ខេត្តបាត់ដំបង ៖ ក្រុមជនសង្ស័យដែលពាក់ព័ន្ធករណីកាច់សោរ.កលួចម៉ូតូ៣នាក់ នឹងត្រូវកសាងសំណុំរឿងបញ្ជូនទៅតុលាការ នៅរសៀលថ្ងៃទី២៥ មីនានេះ ក្រោយពីបញ្ចប់ការសួរនាំរបស់មន្ត្រីជំនាញ។ នេះបើតាមការផ្ដល់ព័ត៌មានពីលោក ឈឿង គឹមសុង…
ខេត្តបាត់ដំបង ៖ ក្រុមជនសង្ស័យដែលពាក់ព័ន្ធករណីកាច់សោរ.កលួចម៉ូតូ៣នាក់ នឹងត្រូវកសាងសំណុំរឿងបញ្ជូនទៅតុលាការ នៅរសៀលថ្ងៃទី២៥ មីនានេះ ក្រោយពីបញ្ចប់ការសួរនាំរបស់មន្ត្រីជំនាញ។ នេះបើតាមការផ្ដល់ព័ត៌មានពីលោក ឈឿង គឹមសុង នាយរងការិយាល័យព្រហ្មទណ្ឌកំរិតស្រាល។
លោកឈឿង គឹមសុង បានឲ្យដឹងថា ជនសង្ស័យទាំង៣នាក់នោះ ១-ឈ្មោះ ឡាំ សុភ័ក្រ អាយុ៣៥ឆ្នាំ ជាភ្នាក់ងារកាសែត វីវៈជ័យ ២-ឈ្មោះ ឡុង បូរី អាយុ៣៣ឆ្នាំ ជាបងបង្អូនបង្កើតរស់នៅភូមិត្រាងដូង ឃុំសំរោងក្រោម ស្រុកបន្ទាយមាស ខេត្តកំពត និង៣-ឈ្មោះ ភឹម ពៅ អាយុ៣៥ឆ្នាំ រស់នៅភូមិព្រៃពោន ឃុំព្រៃពោន ស្រុកកំពង់ត្របែក ខេត្តព្រៃវែង។
លោកបានបញ្ជាក់ថា ក្រុមរបស់លោកដែលដឹកនាំផ្ទាល់ដោយលោកឧត្តមសេនីយត្រី ជេត វណ្ណនី ស្នងការរងខេត្ត ក្រោមការបញ្ជាផ្ទាល់ពីលោកស្នងការខេត្ត និងតំណាងអយ្យការផង ស្ទាក់ចាប់ខ្លួនបាន កាលពីល្ងាចថ្ងៃទី២២ មីនា នៅលើផ្លូវជាត់លេខ៥ ត្រង់ចំណុចភូមិស្រះកែវ ឃុំកំពង់ព្រះ ស្រុកសង្កែ ពេលពួកគេកំពុងធ្វើដំណើរតាមដងផ្លូវឆ្ពោះមកកាន់ខេត្តបាត់ដំបង ដែលពាក់ព័ន្ធនឹងករណីកាច់សោរ.កលួចយកម៉ូតូដ៏កក្រើកនៅក្នុងក្រុងបាត់ដំបង និងតាមបណ្ដាស្រុកមួយចំនួននាពេលកន្លងមកនេះ។
សូមបញ្ជាក់ថា អំពើចោរកម្មហាក់កំពុងកម្រើកយ៉ាងខ្លាំងនៅក្នុងក្រុងបាត់ដំបង និងនៅតាមបណ្ដាស្រុកមួយចំនួនទៀត ក្នុងខេត្តបាត់ដំបង ក្នុងរយៈពេលប៉ុន្មានខែចុងក្រោយនេះ ដែលបង្កឲ្យមានក្ដីកង្វល់យ៉ាងខ្លាំងដល់ប្រជាពលរដ្ឋ មិនថានៅជនបទ ឬទីប្រជុំជនឡើយ ខណៈកម្លាំងសមត្ថកិច្ចស្ទើរតែបាត់បង់ម្ចាស់ការមិនអាចទប់ស្កាត់ ឬមិនអាចបង្ក្រាបបាន។ បទល្មើសដែលក្រុមចោរប្រព្រឹត្តិយ៉ាងសកម្មបំផុត ត្រូវគេសង្កេតឃើញថា ដូចជាចោរឆក់ ចោរគាស់ទម្លុះទម្លាយផ្ទះលួចទ្រព្យសម្បត្តិ និងចោរកាច់សោរ.កលួចយកម៉ូតូ៘ បទល្មើសទាំងនេះ ក្រុមចោរបានបង្កើនសកម្មភាពខ្លាំងបំផុត ជាពិសេសគឺនៅក្នុងក្រុងបាត់ដំបងតែម្ដង។
ចែករំលែកព័តមាននេះ