រាជធានីភ្នំពេញ ៖ ក្រុមហ៊ុនមកពីប្រទេសចិនមួយបានប្រកាស់បោះទុនប្រមាណ២០លានដុល្លារ ដើម្បីដាំដើមធ្នង់យកខ្លឹមលើផ្ទៃដីចំនួន៥០០ហិកតានៅខេត្តពោធិ៍សាត់ ។
លោក លី មីងយ៉ាង នាយករងក្រុមហ៊ុនHarmany Shield International Finance Plc ដែលបានវិនិយោគនេះ បានឲ្យដឹងកាលពីថ្ងៃទី២០ មីនា នៅសាលសន្និសីទកោះពេជ្រ ថា តាមធម្មតាឈើធ្នង់ក្នុងរយៈពេលជាង៣០ឆ្នាំទើបប្រមូលផលបាន តែខាងក្រុមហ៊ុនមានអ្នកជំនាញ និងបច្ចេកទេសពិសេសខាងបង្កាត់ពូជឈើ ដោយដាំតែក្នុងរយៈពេល១០ទៅ១៥ឆ្នាំ នឹងទទួលបានផល ។ក្រោយប្រមូលផលបាន ក្រុមហ៊ុននឹងនាំចេញទៅក្រៅប្រទេស ។
លោកបានអះអាងថា ៖« នៅទីផ្សារប្រទេសចិន ខ្លឹមធ្នង់១តោនមានតម្លៃ១លានដុល្លារអាមេរិក ដែលខ្លឹមនេះគេយកទៅធ្វើអង្កាំ និងគ្រឿងលម្អមានតម្លៃផ្សេងៗ » ។ លោកថា ៖« ក្រុមហ៊ុនបានបណ្តាក់ទុនប្រមាណ២០លានដុល្លារអាមេរិក ដើម្បីដាំឈើធ្នង់យកខ្លឹមចំនួន៥០០ហិកតានៅខេត្តពោធិ៍សាត់ ។ សម្រាប់ដំណាក់កាលដំបូង យើងនឹងដាំចំនួន២០០ហិកតា ហើយនឹងពង្រីកជាបន្តបន្ទាប់ » ។
អភិបាលរាជធានីភ្នំពេញ លោក ងួន ផារ័ត្ន បានជំរុញ និងលើកទឹកចិត្តអ្នកវិនិយោគទុន ទាំងក្នុង និងក្រៅស្រុក ចូលរួមវិនិយោគដើម្បីអភិវឌ្ឍន៍ប្រទេសជាតិឲ្យកាន់តែប្រសើរឡើងថែមទៀត ។
លោក ងួន ផារ័ត្ន ថ្លែងថា ៖« បច្ចុប្បន្ន នៅក្នុងរាជធានីភ្នំពេញមានប្រជាពលរដ្ឋរស់នៅទាំងអចិន្ត្រៃយ៍ជាង២លាននាក់ ។ ចំនួននេះបានបង្ហាញឲ្យឃើញថា ជាចំនួនមួយច្រើន ប៉ុន្តែជីវភាពអ្នករស់នៅក្នុងរាជធានីភ្នំពេញមានភាពធូរធារ ដែលស្របតាមការអភិវឌ្ឍរបស់ប្រទេសផងដែរ » ។
លោកបញ្ជាក់ថា ៖« នៅក្នុងរាជធានីភ្នំពេញសព្វថ្ងៃនេះ មានរថយន្តធ្វើចរាចរណ៍ជាងកន្លះលានគ្រឿង និងម៉ូតូជាង១លានគ្រឿង ។ ដូច្នេះសបញ្ជាក់ថា ជីវភាពរស់នៅរបស់ប្រជាពលរដ្ឋ មានភាពកាន់តែប្រសើរឡើង ។ ម្យ៉ាងវិញទៀតសំណង់អគារខ្ពស់ៗនៅក្នុងរាជធានី ក៏រីកដុះដាលជាច្រើនកន្លែងដែរ ។ ដូច្នេះ ក្នុងនាមអភិបាលរាជធានីភ្នំពេញ ខ្ញុំសូមស្វាគមន៍ចំពោះរាល់ការវិនិយោគទាំងឡាយណាដែលមានបំណងធ្វើការវិនិយោគបន្ថែម ឬក៏វិនិយោគថ្មីនៅក្នុងទឹកដីរាជធានីភ្នំពេញយើង » ។
លោកបន្ថែមថា ក្នុងនាមជាអាជ្ញាធររាជធានីភ្នំពេញ ក្រៅពីការលើកទឹកចិត្តដល់អ្នកវិនិយោគទាំងក្នុងស្រុក និងបរទេស ពិសេសប្រទេសចិន យើងសូមជំរុញលើកទឹកចិត្ត និងការពារអ្នកវិនិយោគទាំងអស់ដែលអញ្ជើញមកវិនិយោគទុនស្របច្បាប់នៅរាជធានីភ្នំពេញ ៕
ចែករំលែកព័តមាននេះ