រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិក កម្ពុជា បានថ្លែងថា កម្ពុជាគ្រោងដាក់កីឡាអត្តសញ្ញាណខ្មែរចំនួន២ប្រភេទទៀត មាន…
រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិក
កម្ពុជា បានថ្លែងថា កម្ពុជាគ្រោងដាក់កីឡាអត្តសញ្ញាណខ្មែរចំនួន២ប្រភេទទៀត មាន
កីឡាអុកចត្រង្គ និងកីឡាចំបាប់ចូលក្នុងបញ្ជីសម្បត្តិបេតិកភណ្ឌអរូបីនៃមនុស្សជាតិ នៅ
អង្គការយូនីស្កូ ខណៈកីឡាគុនល្បុក្កតោត្រូវបានបញ្ជូនទៅចុះបញ្ជីរួចរាល់ដែលអាចដឹងលទ្ធផលនៅចុងឆ្នាំ២០១៨នេះ ។
លោក វ៉ាត់ ចំរើន បញ្ជាក់ថា ក្នុងមួយឆ្នាំអង្គការយូនីស្កូអនុញ្ញាតឲ្យតែមួយប្រភេទកីឡាប៉ុណ្ណោះចុះក្នុងបញ្ជីសម្បត្តិបេតិកភណ្ឌអរូបីនៃមនុស្សជាតិ ។ ដូច្នេះ គណៈកម្មាធិការ
ជាតិអូឡាំពិកកម្ពុជា កំពុងសហការជាមួយសហព័ន្ធកីឡាអុកចត្រង្គ រៀបចំចងក្រងឯក
សារដើម្បីដាក់បញ្ចូលឲ្យទាន់នៅឆ្នាំ២០១៩ ឬ២០២០ដើម្បីឲ្យការចុះបញ្ជីសម្រេចរួចរាល់មុនឆ្នាំ២០២៣ ។
សូមបញ្ជាក់ថា កីឡាក្បាច់គុនល្បុក្កតោកម្ពុជា បានចងក្រងឯកសារបញ្ជូនទៅអង្គការយូនីស្កូ ដើម្បីចុះបញ្ជីជាសម្បត្តិបេតិកភណ្ឌអរូបីនៃមនុស្សជាតិ ហើយសេចក្តីប្រកាសស្តីពីការចុះបញ្ជីផ្លូវការអាចនឹងធ្វើឡើងនៅចុងឆ្នាំ២០១៨ ឬដើមឆ្នាំ២០១៩ ។
ដោយឡែក កីឡាអុកចត្រង្គ និងកីឡាចំបាប់ គ្រោងចងក្រងឯកសារបញ្ជូនទៅអង្គការយូនីស្កូជាបន្តបន្ទាប់ ដើម្បីដាក់បញ្ចូលកីឡាទាំង២ប្រភេទនេះ ទៅក្នុងបញ្ជីសម្បត្តិបេតិកភណ្ឌអរូបីនៃមនុស្សជាតិ ឲ្យសម្រេចរួចរាល់មុនព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ពេលដែលកម្ពុជាធ្វើជាម្ចាស់ផ្ទះព្រឹត្តិការណ៍កីឡាដ៏ធំប្រចាំតំបន់អាស៊ីអាគ្នេយ៍មួយនេះ៕
ចែករំលែកព័តមាននេះ