តម្រូវការ​ជួល​អគារ​កម្រិត​B មាន​សន្ទុះ​ខ្លាំង ខណៈ​​អន្តរជាតិ​ងាក​ទៅ​កម្រិត​A


រាជធានី​ភ្នំពេញ ៖ តម្រូវការ​ជួល​អគារ​ពាណិជ្ជកម្ម​នៅ​កម្ពុជា បាន​បន្ដ​កើន​ឡើងជា​រៀង​រាល់​ឆ្នាំ ហើយ​ការ​ផ្គត់ផ្គង់​មាន​លក្ខណៈ​ខុស​គ្នា​ទៅ​តាម​ប្រភេទ​អគារ​នីមួយ​ៗ​ផង​ដែរ​។ ក្នុង​នោះ​គេ​បាន​ចែក​អគារ​ពាណិជ្ជកម្ម​ជា​៣​ប្រភេទ គឺ​ប្រភេទ​ខ្ពស់ (Grade A) អគារ​កម្រិត​បង្គួរ (Grade B) និង​ប្រភេទ​អគារ​មធ្យម (Grade C) ។

បច្ចុប្បន្ន​នេះ ការិយាល័យ​កម្រិត​A ភាគច្រើន គឺ​ខាង​ក្រុមហ៊ុន​អន្តរជាតិ​ជួល​ច្រើន​ជាងគេ បន្ទាប់​មក​កម្រិត​B តែបើ​និយាយ​ពី​ការ​កើនឡើង​ច្រើន​ជាងគេ គឺ​អគារ​កម្រិត​B កំពុង​មាន​សន្ទុះ​នៃ​ការ​ជួល ឬ​ទិញ​ច្រើន​ជាងគេ​ក្នុង​ចំណោម​២​ប្រភេទ​នៃ​អគារ​ពាណិជ្ជកម្ម ។

អ្នកជំនាញ​អចលនទ្រព្យ​លំដាប់​អន្តរជាតិ ដំបូង​គេ​នៅ​កម្ពុជា លោក វ៉ា វី​រៈ នាយក​ប្រតិ​បត្តិ​នៃ​ក្រុមហ៊ុន Century 21 Fortuna Investment បាន​ថ្លែងប្រាប់​កោះសន្តិភាព​តាម​ទូរស័ព្ទ​នៅ​ថ្ងៃ​ទី​២៣ មីនា ម្សិលមិញ​ថា ក្នុង​ចំណោម​ប្រភេទ​អគារ​ទាំង​៣​នេះ កម្រិត​B គឺ​កើនឡើង​ខ្លាំង​ជាងគេ ។ ឯ​តម្លៃ​វិញ​គួរសម​អាច​ទទួលយក​បាន ហើយ​ការ​គ្រប់គ្រង ឬ​ការ​បំពាក់​សម្ភារ ក៏​មិន​ខុស​ឆ្ងាយ​ពី​អគារ​កម្រិត​A​ប៉ុន្មាន​ដែរ ។

លោក​ថ្លែង​ដូច្នេះ​ថា ៖« អគារ ឬ​ការិយាល័យ​ប្រភេទ​B មាន​សន្ទុះ​ខ្លាំង​ជាងគេ​ក្នុង​រយៈ​ពេល​ប៉ុន្មាន​ឆ្នាំ​នេះ ដោយសារ​តម្លៃ​គួរសម​ដែល​អាច​ទទួលយក​បាន ហើយ​ការ​គ្រប់គ្រង ឬ​បំពាក់​សម្ភារ​មាន​ភាព​ប្រហាក់ប្រហែល​នឹង​កម្រិត​A​ដែរ ។ ដោយ​ក្នុង​១​ម៉ែត្រការ៉េ អាច​ថា​ត្រឹមតែ​២៥​ដុល្លារ​ឡើង​ទៅ​ប៉ុណ្ណោះ គឺ​យើង​អាច​ជួល​វា​បាន​១​ខែ » ។

ជា​ទូទៅ កម្រិត​សន្តិសុខ​សុវត្ថិភាព និង​ការ​បំពាក់​សម្ភារ​ការិយាល័យ គឺ​វា​មាន​លក្ខណៈ​ខុស​គ្នា​បន្តិចបន្តួច​រវាង​អគារ​កម្រិត​A និង​កម្រិត​B ។ ការ​បំពាក់​សម្ភារ គឺ​ត្រូវ​ទៅ​តាម​ស្តង់ដា​​​ការិយាល័យ ដូច​ជា ប្រព័ន្ធ​កាមេរ៉ា​សុវត្ថិភាព មិន​ថា​នៅ​តាម Office ឬ​តាម​ជណ្ដើរ​យន្ត និង​អាច​មាន​បំពាក់​រថយន្ដ​ពន្លត់​អគ្គិភ័យ​ផ្សេង​ៗ​ទៀត ហើយ​ប្រភេទ​C​ខ្លះ ក៏​មានការ​គ្រប់គ្រង​ដូច​ប្រភេទ​A និង​B​ដែរ ។

លោក​បន្ត​ថា ៖« តាម​ពិត​ទៅ អគារ​កម្រិត​A មាន​និន្នាការ​ច្រើន​ដែរ ដោយសារ​អន្តរជាតិ​ភាគច្រើន​ត្រូវការ​ប្រភេទ​នេះ​ច្រើន​ជាងគេ ។ ចំណែក​តម្លៃ​វិញ ក្នុង​១​ម៉ែត្រការ៉េ តម្លៃ​ចាប់​ពី​២៧​ដុល្លារ​អា​មេ​រិ​ក​ឡើង​ទៅ ក្នុង​១​ខែ ។ រីឯ ប្រភេទ​C​វិញ​មិនមែន​អត់​ទេ គ្រាន់តែ​ថា អ្នក​ជួល​ភាគច្រើន​ជា​ក្រុមហ៊ុន​តូច​ៗ ឯ​តម្លៃ​អាច​ថា​១៥​ដុល្លារ​ចុះ​ក្រោម » ។

លោក​បាន​បង្ហើប​ថា នៅ​រាជធានី​ភ្នំពេញ អគារ​កម្រិត​A មាន​ដូច​ជា អគារ​វឌ្ឍនៈ​Tower​មានការ​ជួល​ពី​អ្នក​វិនិយោគ​ច្រើន​ជាង​កាលពី​ឆ្នាំ​មុន​ៗ ។ ជាក់ស្តែង អគារ​កម្រិត​A នៅ​ឆ្នាំ​២០១៦ តម្រូវការ​ជួល​អគារ​ការិយាល័យ​ប្រភេទ​នេះ​ពី​អ្នក​វិនិយោគ​កើន​ខ្ពស់​រហូត​ដល់​៣០%​ឯណោះ ខណៈ​តម្រូវការ​ជួល​អគារ​កម្រិត​B និង C មាន​កំណើន​ប្រមាណ​ពី​១៥%​ទៅ​២០% ប៉ុណ្ណោះ ។

ពាក់ព័ន្ធ​ជាមួយនឹង​តម្លៃ លោក វ៉ា វី​រៈ​បញ្ជាក់​ថា យើង​មិន​អាច​កំណត់​តម្លៃ​ណាមួយ​បាន​ជាក់លាក់​ទេ ព្រោះ​ប្រភេទ​អគារ​ទាំងនោះ គឺ​អាស្រ័យ​ទៅ​លើ​គុណភាព​របស់​សំណង់​អគារ និង​ការ​បំពាក់​សម្ភារ តាំងពី​កញ្ចក់ ឥដ្ឋការ៉ូ កន្លែង​លាងដៃ បង្គន់ ឬ​ជណ្ដើរយន្ត ជាដើម​។ មួយទៀត​គឺ​ទីតាំង ព្រោះ​វា​ជា​ចំណែក​មួយ​ផ្សេង​ទៀត​ដែរ តែ​អ្វី​សំខាន់ គឺ​ការ​គ្រប់គ្រង​អគារ ព្រោះ​វា​ទាមទារ​ការ​ថែរក្សា​ដោយ​យកចិត្តទុកដាក់​ឲ្យ​បាន​ល្អ​បំផុត ទាំង​ការ​សម្អាត សន្តិសុខ សុវត្ថិភាព ជាមួយនឹង​ការ​មាន​ម៉ាស៊ីនភ្លើង​សម្រាប់​ជំនួយ ហើយ​ក៏​មិន​​មាន​កន្លែង​ស្ថាប័ន​ណាមួយ​វាយតម្លៃ​ថា អគារ​នេះ​ជា​ប្រភេទ​អ្វី​បាន​ទេ តែបើ​សណ្ឋា​គារ គឺ​មាន​ខាង​ក្រសួងទេសចរណ៍​ជា​អ្នក​កំណត់​ស្រាប់ ឯខាង​អចលនទ្រព្យ គឺ​មិន​មាន​ទេ ។ អីចឹង ការ​ហៅ​ប្រភេទ​នេះ ឬ​កម្រិត​នោះ វា​អាស្រ័យ​លើ​ម្ចាស់​អគារ​ជា​អ្នក​ហៅ​តែ​ប៉ុណ្ណោះ ដើម្បី​ងាយស្រួល​ចាំ និង​កំណត់​តម្លៃ​ទៅ​តាម​ប្រភេទ​របស់​វា​នីមួយ​ៗ ។

ប្រធាន​ជំនាញ​អចលនទ្រព្យ​អន្តរជាតិ​រូប​នេះ​បាន​បន្ថែម​ថា ចំពោះ​ការ​សាងសង់ វា​មិន​អាស្រ័យ​ទៅ​លើ​ប្រភេទ​ទេ គឺ​យើង​ត្រូវ​មើលទៅ​លើ​អតិថិជន​ថា គាត់​ចូល​ចិត្ត​បែប​ណា ? ហើយ​អាស្រ័យ​ទៅ​លើ​ថវិកា​របស់​ម្ចាស់​ក្រុមហ៊ុន​ដែរ​ថា គាត់​ចង់​សាងសង់​ប្រភេទ​ណា គួប​ផ្សំ​ជាមួយនឹង​ទីតាំង និង​បទ​ពិសោធន៍​ក្នុង​ការ​គ្រប់គ្រង​អគារ​របស់​គាត់ តែ​បើសិនជា​ថា គួរ​សាងសង់​មួយ​ណា វា​ពិបាក​ថា​ណាស់ ព្រោះ​ទីផ្សារ​ផ្សេង​ៗ​គ្នា ។ អីចឹង យើង​ត្រូវ​មើលទៅ​លើ​ទីផ្សារ​ច្រើន​ជាង មុន​នឹង​ចង់​សាងសង់​ប្រភេទ​ណាមួយ តែ​សុំ​ឲ្យ​ការ​គ្រប់​គ្រង មិន​ថា​សន្តិសុខ ឬ​ការ​បំពាក់​សម្ភារ​ការិយាល័យ សូម​ឲ្យ​ប្រហាក់ប្រហែល​គ្នា ព្រោះ​អ្នក​ណា​ក៏​ចង់បាន​ល្អ​ដែរ តែ​អ្នកខ្លះ​លុយ​វា​មិន​ដល់ តែបើ​បាន​មែន វា​ជា​មុខមាត់​របស់​ម្ចាស់​អគារ ឬ​ក្រុមហ៊ុន​ដែល​បាន​ជួល​ដែរ ។

គួរ​បញ្ជាក់​ផង​ដែរ​ថា កាលពី​ឆ្នាំ​២០១៧ ការ​វិនិយោគ​វិស័យ​សំណង់​បាន​កើនឡើង​ជាង​២២% ដែល​មាន​តម្លៃ​ទឹកប្រាក់​ប៉ាន់ស្មាន​ប្រមាណ​ជាង​៦.៤២៨​លាន​ដុល្លារ លើ​គម្រោង​៣.០៥២ ខណៈ​ឆ្នាំ​២០១៦ មាន​ត្រឹម​៥.២៥៦​លាន​ដុល្លារ​អា​មេ​រិ​ក​តែ​ប៉ុណ្ណោះ ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

កិច្ចការជំនួញ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ