលពីអំឡុងឆ្នាំ២០១៥ ជនរងគ្រោះជាប្តីឈ្មោះ ស៊ឹម ស៊ុយ បានកើតជំងឺទឹកនោមប្រៃ ហើយចាប់តាំងពីពេលនោះមកប្រពន្ធគាត់ ឈ្មោះ ម៉េត ជិន ក៏មានទំនាក់ទំនងសេ្នហាលួចលាក់ជាមួយឈ្មោះ ប៉ែន នឿន ដែលជាអ្នកបើកបររថយន្តដឹកម្មកររោងចក្រ ។ លុះថ្ងៃទី២០ ខែកក្កដា ២០១៧ ឈ្មោះ ស៊ុយ ចាន់រ៉ា ជាកូនស្រីរបស់ឈ្មោះ ស៊ឹម ស៊ុយ និងឈ្មោះ ម៉េត ជិន ក៏បានប្រាប់ទៅឪពុកថា ម្តាយបានដាក់ថ្នាំនៅក្នុងចំណីអាហារឲ្យពុកហូប ។
លុះនៅថ្ងៃដដែលម៉ោងប្រមាណ៣ និង៣០នាទីរសៀល នៅក្នុងចានគុយទាវ និងក្នុងទឹកសូដាមានកកថ្នាំពណ៍ស ប្រហែល៤ទៅ៥គ្រាប់កិនល្អិតនៅក្នុងនោះ ។ ហើយរឿងនេះក៏ដឹងដល់ឈ្មោះ ម៉េត ជិន ស្រាប់តែស្រាប់តែនៅថ្ងៃទី២៣ ខែកក្កដា ២០១៧ ឈ្មោះ ម៉េត ជិន ក៏បានរត់ចេញពីផ្ទះចោលកូនៗ៣នាក់ ព្រមទាំងយករថយន្តកូរ៉េមួយតោនកន្លះ១គ្រឿង ពណ៌ខៀវបាក់ស្លាក លេខព្រះសីហនុ 2A- ២៤៩៨ លុយសរុបជាង១២ម៉ឺនដុល្លារអាមេរិក និងខ្សែដៃប្លាកទីនរបស់កូនស្រី១តម្លឹងគេចខ្លួនទៅជាមួយផង ។ ដែលនោះជាការគេចខ្លួនមួយរយៈ ទៅរស់នៅជាមួយសាហាយ ប៉ុន្តែនៅពេលចាយវាយអស់លុយកាក់ បានមានបំណងវិលត្រឡប់មករកកូនវិញ តែជាការហួសពេលហើយ ដែលកូនបានដាក់ពាក្យបណ្តឹងទៅសមត្ថកិច្ចពាក់ពន្ធពីបទប៉ុនប៉ងឃាតកម្ម ដោយប្រើថ្នាំពុលទៅលើប្តី និងបោះបង់ចោលកូន ឲ្យរស់យ៉ាងវេទនា គ្មានលុយកាក់ផ្គត់ផ្គង់ជីវភាពមើលឪពុកដែលកំពុងមានជំងឺ ។
សមត្តកិច្ចបន្តថា រហូតដល់ថ្ងៃទី២២ ខែមិនា ឆ្នាំ២១០៨ ស្ត្រីជាជនសង្ស័យទំនងសប្បាយចាយវាយប្រាក់ជាមួយសហាយលុយពីខ្លួន ក៏បានមានបំណងចូលផ្ទះក៏ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញ ចាប់ខ្លួនតាមដីការបស់តុលាការ ដោយយោងលើពាក្យបណ្តឹងរបស់កូនស្រី ៕
ចែករំលែកព័តមាននេះ