រាជធានីភ្នំពេញ ៖ ដើម្បីលើកទឹកចិត្តដល់អតិថិជនដែលជាអ្នកលក់ស្រាបៀរផ្ទាល់នៅតាមបណ្ដាភោជនីយដ្ឋាន បៀរហ្គាដិន នានាទូទាំងប្រទេស ក្រុមហ៊ុន Cambrew Ltd ដែលជាក្រុមហ៊ុនផលិតស្រាបៀរអង្គរ និងស្រាបៀរនាំចូលជាច្រើនទៀត បានផ្ដល់ឱកាសដ៏អស្ចារ្យមួយដោយបានរៀបចំអោយមានការចាប់ឆ្នោតផ្សងរកអ្នកមានសំណាងទៅកម្សាន្តនៅទ្វីបអឺរ៉ុប ជាពិសេសទស្សនាផ្ទាល់នូវការប្រកួតបាល់ទាត់រវាងក្រុមហ៊ុន Dortmund និងក្រុម Hannover នៅពហុកីឡដ្ឋានទីក្រុង Dortmund ប្រទេសអាឡឺម៉ង់ ។
ដំណើរការកម្សាន្តដ៏អស្ចារ្យនេះ បានចាប់ផ្ដើមពីថ្ងៃទី១៥ មីនា ដោយចាកចេញពីប្រទេសកម្ពុជាឆ្ពោះទៅកាន់ទីក្រុង Dortmund ប្រទេសអាឡឺម៉ង់ ដោយមានអតិថិជនប្រមាណ៣០នាក់ សុទ្ធសឹងតែជាម្ចាស់ហាង ភោជនីយដ្ឋាន និងបៀរហ្គាដិន នៅភ្នំពេញ និងបណ្ដាខេត្តនានា ។
លោក អ៊ុង គីគុង នាយកផ្នែកលក់ប្រចាំក្រុមហ៊ុនផលិតស្រាបៀរ Cambrew បានមានប្រសាសន៍ថា នេះជាលើកទី១ សម្រាប់ក្រុមហ៊ុនដែលរៀបចំអោយមានដំណើរកម្សាន្តរបស់អតិថិជន ដែលបានលក់ដាច់ជាងគេនៅតាមបណ្ដាហាង ភោជនីយដ្ឋាន និងបៀរហ្កាដិននានា នៅរាជធានីភ្នំពេញ និងនៅតាមបណ្ដាខេត្ត ។
លោកបន្តថា ការជ្រើសរើសយកប្រទេសអាឡឺម៉ង់ សម្រាប់ដំណើរកម្សាន្តនេះ ដោយសារតែចង់អោយអតិថិជនអាចទទួលបាននូវបរិកាសដ៏ត្រជាក់ ដែលភាគច្រើនពួកគាត់មិនធ្លាប់បានជួប ។ អ្វីដែលពិសេសនោះ ក្រុមហ៊ុនចង់អោយអតិថិជនទទួលបានទស្សនីយភាពប្លែក ពីការទស្សនាបាល់ទាត់រវាងក្រុមល្បីៗនៅលើពិភពលោក ជាក់ស្ដែងក្រុមហ៊ុនបានរៀបចំអោយមានការទស្សនាបាល់ទាត់រវាងក្រុមហ៊ុន Dortmund និង Hannover 96 ដែលសុទ្ធសឹងតែក្រុមល្បីៗប្រចាំប្រទេសអាឡឺម៉ង់ នៅមានឈ្មោះល្បីនៅលើពិភពលោកផងដែរ ។ ការជ្រើសរើសយកប្រទេសអាឡឺម៉ង់ ជាទីកន្លែងកម្សាន្តសម្រាប់អតិថិជនរបស់ខ្លួននេះដែរ ដោយសារតែអាឡឺម៉ង់ មានឈ្មោះល្បីយូរហើយខាងស្រាបៀរ និងបាល់ទាត់ ។
លោកបន្ថែមថា នៅក្នុងដំណើរកម្សាន្តនេះដែរ ក្រុមហ៊ុនក៏បានរៀបចំអោយអតិថិជនបានទស្សនកិច្ចនូវក្នុងរោងចក្រផលិតស្រាបៀរដ៏ល្បីនៅក្នុងទីក្រុង Dortmund ប្រទេសអាឡឺម៉ង់ និងបានសាកល្បងរសជាតិស្រាបៀរនៅប្រទេសអាឡឺម៉ង់ផងដែរ ។ លោកបញ្ជាក់ផងដែរថា ដើម្បីលើកទឹកចិត្តនិងជំរុញអោយមានការលក់ផលិតផលស្រាបៀររបស់ក្រុមហ៊ុន Cambrew អោយបានកាន់តែច្រើនឡើងថែមទៀត នៅឆ្នាំក្រោយក្រុមហ៊ុននឹងរៀបចំដំណើរកម្សាន្តនេះបន្តទៀត និងស្វែងប្រទេសណាដែលល្បីៗ និង ដើម្បីអតិថិជនរបស់ខ្លួនទទួលបានអារម្មណ៍ប្លែកពីប្រទេសកម្ពុជា និងតំបន់ជុំវិញ ។
លោក ប៉ាន់ សុវណ្ណារឹទ្ធិ ម្ចាស់ហាង ស៊ុបពពែភ្នំពេញ៣ នៅខេត្តព្រះសីហនុ បានអោយដឹងថា នេះជាលើកដំបូងសម្រាប់លោកដែលបានមកកាន់ប្រទេសក្នុងទ្វីបអឺរ៉ុប ហើយក៏លើកទី១ដែរ ដែលទទួលបាននូវអាកាសត្រជាក់ក្រោមសូន្យអង្សារ ។ ដំណើរកម្សាន្តនេះ វាពិតជាអស្ចារ្យ ហើយក៏ទទួលបាននូវបទពិសោធន៍ល្អៗជាច្រើនផងដែរ ដូចជាការលេងបាល់ទាត់នៅពេលព្រិលកំពុងធ្លាក់នៅកណ្ដាលវាល និងការទស្សនាផ្ទាល់នូវការប្រកួតរវាងក្រុមបាល់ទាត់ល្បីៗ ដែលធ្លាប់តែទស្សនាតាមកញ្ចក់ទូរទស្សន៍ ។
គួរបញ្ជាក់ផងដែរថា ដំណើរកម្សាន្តដ៏អស្ចារ្យរបស់ក្រុមហ៊ុនផលិតស្រាបៀរ Cambrew បានត្រឡប់មកប្រទេសកម្ពុជាវិញដោយជោគជ័យ នៅរាត្រីថ្ងៃទី២១ មីនា ២០១៨ និងបាននាំយកនូវបទពិសោធន៍ អនុស្សាវរីយ៍ដ៏អស្ចារ្យពីប្រទេសទំនើប និងត្រជាក់មកចែករំលែកដល់បងប្អូនមិត្តភក្តិ នៅក្នុងប្រទេសកម្ពុជា៕
ចែករំលែកព័តមាននេះ