រាជធានីភ្នំពេញ ៖ នៅទីបំផុតការប្រកួតជម្រុះក្នុងវគ្គទី២ ទម្លាក់ពីជើងខ្លាំង១៦នាក់ យក៨នាក់ បានដំណើរការចប់សប្ដាហ៍ទី២ហើយ កាលពីថ្ងៃទី២៤ មីនា មុននេះ ដោយកីឡាករដែលឈ្នះក្នុងវគ្គ១៦នាក់ចំនួន៤រូបបានឡើងប្រកួតជម្រុះគ្នាបន្តទៀត។
យ៉ាងណាមិញ សម្រាប់កីឡាករបង្គោលក្រហម យុគ យក្សផ្លែ ត្រូវបានគេដឹងថា នឹងឱ្យឈ្នះតាំងពីមិនទាន់ឡើងរេញម៉្លេះ ដោយសារតែគូប្រកួតរបស់លោក គឺកីឡាករ នឹម នន បណ្ដោយខ្លួនឱ្យឡើងគីឡូខុសពីលក្ខន្តិកៈ ដែលអាចនិយាយបានថា ការប្រកួតដែលបានធ្វើឡើងគ្រាន់តែបង្គ្រប់កិច្ច។ អ៊ីចឹងហើយ ទើបកីឡាកររូបនេះ ឡើងអង្គុយកៅអី៤នាក់ក្នុងលេខរៀងទី៣ ឡើងស្រួល ដោយសារតែភាគីម្ខាងទៀត ដឹងខ្លួនជាមុនថា ត្រូវតែធ្លាក់ ហើយមិនសូវចង់ប្រកួត។
យោងតាមលទ្ធផលដែលបានស្ដែងឡើង កីឡាករវ័យក្មេងជើងខ្លាំង យុគ យក្សផ្លែ បានទម្លាក់គូប្រកួតឱ្យធ្លាក់ហាលអាវគួរឱ្យភ្ញាក់ផ្អើល នៅក្នុងរូបភាពបានឡើងដោយស្វ័យប្រវត្តិ បើទោះជាការប្រកួតបង្គ្រប់កិច្ចនៅក្នុងពេលនោះ កីឡាករបង្គោលខៀវ នឹម នន អាចវាយឱ្យគេសន្លប់ភីងលើរេញយ៉ាងណាក៏ដោយ។
គណៈកម្មការបានប្រកាសរួចជាស្រេចថា យុគ យក្សផ្លែ នឹងឈ្នះដោយមិនចាំបាច់ត្រួតពិនិត្យលទ្ធផល តែតម្រូវឱ្យអ្នកទាំងពីរនៅតែប្រកួតគ្នាដដែល ដើម្បីកុំឱ្យខូចម៉ោងដែលត្រូវដាក់ផ្សាយបន្តផ្ទាល់។ មានការបញ្ជាក់ថា កីឡាករ នឹម នន លើសគីឡូដែលបានកំណត់រហូតដល់ជិត៥គីឡូ ទើបកីឡាករ នឹម នន ត្រូវបានគណៈកម្មការប្រកាសមិនឱ្យឈ្នះទៅវគ្គបន្ត បើទោះជាគេអាចមានសមត្ថភាពធ្វើឱ្យ យុគ យក្សផ្លែ បរាជ័យ។
មានការកត់សម្គាល់ថា ការបរាជ័យរបស់ នឹម នន នៅក្នុងសប្ដាហ៍មុន គឺជាការបរាជ័យមួយដែលខុសប្លែកពីគេ ចាប់តាំងពីការប្រកួតមួយនេះត្រូវបានធ្វើឡើងនៅប៉ុស្ដិ៍លេខ៥ ប៉ុន្តែម្នាក់ៗក៏ស្ដាយកីឡាករ នឹម នន ផងដែរ ដែលគេគឺជាកីឡាករល្អ បែរជាបណ្ដោយខ្លួនឱ្យឡើងគីឡូលើសពីគីឡូ ៥៧ ដែលបានកំណត់ដោយក្រុមអ្នកបច្ចេកទេស។ ការប្រកួតមួយនេះ បើមិនមានការឡើងគីឡូពីភាគម្ខាងទៀត ដែលផ្ទុយពីការកំណត់ទេ គឺការប្រកួតនឹងល្អមើលយ៉ាងខ្លាំងជាក់ជាមិនខាន។
ចែករំលែកព័តមាននេះ