ខេត្តសៀមរាប ៖ ភ្លើងឆេះព្រៃនៅតំបន់ទំនប់អញ្ចាញ៣ ទីតាំងផ្សេងគ្នា ត្រូវបានគេលួចដុតអស់១៤ហិកតា ខណៈពេលនោះសមត្ថកិច្ចនៅមិនទាន់ចាប់បានជនល្មើសនៅឡើយទេ បង្កឱ្យមានការភ្ញាក់ផ្អើលពេញក្រុងសៀមរាប ។ ហេតុការឆេះព្រៃនេះបានកើតឡើងកាលពីវេលាម៉ោង១២និង០០នាទីរសៀល ថ្ងៃទី២៤ ខែមីនា ឆ្នាំ២០១៨ ដែលមាន៣ទីតាំងផ្សេងគ្នា ស្ថិតនៅក្នុងភូមិអញ្ចាញ សង្កាត់នគរធំ ក្រុងសៀមរាប ហើយរលត់ទៅវិញទាំងស្រុកនៅវេលាម៉ោង០២រសៀលថ្ងៃដដែរ ។
តាមសម្ដីរបស់លោកវរសេនីយ៍ឯក សេន សុវណ្ណនី នាយការិយាល័យនគរបាលបង្ការ ពន្លត់ អគ្គិភ័យ និងសង្គ្រោះ បានប្រាប់នៅកន្លែងកើតហេតុថា មូលហេតុដែលមានភ្លើងឆេះព្រៃនៅទីតាំង៣ផ្សេងគ្នានោះ គឺបណ្ដាលមកពីមានមនុស្សលួចដុត ហើយនាំគ្នារត់បានគេចខ្លួនបាត់តែម្តង ខណៈពេលដែលមន្ត្រីមូលដ្ឋាន និងបងប្អូនប្រជាពលរដ្ឋនាំគ្នាទៅជួយពន្លត់ កុំអីរាលដាលដល់ផ្ទះរបស់បងប្អូនមួយចំនួន ព្រោះអីនៅតំបន់នោះសុទ្ធតែមានផ្ទះទាំងអស់ ហើយជាតំបន់របស់អាជ្ញាធរអប្សរាកាន់កាប់ផង ។
លោកបានបញ្ជាក់ផងដែរថា ការចុះជួយពន្លត់នោះមានរថយន្តសរុបចំនួន៨គ្រឿង ក្នុងនោះរថយន្តពន្លត់អគ្គិភ័យរបស់ស្នងការនគរបាលខេត្ត មានចំនួន៦គ្រឿង ប្រើទឹកអស់៨រថយន្ត, រថយន្តពន្លត់អគ្គិភ័យរបស់កងរាជអាវុធហត្ថខេត្ត ចំនួន១គ្រឿង ប្រើទឹកអស់១រថយន្ត និងរថយន្តរបស់អាជ្ញាធរអប្សរា ចំនួន១គ្រឿង ប្រើទឹកអស់១រថយន្ត ទើបធ្វើឱ្យរលត់បាត់ទាំងស្រុង ប៉ុន្តែពុំមានរាលដាលដល់ផ្ទះប្រជាពលរដ្ឋដែលរស់នៅជិតនោះឡើយ ។
លោកបានបញ្ជាក់បន្ថែមថា ភ្លើងឆេះព្រៃចំនួន៣ទីតាំងផ្សេងគ្នានោះមាន ទីតាំងទី១.ឆេះព្រៃនៅពីខាងត្បូងទំនប់អញ្ចាញ ក្នុងក្រុមទី៤ និងក្រុមទី៦ ភូមិអញ្ចាញ សង្កាត់នគរធំ ក្រុងសៀមរាប អស់៨ហិកតា ទីតាំងទី២.ឆេះព្រៃ ចំការស្វាយ នៅពីខាងជើងជិតអង្គរអេច ក្នុងក្រុមទី៨ ភូមិអញ្ចាញ សង្កាត់នគរធំ ក្រុងសៀមរាប អស់៣ហិកតា និងទីតាំងទី៣.ក្នុងក្រុមទី៧ ភូមិអញ្ចាញ សង្កាត់នគរធំ ក្រុងសៀមរាប ឆេះអស់៣ហិកតា ។
សូមបញ្ជាក់ផងដែរថា អាជ្ញាធរសូមអំពាវនាវដល់បងប្អូនប្រជាពលរដ្ឋទាំងអស់មេត្តាចូលរួម ការពារទប់ស្កាត់រាល់ទង្វើររបស់ជនល្មើស ដែលបានលួចដុត ឬបំផ្លិចបំផ្លាញទ្រព្យសម្បត្តិរបស់បងប្អូននៅថ្ងៃណាមួយកើតឡើង សូមរាយការណ៍មកដល់សមត្ថកិច្ចមូលដ្ឋានរបស់យើងឱ្យបានទាន់ពេលវេលាផង ព្រមទាំងការពារភ្លើង ទៀន ធូប មុនពេល បងប្អូនចាកចេញពីផ្ទះ ក្រែងមានអគ្គិភ័យកើតឡើងដោយយថាហេតុ ដូចពាក្យចាស់តែងពោលើថា ស៊ូលិចទូកកណ្ដាលទន្លេ កុំឱ្យភ្លើងឆេះផ្ទះ បើឆេះផ្ទះ គឺអ្វីៗអស់ហើយ ៕
ចែករំលែកព័តមាននេះ