រាជធានីភ្នំពេញ ៖ ស្របពេលកំណើនវិនិយោគិនចិននៅកម្ពុជាកាន់តែច្រើន គេឃើញថា ក្នុងវិស័យអចលនទ្រព្យក៏មានការចូលរួមអភិវឌ្ឍន៍ដោយវិនិយោគិនចិនយ៉ាងច្រើនផងដែរក្នុងគម្រោងធំៗនៅរាជធានីភ្នំពេញ ក៏ដូចជាតាមបណ្ដាខេត្តសក្ដានុពលមួយចំនួនទៀត ជាពិសេសក្នុងខេត្តព្រះសីហនុតែម្ដង ។ ពាក់ព័ន្ធនឹងកំណើនវិនិយោគិនចិនដែលកំពុងកាន់កាប់គម្រោងអចលនទ្រព្យធំៗនៅក្នុងប្រទេសកម្ពុជា មានមតិមួយចំនួនបានបង្ហាញពីការព្រួយបារម្ភ និងមួយចំនួនទៀតបានសាទរចំពោះវត្តមានចិនដែលមកវិនិយោគនៅក្នុងប្រទេសកម្ពុជា ប៉ុន្តែក៏បានស្នើឲ្យរាជរដ្ឋាភិបាលត្រូវតែធ្វើអ្វីម្យ៉ាងដើម្បីការពារហានិភ័យដែលអាចនឹងកើតឡើងផងដែរ ។
លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឲ្យដឹងថា លោកពិតជារីករាយចំពោះវត្តមានវិនិយោគិនចិនមកបណ្ដាក់ទុននៅក្នុងប្រទេសកម្ពុជាលើវិស័យអចលនទ្រព្យ ព្រោះចិនជាជនជាតិដែលមានទុនច្រើនសម្រាប់វិនិយោគ ហើយការមកវិនិយោគរបស់គេ ក៏បានផ្ដល់ប្រយោជន៍ជាច្រើនដល់ប្រទេសកម្ពុជាដែរ ។
លោកនិយាយថា ៖« ខ្ញុំអត់មានអ្វីដែលត្រូវព្រួយបារម្ភនោះទេ តែផ្ទុយទៅវិញ ខ្ញុំមានតែសប្បាយចិត្ត ដែលចិនជាជនជាតិមានលុយច្រើន គេមករកស៊ីនៅស្រុកយើង » ។
លោកបន្តថា នៅបណ្ដាប្រទេសរីកចម្រើនទាំងអស់ដូចជា អូស្ត្រាលី និងអាមេរិក ជាដើម ក៏មិនប្រាកដថា ម្ចាស់គម្រោង ឬអ្នកគ្រប់គ្រងគម្រោងអចលនទ្រព្យធំៗជាជនជាតិក្នុងស្រុករបស់គេដែរ ។ គម្រោងទាំងនោះភាគច្រើនក៏ត្រូវបានគ្រប់គ្រងដោយវិនិយោគិនបរទេសដែលមានទ្រព្យសម្បត្តិច្រើន ។ ដូចនេះ កម្ពុជាក៏មិនខុសគ្នា បើសិនជាខ្លួនមិនទាន់មានលទ្ធភាពសម្រាប់អភិវឌ្ឍន៍គម្រោងធំៗ គឺត្រូវអនុញ្ញាតឲ្យវិនិយោគិនបរទេសជាអ្នកវិនិយោគ ហើយក៏មិនត្រូវមានគំនិតចង្អៀតចង្អល់លើបញ្ហានេះដែរ ។
លោកបន្ថែមថា ទន្ទឹមនឹងកំណើនវិនិយោគិនចិនកាន់តែច្រើននៅក្នុងប្រទេសកម្ពុជា រាជរដ្ឋាភិបាលគួរតែមានវិធានការអ្វីមួយការពារហានិភ័យ ឬគ្រប់គ្រងជនបរទេសឲ្យបានច្បាស់លាស់ ។
លោកនិយាយថា ៖« ប្រទេសណាក៏ដូចប្រទេសណាដែរ តែងតែមានជនបរទេស បណ្ដាក់ទុនវិនិយោគ តែរាជរដ្ឋាភិបាលគួរតែបង្កើតច្បាប់គ្រប់គ្រងជនបរទេសឲ្យបានច្បាស់លាស់ កុំបណ្ដោយឲ្យជនបរទេសអាចធ្វើអ្វីតាមចិត្ត ។ ការធ្វើបែបនេះ ក៏អាចជួយដល់ប្រជាពលរដ្ឋក្នុងស្រុកយើងផងដែរ ។ ជាក់ស្ដែង ដូចយើងមើលឃើញស្រាប់ សព្វថ្ងៃនេះ ចិនមកស្រុកខ្មែរ មានចិនខ្លះនាំគ្នាមកទាំងហ្វូងៗ ហើយចុងភៅក៏ចិន អ្នកបើកឡានក៏ចិន សន្តិសុខក៏ចិន ដូចនេះខ្មែរមិនមានការងារអ្វីធ្វើឡើយ » ។
លោក ប៉ូ អ៊ាវគង់ នាយកគ្រប់គ្រងក្រុមហ៊ុនអចលនទ្រព្យ Advance បានមានប្រសាសន៍ផងដែរថា វាជាការពិតហើយដែលបច្ចុប្បន្ននេះ មានវត្តមានវិនិយោគចិននៅកម្ពុជាច្រើន។
លោកថា ៖« ដូចយើងបានដឹងកន្លងមកហើយពីរបាយការណ៍នានារបស់ស្ថាប័នរាជរដ្ឋាភិបាលកម្ពុជាយើង ពីចំនួនទឹកប្រាក់វិនិយោគនៅកម្ពុជា ហើយក៏បានបញ្ជាក់ផងដែរថា វិនិយោគិនចិនកំពុងឈរលំដាប់ទី១នៅកម្ពុជា ដែលមានគម្រោង និងកំពុងបណ្ដាក់ទុនច្រើនជាងគេ » ។
លោកបន្តថា កាលពីមុន កម្ពុជាបានជួបម្ដងហើយពីវត្តមានជនជាតិកូរ៉េនៅកម្ពុជា និងបានធ្វើឲ្យការវិនិយោគនានាត្រូវជួបប្រទះបញ្ហា ក៏ប៉ុន្តែកាលនោះមិនមែនតែកម្ពុជាទេ ដែលជួបបញ្ហានោះ ពីព្រោះវាជាវិបត្តិសេដ្ឋកិច្ចសកល ដូចនេះ មិនអាចបន្ទោសកូរ៉េបានឡើយ ។ ដោយឡែក សម្រាប់វត្តមានចិននាពេលបច្ចុប្បន្នវិញ យើងមានមោទនភាពដែលប្រទេសមហាអំណាចមកបណ្ដាក់ទុនរកស៊ីនៅស្រុកយើងកាន់តែច្រើន និងបង្ហាញថា កម្ពុជាមានអ្វីៗដែលធ្វើឲ្យគេចង់មករកស៊ី ។
បើតាមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឲ្យដឹងផងដែរថា បច្ចុប្បន្ននេះ គ្រាន់តែគម្រោងពីរបីនៅរាជធានីភ្នំពេញ ដែលគ្រប់គ្រងដោយចិន វាស្មើនឹងគម្រោងវិនិយោគជាច្រើនទៀតបាត់ទៅហើយ។ ជាក់ស្ដែង គម្រោងព្រីនផ្លាហ្សានៅផ្លូវនរោត្តម ជាដើម ជាគម្រោងធំណាស់សម្រាប់កម្ពុជា ។ ដោយឡែក មានអចលនទ្រព្យជាច្រើនទៀតដែលចិនកំពុងកាន់កាប់ ដូចជា អតីតសណ្ឋាគារអាំងទែកុងទីណង់តាល់ ដែលពីមុននៅក្រោមការគ្រប់គ្រងរបស់ក្រុមហ៊ុនថៃប៊ុនរ៉ុង, អគារភ្នំពេញថៅវើរ៍ និងគម្រោងធំៗជាច្រើនទៀតនៅរាជធានីភ្នំពេញ និងខេត្តព្រះសីហនុ ក៏ត្រូវបានគ្រប់គ្រងដោយវិនិយោគិនចិនដែរ ។
យោងតាមទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ ប្រទេសចិនឈរលំដាប់ទី១ ដែលវិនិយោគក្នុងវិស័យសំណង់នៅកម្ពុជាឆ្នាំ២០១៧ និងមានទឹកប្រាក់ជាង២.០០០លានដុល្លារអាមេរិក ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ បានមានប្រសាសន៍កន្លងមកថា ការវិនិយោគរបស់ចិននៅកម្ពុជាជារឿងប្រសើរណាស់ ព្រោះកម្ពុជាអត់ចិនក៏មិនបាន ដែលបច្ចុប្បន្នទាំងវិនិយោគិនចិន ទាំងជំនួយរវាងរដ្ឋាភិបាលនិងរដ្ឋាភិបាល បាននិងកំពុងកើនឡើង ប៉ុន្តែអ្វីៗក្នុងលោក ត្រូវតែមានតុល្យភាព ។
លោកបន្តថា ៖« កម្ពុជាគួររកទីបង្អែកដទៃទៀតក្រៅពីចិន ព្រោះបើយើងពឹងផ្អែកតែចិន នៅពេលចិនមានបញ្ហា យើងនឹងមានបញ្ហាផងដែរ។ ហេតុនេះ ការមានទំនាក់ទំនងល្អជាមួយសហគមន៍អឺរ៉ុប និងអាមេរិក ជារឿងល្អ »។លោកថា ៖« យើងគួរស្រឡាញ់ចិនមានកម្រិត ជាកម្រិតមួយដែលប្រជាជនអាចទទួលយកបានទាំងអស់គ្នា » ៕
ចែករំលែកព័តមាននេះ