អារ៉ាប់រួម ៖ តាមប្រភពព័ត៌មាន Metro បានឲ្យដឹងថា តារាម៉ូដែលជនជាតិរុស្ស៊ីម្នាក់ បាក់ឆ្អឹងខ្នង បន្ទាប់ពីលោតពីអាគារសណ្ឋាគារឌូបៃជាន់ទី៦។ នាងលោតបែបនេះ ដោយសារតែមិនចង់ឲ្យបុរសអ្នកមានម្នាក់ចាប់រំលោភ ហើយសម្លាប់។
Ekaterina Stetsyuk អាយុ២២ឆ្នាំ បានប្រាប់មិត្តភក្តិរបស់នាងថា នាងមិនព្រមរួមភេទជាមួយនឹងបុរសម្នាក់ដែលកាន់កាំបិតគំរាមសម្លាប់នាង។ តែខាងបុរសចុងចោទបានប្រកែកថា នាងគឺជាស្ត្រីរកស៊ីផ្លូវភេទនៅឌូបៃ។ ដោយលឺបែបនេះ ម្តាយរបស់ Ekarerina បានលើកឡើងថា នាងមិនមែនជាស្រីរកស៊ីលក់ខ្លួននោះទេ។ នាងគឺជាតារាម៉ូដែលកាលពីនៅស្រុកកំណើត (Irkutsk ប្រទេសរុស្ស៊ី)។
Irina Grossman ដែលជាមិត្តភក្តិរបស់តារាម៉ូដែលបានប្រាប់ថា៖ «ដើម្បីឲ្យរួចជីវិត និងរក្សាកិត្តិយស នាងសុខចិត្តលោតពីជាន់ទី៦។ ឆ្អឹងខ្នងរបស់នាងបានបាក់ ហើយឆ្អឹងកងខ្នងជាច្រើនបែកខ្ទេច។ នាងមិនអាចដើរបាន សូម្បីតែកម្រើក។ តែគ្រូពេទ្យនៅតែមានក្តីសង្ឃឹម ព្រោះតែខួរឆ្អឹងខ្នងរបស់នាងមិនមានការប៉ះពាល់»។
បុរសជាចុងចោទត្រូវបានចាប់ខ្លួននៅព្រលានយន្តហោះឌូបៃ ខណៈពេលកំពុងចង់រត់គេចខ្លួន។ ប្រសិនបើគេរកឃើញថា បុរសម្នាក់នោះជាអ្នកប្រព្រឹត្តពិតមែន នោះពិតជាត្រូវជាប់ពន្ធនាគារ១៥ឆ្នាំ៕
ចែករំលែកព័តមាននេះ