ខេត្តកំពង់ចាម ៖ សង្វៀនបញ្ជល់មាន់មួយកន្លែងនៅចុងភូមិកំពង់រលីង សង្កាត់សំបួរមាស ក្រុងកំពង់ចាម ដែលបានលួចបើកលេងដោយស្ងាត់ៗជាច្រើនថ្ងៃមកហើយ ដោយមានបង្កប់វង់អាប៉ោងបន្ថែមទៀតនោះ ត្រូវបានកម្លាំងសមត្ថកិច្ចចុះបង្ក្រាប ដែលបានធ្វើឡើងនៅវេលាម៉ោងជាង១រសៀល ថ្ងៃទី២៣ មីនា ២០១៨។ ក្នុងហេតុការណ៍នោះដែរ គេឃើញក្រុមអ្នកញៀនល្បែងបាននាំគ្នារត់គេចខ្លួនបាត់អស់ សមត្ថកិច្ចបានដុតបំផ្លាញចោលសង្វៀនបញ្ជល់មាន់ផងដែរ។
លោក វ៉ែន ចាន់វុធ អធិការរងនគរបាល ក្រុងកំពង់ចាម ទទួលផែនព្រហ្មទណ្ឌប្រាប់ឲ្យដឹងថា អនុវត្តន៍តាមការណែនាំរបស់លោកអធិការនគរបាល ក្រុងកំពង់ចាម ក៏ដូចជាលោកស្នងការនគរបាលខេត្ត បានឲ្យកម្លាំងរបស់លោកឧហ្សាហ៍ចុះល្បាត នៅតាមភូមិសាស្ត្រនានាតាមសង្កាត់ទាំង០៤ ដែលជាកន្លែងស្ងាត់ការពារក្រែងមានជនឆ្លៀតឱកាស ប្រព្រឹត្តនូវទង្វើអ្វីមួយមកលើពលរដ្ឋ។ លោកអធិការរងនគរបាលក្រុងកំពង់ចាម ប្រាប់បន្តថា ស្របពេលដែលកម្លាំងរបស់លោកបានចុះទៅ ដល់ត្រង់ចំណុចចុងភូមិកំពង់រលីង សង្កាត់សំបួរមាស ក៏ស្រាប់តែមានឃើញមនុស្សអ៊ូៗខុសប្លែកពីធម្មតា និងបានប្រញាប់នាំគ្នារត់គេចខ្លួនអស់។
លុះពេលដែលទៅជិតក៏ឃើញមានសង្វៀនមាន់ដែលបានលួចបង្កើតលេងដោយខុសច្បាប់នៅក្នុងព្រៃ ក្នុងពេលនោះសមត្ថកិច្ចបានប្រមូលវត្ថុតាងនានាដុតបំផ្លាញចោលតែម្តង ចំណែកម្ចាស់សង្វៀនពុំបាន ស្គាល់ឈ្មោះនឹងធ្វើការស្រាវជ្រាវបន្តទៀត។ ល្បែងស៊ីសងខាងលើនេះច្បាប់មិនអនុញ្ញាតឲ្យលេងទេ ការបង្ក្រាបសង្វៀនបញ្ជល់មាន់នេះស្របទៅតាមគោលនយោបាយភូមិឃុំមានសុវត្ថិភាពទាំង៩ចំណុច របស់ក្រសួងមហាផ្ទៃ៕
ចែករំលែកព័តមាននេះ