សហរដ្ឋអាមeរិក ៖ ដោយចាកចេញពីភាពស្ងៀមស្ងាត់ ថៅកែ FACEBOOK លោក MARK ZUCKERBERG ទីបំផុតនិយាយថា ខកចិត្តហើយទទួលស្គាល់ការខុសឆ្គងនានាក្រោយរយៈពេលច្រើនថ្ងៃនៃសង្គ្រាមប៉ាកាជុំវិញការប្រើប្រាស់បណ្តាទិន្នន័យបុគ្គលរបស់អ្នកប្រើប្រាស់ FACEBOOK ច្រើនលាននាក់ ដោយក្រុមហ៊ុនអង់គ្លេស CAMBRIDGE ANALYTICA ។
ក្នុងបទសម្ភាសន៍មួយនាយប់ថ្ងៃទី២១ មីនា ជាមួយទូរទស្សន៍ CNN លោក MARK ZUCKEBERG ថ្លែងថា រឿងនេះជាការបំពានលើសេចក្តីទុកចិត្តយ៉ាងធំមួយ ហើយខ្ញុំពិតជាមានការខកចិត្តដោយពិតប្រាកដចំពោះអ្វីដែលកើតមាន ។ ការទទួលខុសត្រូវរបស់យើងគឺធ្វើបែបណាកុំឱ្យរឿងបែបនេះកើតមានជាថ្មីទៀត ។
ទីបំផុតលោកបានសុំទោសដែលគេទន្ទឹងរង់ចាំខ្លាំង ។ លោកក៏គូសបញ្ជាក់ដែរថា លោកនឹងរីករាយមកធ្វើជាសាក្សីនៅមុខសភាអាមេរិក ។ ពេលរឿងអាស្រូវនោះផ្ទុះខ្ទ័រខ្ទារ លោក ZUCKERBERG បែរជាសំងំស្ងៀមរយៈពេលប៉ុន្មានថ្ងៃចុងក្រោយនេះ មុនពេលចេញពីភាពនៅស្ងៀមនាថ្ងៃទី២១ មីនា តាមរយៈទំព័រ FACEBOOK របស់លោក ។
លោកទទួលស្គាល់ការខុសឆ្គងនានា និងការទទួលខុសត្រូវរបស់លោកចំពោះ
អ្វីដែលកើតមាន តែនៅពុំទាន់សុំទោស ។ ជនលេខ២របស់ FACEBOOK លោក SHERYL SANDBERG បន្តិចក្រោយមកបានសម្តែងការសោកស្តាយ ។
FACEBOOK ជួបបញ្ហាក្រោយពីក្រុមហ៊ុន CAMMBRIDGE ANALYTICA ទទួលការចោទប្រកាន់ថា ចាប់យកទិន្នន័យរបស់អ្នកប្រើប្រាស់ចំនួន៥០លាននាក់ ដើម្បីរៀបចំ LOGICIEL មួយ ដែលអាចព្យាករណ៍ និងធ្វើឱ្យមានឥទ្ធិពលដល់អ្នកបោះឆ្នោត ដើម្បីធ្វើឱ្យមានទម្ងន់ក្នុងយុទ្ធនាការឃោសនាបោះឆ្នោតប្រធានាធិបតីរបស់លោកដូណាល់ ត្រាំ កាលពីឆ្នាំ២០១៦ ៕
ចែករំលែកព័តមាននេះ