ខេត្តព្រះសីហនុ ៖ ក្រោមកម្ចីពីរដ្ឋាភិបាលជប៉ុន កម្ពុជាកំពុងសាងសង់កំពង់ផែទឹកជ្រៅមួយទៀតមានជម្រៅជាង១៤ម៉ែត្រ ដែលអនុញ្ញាតឲ្យនាវាដឹកទំនិញនៅក្នុងតំបន់ប្រហែល៩៣% ចូលចតដោយគ្មានឧបសគ្គ ។ បន្ទាប់ពីស្ថាបនារួច នឹងជួយឲ្យតម្លៃសេវាដឹកទំនិញតាមផ្លូវសមុទ្រថយចុះច្រើន និងបានចូលរួមជំរុញកំណើនសេដ្ឋកិច្ចបន្ថែមទៀត ។ នេះបើតាមប្រធានអគ្គនាយកកំពង់ផែស្វយ័តក្រុងព្រះសីហនុ ។
ថ្លែងនៅក្នុងពិធីបើកមហាសន្និបាតភាគហ៊ុនិកលើកទី១ របស់កំពង់ផែស្វយ័តក្រុងព្រះសីហនុ កាលពីថ្ងៃទី២១ មីនា កន្លងមក លោក លូ គឹមឈន់ ប្រតិភូរាជរដ្ឋាភិបាល ទទួលបន្ទុកប្រធានអគ្គនាយកកំពង់ផែស្វយ័តក្រុងព្រះសីហនុ មានប្រសាសន៍ឲ្យដឹងថា ក្នុងឆ្នាំ២០១៧ បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ បានកើនឡើង១៥% ជាកំណើនមួយខ្ពស់គួរឲ្យកត់សម្គាល់ ដែលស្ដែងឲ្យឃើញពីការគិតគូរជាបន្តបន្ទាប់ដូចជា ការបំពាក់នូវគ្រឿងចក្រលើកដាក់បន្ថែមទៀត ដើម្បីឲ្យការលើកដាក់បានឆាប់រហ័ស និងស្របតាមស្តង់ដាអន្តរជាតិ ។
ទោះបីជាយ៉ាងណា កំពង់ផែបច្ចុប្បន្ន មានជម្រៅទឹកត្រឹមតែ៩ម៉ែត្រ ដែលអនុញ្ញាតឲ្យនាវាក្នុងតំបន់ចូលចតប្រមាណជា២០%ប៉ុណ្ណោះ ។ ដូច្នេះហើយ ប្រមុខរាជរដ្ឋាភិបាលកម្ពុជាបានខ្ចីប្រាក់ពីរដ្ឋាភិបាលជប៉ុនចំនួន២០៩លានដុល្លារដើម្បីសាងសង់ផែថ្មីមួយជំហានទៀត ដោយរំពឹងថា នឹងអនុញ្ញាតឲ្យនាវាក្នុងតំបន់ប្រមាណជាង៩០%ចូលចត និងលើកដាក់ទំនិញបានយ៉ាងស្រួល ។
លោក លូ គឹមឈន់ ថ្លែងថា ៖« ក្រោយពីយើងសិក្សាគម្រោងបច្ចេកទេសលម្អិតគ្រប់បែបយ៉ាង និងសេដ្ឋកិច្ចនៅជំុវិញតំបន់ទាំងអស់ គឺយើងបានឯកភាពសាងសង់កំពង់ផែថ្មីមួយទៀតដែលមានជម្រៅទឹក១៤,៥០ម៉ែត្រ អាចអនុញ្ញាតឱ្យនាវាមានជម្រៅទឹក១៣,២០ម៉ែត្រ ចូលចតបាន ។ ដល់ពេលនោះ យើងលែងមានឧបសគ្គទៀតហើយ គឺនាវាក្នុងតំបន់ប្រហែល៩៣% អាចចូលចតនៅកំពង់ផែយើងបាន ហើយចំនួនកុងតឺន័រ ក៏នឹងឡើងដល់កម្រិតមួយដែលនាវាធំៗចូលបាន » ។
« នៅពេលយើងធ្វើកំពង់ផែនេះរួច កុងតឺន័ររបស់យើងនឹងឡើងដល់កម្រិតដែលនាវាធុនធំចូលចតបាន ធ្វើឲ្យថ្លៃដឹកជញ្ជូនតាមផ្លូវសមុទ្រថយចុះ ព្រោះសព្វថ្ងៃនេះ តម្លៃដឹកជញ្ជូនតាមផ្លូវសមុទ្រ វាថ្លៃជាងតម្លៃក្នុងប្រទេស ។ ឧទាហរណ៍ តម្លៃដឹកជញ្ជូនតាមសមុទ្រជាមធ្យមពី៥០០ឬ៦០០ដុល្លារ ក៏ប៉ុន្តែតម្លៃដឹកជញ្ជូនក្នុងស្រុកពីកំពង់ផែស្វយ័តក្រុងព្រះសីហនុទៅភ្នំពេញ តម្លៃតែ១៨០ដុល្លារប៉ុណ្ណោះ ។ ដូច្នេះ វាខុសគ្នាច្រើនណាស់ ។ បើតម្លៃដឹកជញ្ជូនតាមផ្លូវសមុទ្រចុះមកនៅត្រឹមតែ២០០ឬ៣០០ដុល្លារវិញនោះ នឹងធ្វើឲ្យសេដ្ឋកិច្ចជាតិយើង ពាណិជ្ជកម្មក្នុងស្រុកយើង មានលក្ខណៈកាន់តែប្រកួតប្រជែង ហើយមានកំណើនបន្ថែមទៀត » ។ នេះបើតាមការអះអាងរបស់លោក លូ គឹមឈន់ ។
លោកបញ្ជាក់ថា ៖« នៅឆ្នាំ២០២២ ការសាងសង់ផែរបស់យើងនឹងរួចរាល់ ហើយចំនួនកុងតឺន័រនឹងកើនឡើងប្រមាណលើសពី៧០០ពាន់កុងតឺន័រ នាវាធុនធំអាចចូលចតបានតាមលក្ខណៈស្តង់ដាគុណភាព ហើយតម្លៃដឹកជញ្ជូនតាមផ្លូវសមុទ្រ នឹងមានលក្ខណៈល្អដូចប្រទេសនៅជុំវិញយើង » ។
យោងតាមរបាយការណ៍ហិរញ្ញវត្ថុសម្រាប់រយៈពេល១២ខែ គិតត្រឹមថ្ងៃទី៣១ ខែធ្នូ ឆ្នាំ២០១៧ កំពង់ផែស្វយ័តក្រុងព្រះសីហនុ មានចំណូលសរុបចំនួន២២៧.៣៩៧.៨៣៥.០០០រៀល ស្មើប្រមាណជិត៥៧លានដុល្លារ កើនឡើង៨,៨១% បើធៀបនឹងរយៈពេលដូចគ្នាក្នុងឆ្នាំ២០១៦ ។ ប្រាក់ចំណេញសុទ្ធក្រោយបង់ពន្ធ មានចំនួន២៥.១៣៩.៣១៦.០០០រៀល ឬប្រមាណជាង៦លានដុល្លារ ថយចុះ៥,៩២% បើធៀបនឹងរយៈពេលដូចគ្នាក្នុងឆ្នាំ២០១៦ ។
គិតត្រឹមថ្ងៃទី៣១ ធ្នូ ឆ្នាំ២០១៧នេះដែរ ទ្រព្យសកម្មសរុបរបស់កំពង់ផែស្វយ័តក្រុងព្រះសីហនុ មានចំនួន១.២៨០.៥១០.០៣៨.០០០រៀល ឬស្មើនឹងជាង៣២០លានដុល្លារ កើនឡើង១៨,២៤% និងមូលធនសរុបមានចំនួន៦៤៦.៦១០.៥៥៤.០០០រៀល ស្មើប្រមាណជាង១៦១លានដុល្លារ កើនឡើង២០,៩៥%៕
ចែករំលែកព័តមាននេះ