រាជធានីភ្នំពេញ ៖ បុរសម្នាក់មានអាការៈស្រវឹងខ្លាំងបើករថយន្តស៊េរីទំនើប១គ្រឿងចេញពីកន្លែងកម្មពិធីជប់លៀង ហើយរេចង្កូតទៅប៉ះនឹងធុងរទេះពោះគោចំហុយ និងធុងទឹកកកតិចតួចសោះ មិនទទួលខុស បែរជាខំព្យាយាមបើករត់គេច តែទៅបុករបាំថ្មចែកទ្រូងផ្លូវមួយកន្លែងទៀត ចុងក្រោយបើករត់ទៅធ្លាក់ប្រឡាយទឹកដោយខ្លួនឯងហេតុការព៍នេះបង្កការភ្ញាក់ផ្អើលកាលពីម៉ោង២១និង៥០នាទីយប់ ថ្ងៃទី២៤ មីនា នៅចំណុចមុខអាហារដ្ឋាន ក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។ ក្រោយកើតហេតុ រថយន្តបង្កនោះ ព្យាយាមបើករត់គេចពីការតាមប្រម៉ាញ់របស់សមកិច្ចខណ្ឌ រហូតមកធ្លាក់ប្រឡាយទឹក ស្ថិតក្នុងភូមិក្រាំងអង្ក្រង២ សង្កាត់ក្រាំងធ្នង់ ខណ្ឌសែនសុខ ទើបទៅមុខលែងរួច។
បុរស និងស្ត្រីរងគ្រោះ ជាម្ចាស់រទេះបានបញ្ជាក់ប្រាប់ថា មុនកើតហេតុ ពួកគាត់កំពុងរៀបចំរទេះពោះគោ និងធុងទឹកកកដាក់ចូលក្នុងរទេះ ស្រាប់តែរថយន្តនេះបើកចេញមកពីផ្លូវផ្សារទំនើបអ៊ីអនយ៉ាងលឿន ក៏ជ្រុលមកប៉ះរទេះរបស់គាត់ ពេលប៉ះនោះអ្នកបើករថយន្តមិនបានឈប់មើលទេ គឺព្យាយាមបើករត់ក៏ជ្រុលបុកនឹងរបាំងថ្មពុះចែកទ្រូងផ្លូវទៀតរលំ និងវៀច២ដុំ។ ភ្លាមៗនោះសមត្ថកិច្ចនៅគោលដៅឃើញក៏ដេញតាមរថយន្តនេះរហូតមកធ្លាក់ចូលប្រឡាយទឹកតែម្តង បើមិនធ្លាក់ប្រឡាយទេនោះ ម្ល៉េះរថយន្តនេះនឹងបន្តបើករត់ទៅមុខទៀតមិនខាន។
សមត្ថកិច្ចក៏បញ្ជាក់ឲ្យដឹងដែរថា រថយន្តបង្កខាងលើម៉ាកឡង់គ្រីស័រ ពណ៌ស ពាក់ស្លាកលេខ ភ្នំពេញ 2AT-9595 ចំណែកបុរសអ្នកបើកឈ្មោះ ហេង ចំរើនអាយុ៣៩ឆ្នាំ មុខរបរបុគ្គលិកក្រុមហ៊ុន ស្នាក់នៅផ្ទះលេខ៦០ផ្លូវលេខ១៩៩ ភូមិ៥ សង្កាត់ទួលស្វាយព្រៃ១ ខណ្ឌចំការមន។
បើតាមការបញ្ជាក់ពីសមត្ថកិច្ចថា ករណីនេះ ក៏ព្រោះតែអ្នកបើកបររថយន្តមានអាការៈស្រវឹងខ្លាំងពេក ហើយលែងដឹងអ្វីៗទាំងអស់ ពេលសមត្ថកិច្ចនាំមកដល់ប៉ុសិ៍្តហើយនូវមិនទាន់ស្វាងផង តែមិនបណ្តាលឲ្យមានរងរបួសដល់អាយុជីវិតមនុស្សទេ គ្រាន់ខូចខាតសម្ភារៈអាជីវករលក់ដូរប៉ុណ្ណោះ និងរបាំងថ្មពុះចែកទ្រូងផ្លូវរលំនិងវៀច២ផ្ទាំង។
បច្ចុប្បន្ននេះរថយន្តបង្កសមត្ថកិច្ចជំនាញបានយកទៅរក្សាទុកនូវការិយាល័យចរាចរណ៍រាជធានីភ្នំពេញរង់ចាំដោះស្រាយពេលក្រោយ៕
ចែករំលែកព័តមាននេះ