រាជធានីភ្នំពេញ ៖ លោក លឺ ឡាយស្រេងបានស្នើរដល់ថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ ចូលតុចរចានៅមុនពេលបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ រដ្ឋសភា ។ លោក…
រាជធានីភ្នំពេញ ៖ លោក លឺ ឡាយស្រេងបានស្នើរដល់ថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ ចូលតុចរចានៅមុនពេលបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ រដ្ឋសភា ។
លោក លឺ ឡាយអតីតមន្ត្រីជាន់ខ្ពស់គណបក្សហ្វ៊ិន ស៊ិនប៉ិច នៅថ្ងៃទី២៥ មីនា ឆ្នាំ២០១៨ បាន លើកឡើងក្នុងបណ្តាញសង្គមហ្វេសប៊ុក ស្នើដល់ថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិគួរចូលតុចរាចរគ្នា ដើម្បីប្រយោជន៍ជាតិទៅ ។ លោកថា គណបក្សប្រជាជនកម្ពុជា កុំអាងប្រទេសចិននៅពីក្រោយនោះ មិនអាចជួយបានទេ ព្រោះបណ្តាប្រទេសធំជាច្រើនទៀតមិនបានគាំទ្រទង្វើក្នុងការដឹកនាំរបស់គណបក្សប្រជាជនកម្ពុជានោះទេ ។
យោងតាមវីដេអូឃ្លីបបញ្ជាក់ថា «រឿងផ្ទាល់ខ្លូនរបស់ខ្ញុំ សូមលុបបំបាត់ចោល ចង់យកទៅធ្វើអ្វីក៏ធ្វើចុះ តែខ្ញុំសុំថា មកចរចាគ្នាវិញ លឺឡាយស្រេង កុំគិតវាគ្មានប្រយោជន៍ទេ ។ កុំខ្លាចអី ប៉ុន្តែខ្ញុំសូមផ្តាំថា ប្រទេសជាង៩០% បានថ្កោលទោសនៅសល់តែប្រទេសចិន រុស្សី និងប្រទេសយួន ហើយនៅតែនិយាយមិនអី គឺគ្មានទេ សម្តេចតេជោ ហ៊ុនសែនអើយ ងាកមកចរចាគ្នាទៅ » ។
លោកលឺ ឡាយស្រេងក៏បានលើកឡើងទៀតថា បើមានគំនិតជួយប្រជាជនកម្ពុជាពិតមែននោះ គួរចរចាគ្នាទៅ ខ្ញុំមើលឃើញគណបក្សប្រជាជនបានធ្វើល្អច្រើនហើយ ដូច្នេះប្រសិនអង្គុយនិយាយគ្នាវាជាការល្អ ។ ជាមួយគ្នានោះដែរ គណបក្សសង្គ្រោះជាតិគួរឈប់វប្បធម៌សងសឹកគ្នាទៅ ។ យ៉ាងណាក្តីគណបក្សសង្គ្រោះជាតិបាននិយាយច្រើនហើយ ។
លោក លឺ ឡាយស្រេងក៏បានអះអាងថា សម្រាប់ការបោះឆ្នោតខាងមុខនេះ បើសិនគណបក្សសង្គ្រោះជាតិចូលរួមនោះ លទ្ធផល គឺឈ្នះប្រមាណតែពីរទៅប្រាំសម្លេងប៉ុណ្ណោះ ។ លោកបញ្ជាក់ថា «គណបក្សប្រជាជនកម្ពុជាអាចឈ្នះ៥សម្លេង ឬគណសង្គ្រោះជាតិឈ្នះ៥សម្លេង ។ ខ្លាចអីបើទាហានគណបក្សប្រជាជនកម្ពុជាគ្រប់គ្រងទាំងអស់ ចំណែកគណបក្សសង្គ្រោះជាតិវិញ បើឈ្នះឆ្នោតដូចជា ខ្ចីផ្ទះគណបក្សប្រជាជនកម្ពុជារស់នៅអីចឹង ព្រោះថា កងទ័ពក៏អត់ ហើយរចនាសម្ព័ន្ធក៏អត់ ហើយគណបក្សត្រូវមានអ្នកគាំទ្រយ៉ាងតិច៦០ម៉ឺននាក់ ទើបអាចគ្រប់គ្រងប្រទេសបាន» ។
អតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិចដែលស្របតាមគណបក្សកាន់អំណាចក៏បានលើកឡើងថា ប្រសិនបើគណបក្សសង្គ្រោះជាតិឈ្នះឆ្នាំ២០១៨ អាចបានតែមួយអាណត្តិប៉ុណ្ណោះ ហើយក៏មិនអាចធ្វើអ្វីដែរ ព្រោះគណបក្សប្រជាជនកម្ពុជាក៏នៅក្នុងស្ថាប័នសភាដដែល ។
ទាក់ទិននឹងសំណើររបស់អតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិចដែលតែងតែរិះគន់ថ្នាក់ដឹកនាំគណបក្សកាន់អំណាចនេះ ត្រូវបានលោកសុខ ឥសាន សម្តែងការអស់សំណើច និងលើកឡើងថា គួរចង់ឲ្យអស់សំណើចណាស់ ប្រយុទ្ធគ្នាគេវាយសន្លប់ហើយ ចង់សុំចរចា ។ ការប្រកួតគ្នាជាង២០ឆ្នាំហើយ រហូតរំលោភលក្ខខណ្ឌប្រកួតត្រូវដៃគូប្រកួតវាយសន្លប់ ងើបលែងរួចទៅហើយ បែរជាមកសុំចរចាសម្របសម្រួលទៅវិញ ? គឺពិតជាគួរចង់ឲ្យអស់សំណើចណាស់ ។
លោកបញ្ជាក់ថា «វាមិនដែលមានទេ នៅលើលោកនេះ ។ ដូច្នេះ ការចរចាណាមួយជាមួយអ្នកចាញ់ និងខុសច្បាប់ទៀត គឺមិនអាចកើតមានជាដាច់ខាត កុំសង្ឃឹមឡើយ ទោះបីមានការគំរាមកំហែង ឬមានការវិភាគលំអៀងទៅរកអតីតបក្សប្រឆាំងក៏ដោយ ។ អតីតបក្សប្រឆាំងបានងាប់បាត់ទៅហើយ តាមសាលដីកាស្ថាពររបស់តុលាការកំពូលស្របទៅតាមពិរុទ្ធភាពធ្ងន់ធ្ងររបស់អតីតបក្សប្រឆាំងដែលមិនអាចបកក្រោយបានជាដាច់ខាត» ។
លោកបន្តថា ការលើកឡើងនេះ ជាការស្រមើស្រមៃចង់ឲ្យមានការជួបចរចារវាងគណបក្សកាន់អំណាច និងអតីតបក្សប្រឆាំងនឹងមិនអាចកើតមានឡើងជាដាច់ខាត ។ រាជរដ្ឋាភិបាលកម្ពុជាមិនអាចយកលទ្ធិប្រជាធិបតេយ្យ និងនីតិរដ្ឋទៅដោះដូរជាមួយវប្បធម៌ ទណ្ឌភាពបានឡើយ សូមកុំស្រមៃឲ្យសោះ ។ សូមជម្រាបថា ប្រទេសជប៉ុនក៏បានស្នើឲ្យគណបក្សប្រជាជនកម្ពុជាជួបចរចាជាមួយគណបក្សសង្គ្រោះជាតិផងដែរ ។ ប៉ុន្តែសំណើរនេះត្រូវបានសម្តេចតេជោ ហ៊ុនសែន ប្រកាបដិសេធន៍ថា មិនអាចចរចាបាននោះទេ ៕
លោក គី តិច មេធាវីការពារក្តីសម្តេចតេជោចូលបំភ្លឺនៅតុលាការ
ចែករំលែកព័តមាននេះ