ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា មានឧប្បត្តិហេតុការណ៍គ្រោះថ្នាក់ចរាចរណ៍ដ៏រន្ធត់បានកើតឡើង ខណៈស្ត្រីម្នាក់បានបីកូនតូចឆ្លងថ្នល់ ស្រាប់តែរថយន្តមកយ៉ាងលឿនបុកស្លាប់ម្តាយ និងកូនតូចរងរបួសធ្ងន់ ហេតុការណ៍នេះកើតឡើងកាលពីវេលាម៉ោង០៣និង៣០នាទីរសៀល ថ្ងៃទី២៣ មីនា នៅលើកំណាត់ផ្លូវលំក្រាលកៅស៊ូមួយខ្សែ ស្ថិតក្នុងភូមិត្រកួន ឃុំក្លែង ស្រុកសណ្តាន់ ខេត្តកំពង់ធំ។
សមត្ថកិច្ចបានឲ្យដឹងថា ជនរងគ្រោះខាងលើឈ្មោះ ខាំ សុគីម ភេទស្រី អាយុ២៣ឆ្នាំ នៅភូមិ-ឃុំកើតហេតុខាងលើរងរបួសធ្ងន់ ហើយត្រូវបានស្លាប់ពេលបញ្ជូនទៅសង្គ្រោះនៅមណ្ឌលសុខភាពឃុំឈើទាល ចំណែកកូនតូចឈ្មោះ ជ្រិន ឌីណា ភេទប្រុស អាយុ២ឆ្នាំរបួសធ្ងន់ ។
សមត្ថកិច្ចបានបន្តទៀតថា ករណីគ្រោះថ្នាក់ចរាចរណ៍ខាងលើនេះ បង្កឡើងរវាងរថយន្តម៉ាក Hyundai ពណ៌សលាយក្រហម ពាក់ស្លាកលេខ ភ្នំពេញ 3A-9962 ហើយអ្នកបើកបរមិនស្គាល់អត្តសញ្ញាណទេ ព្រោះបានរត់គេចខ្លួនបាត់ បន្ទាប់ពីបុកស្ត្រីម្នាក់បានបីកូនរត់ឆ្លងកាត់ផ្លូវ ស្រាប់តែរថយន្តបើកបរក្នុងល្បឿនយ៉ាងលឿន មកបុក បណ្ដាលឲ្យម្តាយរងរបួសធ្ងន់ ហើយស្លាប់ពេលបញ្ជូនទៅសង្គ្រោះបន្ទាន់ ចំណែកកូនតូចរងរបួសធ្ងន់។ ក្រោយពេលកើតហេតុ សមត្ថកិច្ចជំនាញកំពុងចងក្រងសំណុំរឿង ដើម្បីចាត់ការតាមនីតិវិធីច្បាប់ ចំណែកវត្ថុតាងបានរក្សាទុកនៅអធិការដ្ឋាននគរបាលស្រុកសណ្តាន់៕
ចែករំលែកព័តមាននេះ