ខេត្តបាត់ដំបង ៖ ពិធីប្រកាសអគ្គលេខាធិការអាណត្តិទី៣ (ឆ្នាំ២០១៨-២០២២) របស់ប្រទេសថៃ បានធ្វើឡើងនៅសណ្ឋាគារឥណ្ឌូឆាយណា អរញ្ញប្រាថេត ខេត្តស្រះកែវ ប្រទេសថៃ វេលារសៀលថ្ងៃទី២៣ ខែមីនា ឆ្នាំ២០១៨ ដោយមានសមាសភាពពីគណកម្មការទីប្រឹក្សាពីអ្នកសារព័ត៌មានកម្ពុជាចំនួន២៥រូប បានទៅចូលរួម និងភាគីថៃចំនួន៦០រូប ក្នុងប្រទេសថៃ ហើយមានការចូលរួមពី លោក សុខ ភាព តំណាងក្រសួងការពារជាតិកម្ពុជា លោក គឹម រ័ត្ន អគ្គនាយករងនាយកដ្ឋានសោតទស្សន៍ ក្រសួងព័ត៌មាន ផងដែរ ។
ក្រោយពីមានមតិស្វាគមន៍ និងថ្លែងពីសកម្មភាពការងាររបស់សហព័ន្ធសារព័ត៌មានអាស៊ានដែលហៅកាត់ថា UMA ដោយ លោក ប្រូយ សម្បត្តិ អគ្គលេខាធិការរងប្រចាំប្រទេសថៃ រួចមក លោក សុខ សុវណ្ណ តំណាងខាងកម្ពុជា បានយកការប្រកាសគណៈកម្មការដែលបានធ្វើនៅខេត្តសៀមរាប ដើម្បីរួមគ្នាបន្តធ្វើឆ្ពោះទៅរកបណ្ដាអ្នកសារព័ត៌មានតាមបណ្ដាប្រទេសផ្សេងៗទៀត ។
ក្នុងនោះ លោក ឆក ឆៃ តំណាងវ៉េបសាយគេហទំព័ររបស់ប្រទេសថៃ បានត្រៀមជំរុញបន្ថែមអំពីប្រព័ន្ធផ្សព្វផ្សាយរបស់ UMA តែមួយ ដែលមានប្រទេសថៃ កម្ពុជា វៀតណាម ឡាវ និងភូមា កំពុងរួមគ្នានេះ ឆ្ពោះទៅកាន់ពិភពលោកបន្ថែមទៀត ។
លោក ប៊ុនឈួយ ស៊ីកែវ តំណាងខាងប្រទេសវៀតណាម បានថ្លែងថា ដោយឡែកប្រទេសឡាវ និងវៀតណាម បណ្ដាញព័ត៌មានមិនទាន់បានទូលំទូលាយដូចប្រទេសថៃ និងកម្ពុជាឡើយ ពីព្រោះតែគ្រប់បណ្ដាញទាំងអស់ស្ថិតនៅក្រោមការគ្រប់គ្រងរបស់រដ្ឋ ហើយលោកសង្ឃឹមថា កំពុងតែមានការកែប្រែជាលទ្ធផលល្អជាមួយប្រទេសជិតខាងយ៉ាងឆាប់បំផុតនាពេលខាងមុខនេះ ។
លោក ប្រាស៊ិត សែនរុងរឿង អគ្គលេខាធិការសហព័ន្ធប្រចាំប្រទេសថៃ ដែលទើបជាប់ជាប្រធានអាណត្តិទី៣នេះ (២០១៨-២០២២) បានបញ្ជាក់ពីគោលបំណងមូលហេតុ នៃការរួបរួមគ្នារវាងអ្នកកាសែតថៃជាមួយកម្ពុជា កន្លងមកនេះគឺចៀសវាងការផ្សព្វផ្សាយខុសគ្នាតាមទូរទស្សន៍នៃប្រទេសរៀងៗខ្លួន ដែលធ្លាប់មានការយល់ច្រឡំ បណ្ដាលកើតការស្អប់គ្នា ខឹងគ្នា ប្រកាន់ពូជសាសន៍ ព្រោះតែយើងមានសញ្ជាតិខុសគ្នា តែទឹកចិត្ត មនោសញ្ចេតនា ជីវភាព អាជីព វប្បធម៌យើងកំពុងមានដូចៗគ្នា ទើបយើងបានស្វែងរកជួបគ្នាកាលពីជិត២០ឆ្នាំមុននៅកម្ពុជា ហើយបានចាប់ផ្តើមជួបគ្នាលើកដំបូងដោយមានប្រធានសមាគមអ្នកសារព័ត៌មានចាស់ៗ រួមគ្នាពង្រឹង ផ្លាស់ប្តូរ វិស័យព័ត៌មានពីគ្នាទៅវិញទៅមករហូតមានដំណើរការដល់ថ្ងៃនេះ ក្នុងនោះក៏មានការជួយជ្រោមជ្រែង ពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងឥស្សរជនសំខាន់ៗជាច្រើនរូបទៀតផងដែរ ហើយក៏សូមឲ្យអ្នកបន្តវេណជំនាន់ក្រោយៗនេះខិតខំប្រឹងប្រែងរក្សាសាមគ្គីភាពឲ្យកាន់តែល្អប្រសើរបន្ថែមទៀត ។ បន្ទាប់មកកម្មវិធីបានចែកលិខិតទទួលស្គាល់ ជាគណកម្មការ ទីប្រឹក្សាសហព័ន្ឋផ្សព្វផ្សាយអាស៊ាននៅប្រទេសថៃ សម្រាប់ប្រើប្រាស់នាពេលអាណត្តិថ្មីនេះផងដែរ ៕
ចែករំលែកព័តមាននេះ