រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងកងរាជអាវុធហត្ថខណ្ឌច្បារអំពៅ ធ្វើការឃាត់ខ្លួននៅចំណុចខ្ទមស្លឹក ភូមិកោះនរា សង្កាត់និរោធ ខណ្ឌច្បារអំពៅ កាលពីវេលាម៉ោង១០និង៣០នាទីព្រឹក ថ្ងៃទី២៣ ខែមីនា ឆ្នាំ២០១៨ ពាក់ព័ន្ធនឹងការជួញដូរគ្រឿងញៀន ។ ជនសង្ស័យមានឈ្មោះ ង្វៀង យាំងហាយ ភេទប្រុស អាយុ១៨ឆ្នាំ ជាជនជាតិវៀតណាម មុខរបរមិនពិតប្រាកដ មានទីលំនៅភូមិកោះនរា សង្កាត់និរោធ ខណ្ឌច្បារអំពៅ ។
មន្ត្រីអាវុធហត្ថឲ្យដឹងថា បន្ទាប់ពីការជួញដួរថ្នាំញៀននៅចំណុចខាងលើរួចមក កម្លាំងអាវុធហត្ថបានចុះទៅស្រាវជ្រាវ និងតាមដានមករហូត ។ លុះកំណត់មុខសញ្ញាបានច្បាស់ ក៏ឈានទៅឃាត់ខ្លួនជនសង្ស័យបានជាក់ស្តែងតែម្តង ខណៈរូបគេត្រៀមចេញធ្វើសកម្មភាពចែកចាយនៅតាមភូមិ ។ ក្នុងការឃាត់ខ្លួន កម្លាំងអាវុធហត្ថដកហូតបានថ្នាំញៀនក្រាមសថ្លា ឬហៅថាម៉ាទឹកក១៤កញ្ចប់ ក្នុងនោះ២កញ្ចប់ធំល្មម, និងទូរស័ព្ទដៃអ៊ិនចុចពិល១គ្រឿង ។ បច្ចុប្បន្ន ជនសង្ស័យត្រូវបានបញ្ចូនខ្លួនទៅកាន់ការិយាល័យប្រឆាំងបទល្មើសគ្រឿងញៀន នៃទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីបន្តនីតិវិធី ៕
ចែករំលែកព័តមាននេះ