រាជធានីភ្នំពេញ ៖ រាជរដ្ឋាភិបាលកម្ពុជាបានពង្រីកបណ្តាញចែកចាយអគ្គិសនីយ៉ាងលឿនក្នុងរយៈពេលកន្លងមកនេះ ។ ផ្អែកតាមប្រព័ន្ធម៉ែត្រសាស្ត្ររបស់អភិក្រមទ្វេគោល អត្រាមានអគ្គិសនីប្រើប្រាស់នៅក្នុងប្រទេសកម្ពុជាបង្ហាញឱ្យឃើញថា គ្រួសារចំនួន៧១,៥%នៃចំនួនសរុប មានលទ្ធភាពទទួលបានអគ្គិសនីពីបណ្តាញចែកចាយរបស់រដ្ឋ ។ នេះបើយោងតាមលទ្ធផលរបស់ការអង្កេត MTF ឆ្នាំ២០១៧ ដែលចេញផ្សាយដោយធនាគារពិភពលោក កាលពីថ្ងៃទី២២ មីនា ម្សិលមិញ ។
របាយការណ៍ដដែលបានលើកឡើងថា ក្នុងឆ្នាំ១៩៩៧ អត្រាមានអគ្គិសនីប្រើប្រាស់ពីបណ្តាញចែកចាយមេក្នុងប្រទេសកម្ពុជាមានតែ១៦,៤%ប៉ុណ្ណោះ ហើយផ្អែកតាមរបាយការណ៍ស្រាវជ្រាវសេដ្ឋកិច្ច-សង្គមរបស់កម្ពុជា អត្រានេះបានកើនជិតទ្វេដង រហូតដល់៣២,៥% ក្នុងឆ្នាំ២០១០ ។ របាយការណ៍ CSES ឆ្នាំ២០១៤បង្ហាញថា អត្រាទទួលបានអគ្គិសនីតាមប្រព័ន្ធបណ្តាញចែកចាយមេក្នុងប្រទេសកម្ពុជាមាន៥៨,២% ។ ទាំងទិន្នន័យរបស់ MTF និង CSES រួមគ្នាបង្ហាញថា អត្រាទទួលបានអគ្គិសនីតាមប្រព័ន្ធបណ្តាញមេក្នុងប្រទេសកម្ពុជាមានសន្ទុះកើនឡើងយ៉ាងឆាប់រហ័សក្នុងរយៈពេល២០ឆ្នាំចុងក្រោយនេះ ។
បើតាមរបាយការណ៍ ទោះបីអត្រាទទួលបានអគ្គិសនីប្រើប្រាស់នៅតាមបណ្តាញមេក្នុងប្រទេសកម្ពុជាមានសន្ទុះកើនឡើងក្តី តែនៅជួបបញ្ហាប្រឈម គឺពលរដ្ឋជាងពាក់កណ្តាលនៃលំនៅឋានដែលភ្ជាប់អគ្គិសនីជាមួយបណ្តាញចែកចាយរបស់រដ្ឋ រងការដាច់ចរន្តអគ្គិសនីជាញឹកញាប់ ។
របាយការណ៍បន្តថា បញ្ហាប្រឈមធំជាងគេ គឺភាពទុកចិត្តបាន (បញ្ហាដាច់ចរន្ត) និងគុណភាព (បញ្ហាតង់ស្យុងឡើងចុះ) នៃការផ្គត់ផ្គង់អគ្គិសនីតាមបណ្តាញចែកចាយរដ្ឋ ។ ជាងពាក់កណ្តាលនៃលំនៅឋានដែលភ្ជាប់អគ្គិសនីជាមួយបណ្តាញចែកចាយរបស់រដ្ឋ បានរងការដាច់ចរន្តអគ្គិសនីជាង១៤លើកក្នុង១សប្តាហ៍ (ជាមធ្យមប្រហែល៦នាទីក្នុង១លើក) ។ ហេតុដូច្នេះ ភាពរអាក់រអួលនេះ ជាឧបសគ្គធ្វើឱ្យលំនៅឋានទាំងនោះមិនអាចឈានទៅដល់លំដាប់ខ្ពស់ជាងបច្ចុប្បន្នបាន ។ ជាមួយគ្នានេះដែរ ៣៣%នៃអ្នកប្រើប្រាស់អគ្គិសនីតាមបណ្តាញចែកចាយរដ្ឋ និយាយថា ពួកគេឧស្សាហ៍ជួបប្រទះបញ្ហាតង់ស្យុងអគ្គិសនីឡើងចុះខ្លាំងណាស់ ។ ត្រង់នេះក៏ជាបញ្ហាមួយទៀតដែរ ដែលរារាំងគ្រួសារទាំងនេះមិនឱ្យឈានទៅដល់លំដាប់នៃលទ្ធភាពប្រើប្រាស់ខ្ពស់ជាងបច្ចុប្បន្នបាន ។
បញ្ហាប្រឈមធំបំផុត គឺការពង្រីកបណ្តាញចែកចាយអគ្គិសនីនៅតាមទីជនបទ ។ ជាង៩៧%នៃគ្រួសារក្នុងទីប្រជុំជនក្នុងប្រទេសកម្ពុជា ទទួលបានអគ្គិសនីពីបណ្តាញចែកចាយរដ្ឋ ប្រៀបនឹង៦៧%នៃគ្រួសារនៅទីជនបទ។ ហេតុដូច្នេះ គ្រួសារនៅទីជនបទច្រើនតែប្រមូលផ្តុំនៅក្នុងចំណាត់ថ្នាក់ទាបក្នុងលទ្ធភាពទទួលបានអគ្គិសនី គឺរវាងលំដាប់០ និងលំដាប់ទី២ ។ នៅក្នុងលំដាប់ទាំងពីរនេះមាន៤២%ជាគ្រួសាររស់នៅទីជនបទ និង៦%ជាគ្រួសាររស់នៅក្នុងទីប្រជុំជន ។
របាយការណ៍លើកឡើងថា ដើម្បីដោះស្រាយបញ្ហាដំណាក់កាលចុងក្រោយ ក្នុងលទ្ធភាពទទួលអគ្គិសនីនៅតាមតំបន់ទីប្រជុំជន រួមមាន លទ្ធភាពអាចជាវបានប្រហែលជាបញ្ហាធំបំផុតសម្រាប់គ្រួសារនៅទីប្រជុំជន ក្នុងការទទួលបានអគ្គិសនីពីបណ្តាញចែកចាយរដ្ឋ ។ អ្នកទាំងឡាយដែលមិនបានតភ្ជាប់បណ្តាញចែកចាយរដ្ឋនៅតាមទីប្រជុំជន មកពីគេគ្មានលទ្ធភាពបង់ថ្លៃសេវាភ្ជាប់បណ្តាញ ។ ដូច្នេះ កាលណាដោះស្រាយបាននូវបញ្ហានៃលទ្ធភាពជាវបានសម្រាប់បណ្តាគ្រួសារដែលមិនទាន់មានអគ្គិសនីប្រើប្រាស់ កម្ពុជាប្រហែលជាអាចឈានទៅសម្រេចការផ្គត់ផ្គង់អគ្គិសនីតាមបណ្តាញចែកចាយរដ្ឋដល់ទីប្រជុំជនបាន១០០% ៕
ចែករំលែកព័តមាននេះ