រាជធានីភ្នំពេញ ៖ ថ្មីៗនេះ រាជរដ្ឋាភិបាលបានឯកភាពលើការវិនិយោគសាងសង់រោងចក្រកែច្នៃដំឡូងមីរបស់ក្រុមហ៊ុន Green Leader Holdings Group Limited មកពីហុងកុង…
រាជធានីភ្នំពេញ ៖ ថ្មីៗនេះ រាជរដ្ឋាភិបាលបានឯកភាពលើការវិនិយោគសាងសង់រោងចក្រកែច្នៃដំឡូងមីរបស់ក្រុមហ៊ុន Green Leader Holdings Group Limited មកពីហុងកុង ដែលមានគម្រោងសាងសង់រោងចក្រកែច្នៃឲ្យបាន៥ទៅ១០រោងចក្រ ហើយរោងចក្រដំបូងបង្អស់នៅកម្ពុជា គឺស្ថិតនៅស្រុកស្នួល ខេត្តក្រចេះ ដែលគ្រោងសាងសង់នៅខែមេសាខាងមុខនេះ ។ នេះបើតាមមន្ត្រីខុទ្ទកាល័យរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ។
លោក ចាន់ ហេង នាយកខុទ្ទកាល័យរដ្ឋរូបនេះបានប្រាប់កោះសន្តិភាពតាមទូរស័ព្ទនៅថ្ងៃទី២២ មីនា ម្សិលមិញថា រោងចក្រកែច្នៃដំឡូងមីដំបូងគេបង្អស់របស់ប្រទេសចិននៅកម្ពុជា នឹងចុះបឋមសីលានៅថ្ងៃទី១ ខែមេសា ឆ្នាំ២០១៨ ខាងមុខនេះ ។
លោកថា ៖« ក្រុមហ៊ុនហ្គ្រីនលីតឌឺ (Cambodia ឯ.ក) ជាក្រុមហ៊ុនរបស់ប្រទេសចិនដែលគ្រោងនឹងបង្កើតរោងចក្រកែច្នៃដំឡូងមីនៅកម្ពុជាមានទាំងអស់ចំនួន១០កន្លែង ហើយកន្លែងដំបូងគេបង្អស់គឺស្ថិតនៅស្រុកស្នួល ខេត្តក្រចេះ ដែលខាងក្រុមហ៊ុនបានជូនរបាយការណ៍មកខាងក្រសួងកសិកម្មថា នឹងចុះបឋមសីលានៅថ្ងៃទី១ ខែមេសា ឆ្នាំ២០១៨ខាងមុខនេះ » ។
លោកបន្តថា រោងចក្រកែច្នៃដំឡូងមីនេះ គឺជាប្រភេទរោងចក្រកែច្នៃម្សៅមី ដែលមានសមត្ថភាពអាចផលិតបានចំនួន១០ម៉ឺនតោនក្នុង១ឆ្នាំ ហើយក្រុមហ៊ុននឹងបន្តការសាងសង់រោងចក្រនៅស្រុកតំបែរ ខេត្តត្បូងឃ្មុំ និងមានខេត្តផ្សេងៗទៀត ដែលមានសក្តានុពលខាងដំឡូងមី ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានប្រាប់កោះសន្តិភាពនៅថ្ងៃដដែលថា ផលិតផលកែច្នៃដំឡូងមីដែលមានចំនួន១០ម៉ឺនតោនក្នុង១ឆ្នាំនេះ គឺក្រុមហ៊ុនត្រូវការដំឡូងមីជាវត្ថុធាតុដើមចំនួន៥០ម៉ឺនតោន ដោយប្រើប្រាស់កិច្ចព្រមព្រៀងកសិកម្ម ។
គួររំលឹកផងដែរ កាលពីថ្ងៃទី១៣ ខែមីនា ឆ្នាំ២០១៨ លោក Michael Tse នាយកប្រតិបត្តិនៃក្រុមហ៊ុន Green Leader បានបញ្ជាក់ថា ដើម្បីអាចទទួលបានផលកែច្នៃក្នុងទ្រង់ទ្រាយដូចខាងលើ រោងចក្រចាំបាច់ត្រូវការដំឡូងមីជាវត្ថុធាតុដើមយ៉ាងតិច៥០ម៉ឺនតោនក្នុង១ឆ្នាំ ។
លោកបានបន្ថែមថា ក្រុមហ៊ុនក៏មានគម្រោងបង្កើតរោងចក្រចំនួន៥ ក្នុងរយៈពេល ២ឆ្នាំ ដោយរោងចក្រទី២ អាចនឹងសាងសង់នៅប៉ែកខាងខេត្តបាត់ដំបង ប៉ៃលិន និងបន្ទាយមានជ័យ ។
ដោយឡែក កាលពីថ្ងៃទី២០ ខែមីនា នៅទីស្តីការក្រសួង លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក៏បានលើកឡើងផងដែរ ពីការបង្កើតរោងចក្រកែច្នៃដំឡូងមីរបស់ហុងកុង នឹងអាចស្រូបយកវត្ថុធាតុដើមនេះ បានមួយភាគធំពីបណ្តាខេត្តដែលមានសក្តានុពលដាំដុះដំឡូងមី ដើម្បីធ្វើការកែច្នៃរួចនាំចេញ ។ លោករដ្ឋមន្ត្រីថ្លែងបែបនេះនៅក្នុងជំនួបពិភាក្សាការងារជាមួយលោកជំទាវ LADAWAN WONGSRIWONG អ្នកប្រឹក្សាយោបល់ថៃ ទាក់ទងនឹងដំណើរការនៃការនាំចេញវត្ថុធាតុដើមដំឡូងមី ។
កម្ពុជា គឺជាប្រទេសផលិតដំឡូងមីលំដាប់ទី៨លើពិភពលោក និងលំដាប់ទី៤នៅក្នុងតំបន់ ដែលមានផ្ទៃដីដាំដុះដំឡូងមីចំនួនប្រមាណជាង៦០០ពាន់ហិកតា និងទទួលបានទិន្នផលជាង១៤លានតោនក្នុងឆ្នាំ២០១៧ ។
ទីផ្សារនាំចេញផលិតផលដំឡូងមី ត្រូវបានពង្រីកពី៤ប្រទេស (ថៃ, វៀតណាម, ចិន, បារាំង) ក្នុងឆ្នាំ២០១៤ ទៅ១៦ប្រទេស ក្នុងឆ្នាំ២០១៦ រួមមាន ៖ កាណាដា, ចិន, អង់គ្លេស, ហ្វាំងឡង់, ឥណ្ឌា, អុីតាលី, កូរ៉េ, លីទុយអានី, ម៉ាឡេស៊ី, មីយ៉ាន់ម៉ា, ហូឡង់, នូវែលសេឡង់, កោះតៃវ៉ាន់, ថៃ, អាមេរិក និងវៀតណាម។ ចំណែកខេត្តដែលមានបរិមាណផលដំឡូងមីច្រើនជាងគេមាន ខេត្តបាត់ដំបង, បន្ទាយមានជ័យ, ប៉ៃលិន, ក្រចេះ, កំពង់ធំ, ត្បូងឃ្មុំ និងខេត្តឧត្តរមានជ័យ ៕
ចែករំលែកព័តមាននេះ