រាជធានីភ្នំពេញ ៖ សាលាបណ្តុះបណ្តាលផ្នែកអចលនទ្រព្យ ដែលត្រូវបានផ្តួចផ្តើមពីសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាអស់រយៈពេលជាច្រើនឆ្នាំមកហើយនោះ រហូតមកដល់ពេលនេះ មានការលើកឡើងថា គ្រោងនឹងចាប់ផ្ដើមនៅឆ្នាំនេះ ។
ទោះបីយ៉ាងណា ពុំមានប្រភពច្បាស់ការណ៍ណាមួយអាចបញ្ជាក់ថា គម្រោងនេះនឹងដំណើរការបែបណាទេ ខណៈប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបញ្ជាក់ថា គម្រោងនេះប្រែប្រួលហើយ ។
ថ្លែងប្រាប់កោះសន្ដិភាពតាមទូរស័ព្ទកាលពីរសៀលថ្ងៃទី២៣ មីនា លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឲ្យដឹងថា ទាក់ទងនឹងគម្រោងបើកសាលាបណ្តុះបណ្តាលធនធានមនុស្សផ្នែកអចលនទ្រព្យនេះ គឺផ្លាស់ប្តូរហើយ ។ លោកបណ្ឌិតបញ្ជាក់ថា ៖« ទាក់ទងនឹងសាលាបណ្តុះបណ្តាលនេះ មានការផ្លាស់ប្តូរបន្តិច ។ ចាំមើល បើមានអ្វីថ្មី នឹងផ្តល់ជូនតាមក្រោយ » ។
ពាក់ព័ន្ធនឹងគម្រោងបើកសាលានេះដែរ នាយកក្រុមហ៊ុន Key Real Estate មានប្រសាសន៍ថា លោកក៏ពុំទាន់ដឹងច្បាស់លាស់ណាមួយដែលបញ្ជាក់ថា អាចនឹងចាប់ផ្ដើមនៅឆ្នាំ២០១៨នេះបានទេ ដោយកន្លងមក គ្រាន់តែមានការនិយាយពីគម្រោងនេះប៉ុណ្ណោះ ។
លោក សន សៀប នាយកក្រុមហ៊ុន Key Real Estate លើកឡើងថា ៖« កន្លងមក មានភាគីទាំងក្នុងស្រុក និងក្រៅស្រុក មានបំណងចង់បើកសាលានេះ ហើយខ្ញុំក៏ធ្លាប់ជួយសម្របសម្រួលដែរ ។ អ្នកខ្លះចង់សហការ ប៉ុន្តែនៅតែបើកមិនទាន់ចេញ ហើយរយៈពេលចុងក្រោយនេះ គឺមានការនិយាយច្រើនឡើងៗ ។ អីចឹង ខ្ញុំគិតថា វាជិតដល់ពេលដែលយើងអាចមានសាលាដែរហើយ ។ ប៉ុន្តែមកដល់បច្ចុប្បន្ននេះ យើងមិនទាន់មានភាពច្បាស់លាស់ណាមួយបញ្ជាក់ថា យើងនឹងមានសាលាកើតឡើងឡើយ» ។
បើតាមនាយកក្រុមហ៊ុន Key Real Estate ការបណ្ដុះបណ្ដាលចំណេះដឹងផ្នែកអចលនទ្រព្យកន្លងមក គឺរៀនតាមគ្នា និងតាមរយៈការចូលរួមជាសិក្ខាសាលា ដើម្បីចែករំលែក និងផ្លាស់ប្តូរចំណេះដឹងពីអ្នកជំនាញប៉ុណ្ណោះ ។
លោកមានប្រសាសន៍ថា ៖« ទាក់ទងនឹងចំណេះដឹង និងជំនាញវិស័យអចលនទ្រព្យនេះ កន្លងមក យើងរៀនតាមរយៈក្រុមហ៊ុនដែលមានបទពិសោធន៍ ឬតាមរយៈសិក្ខាសាលាផ្លាស់ប្តូរចំណេះដឹង តែបើយើងមានការបណ្តុះបណ្តាលជាក់លាក់ណាមួយ យើងងាយស្រួលផ្តល់ចំណេះដឹង បង្កើតធនធានមនុស្ស ហើយងាយស្រួលក្នុងការផ្តល់កម្លាំងពលកម្មជំនាញផ្នែកអចលនទ្រព្យ ដើម្បីឱ្យស្របទៅនឹងការអភិវឌ្ឍវិស័យអចលនទ្រព្យ » ៕
ចែករំលែកព័តមាននេះ