ខេត្តបន្ទាយមានជ័យ ៖ អាជ្ញាធរក្រុងប៉ោយប៉ែតកម្ពុជា និងអាជ្ញាធរស្រុកអារញ្ញថៃនៅព្រឹកថ្ងៃទី២៣ ខែមិនា ឆ្នាំ២០១៨នេះ សហការណ៍គ្នា រៀបចំបោសសំអាតអនាម័យ ដើម្បីបរិស្ថានព្រំដែនច្រកទ្វារអន្តរជាតិនៃប្រទេសទាំង២ ។
ខាងកម្ពុជាដឹកនាំដោយលោកសាន ស៊ានហូ អភិបាលនៃគណៈអភិបាលក្រុងប៉ោយប៉ែតអមដោយមន្ត្រី សមត្ថកិច្ចជំនាញពាក់ព័ន្ធនៅក្រុងប៉ោយប៉ែត និងច្រកទ្វារ ហើយសិស្សានុសិស្សប្រមាណជាង២០០នាក់ ។ ខាងភាគីថៃដឹកនាំដោយអភិបាលស្រុកអារញ្ញ និងមន្ត្រីរាជការសមត្ថកិច្ចរបស់គេប្រមាណ១០០នាក់ដូចគ្នា ។
មុនពិធីបោសសំអាត និងរើសសំរាមនេះ ភាគីទាំង២ និងជួបសំណេះសំណាលចាប់ដៃគ្នាជាមិត្តភាពលើស្ពានព្រំដែនផងដែរ ។ បន្ទាប់មកភាគីទាំង២បោសសំអាតនៅបរិវេណព្រំដែន និងចុះរើសសំរាមក្រោមស្ពានព្រំដែន និងក្នុងអូរព្រំដែនផងដែរ ។ តាមជំនួបប្រជុំរវាងអាជ្ញាធរក្រុងប៉ោយប៉ែត និងស្រុកអារញ្ញានាពេលថ្មីៗ លើទឹកដីថៃភាគីទាំង២ផ្តោត សំខាន់លើបរិស្ថានជុំវិញបរិវេណច្រកទ្វារនៃប្រទេសទាំង២ ហើយភាគីកម្ពុជា និងផ្តោតសំខាន់មួយទៀត គឺបញ្ហាសណ្តាប់ធ្នាប់ពោល គឺលុបបំបាត់ជនអាណាថាសុំទាននៅច្រកទ្វារ និងលើស្ពានព្រំដែនមួយនេះតែម្តង ។
សមត្ថកិច្ចច្រកទ្វារអះអាងថា ពេលដេញពួកគេក្រោកចេញ ប៉ុន្តែពេលសមត្ថកិច្ចដើរចេញមកវិញ ពួកគេចូលទៅទៀតពិតជាពិបាក ។ បើទោះជាបែបណាករណីសុំទានលើស្ពានព្រំដែនកើតមានយ៉ាងអាណាធិបតេយ្យ តែសមត្ថកិច្ចចុះដេញមួយថ្ងៃ៤ទៅ៥ដង តែពួកគេមិនស្តាប់ ៕
ចែករំលែកព័តមាននេះ