រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា មានប្រសាសន៍បិទសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ របស់ក្រសួងមហាផ្ទៃ…
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា មានប្រសាសន៍បិទសន្និបាតបូកសរុបលទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ របស់ក្រសួងមហាផ្ទៃ នារសៀលថ្ងៃទី២២ ខែមីនា ឆ្នាំ២០១៨ នៅទីស្តីការក្រសួងមហាផ្ទៃថា ឆ្នាំ២០១៨នេះ ជាឆ្នាំទី៥ និងជាឆ្នាំចុងក្រោយនៃការអនុវត្តកម្មវិធីនយោបាយ និង យុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលនីតិកាលទី៥ នៃរដ្ឋសភា និងជាឆ្នាំដែលព្រះរាជាណាចក្រកម្ពុជា ត្រូវរៀបចំការបោះឆ្នោតជ្រើសតាំងតំណាងរាស្ត្រ សម្រាប់នីតិកាលទី៦ នៃរដ្ឋសភា។ ក្នុងសភាពការណ៍នេះ និងហេតុផលខាងលើនេះ ថ្នាក់ដឹកនាំ មន្ត្រីរាជការស៊ីវិល កងកម្លាំងនគរបាលជាតិ រដ្ឋបាលថ្នាក់ក្រោមជាតិ កងកម្លាំងមានសមត្ថកិច្ចទាំងអស់នៃក្រសួងមហាផ្ទៃ ត្រូវយកចិត្តទុកដាក់ខ្ពស់ លើកិច្ចការសំខាន់ៗជាអាទិភាពមួយចំនួនដូចខាងក្រោម ៖ ទី១-ត្រូវខិតខំបន្តការពារ និងពង្រឹងឲ្យបានគត់មត់នូវសុខសន្តិភាព អធិបតេយ្យជាតិ និងស្ថិរភាពនយោបាយ ដែលជាលក្ខខណ្ឌចម្បង និងចាំបាច់មិនអាចខ្វះបានសម្រាប់គាំទ្រដល់កិច្ចដំណើរការ នៃលទ្ធិប្រជាធិបតេយ្យសេរីពហុបក្ស និងការអភិវឌ្ឍន៍សេដ្ឋកិច្ចសង្គម ក៏ដូចធានា ជីវភាពរស់នៅប្រចាំថ្ងៃរបស់បងប្អូនប្រជាជនយើងនៅទូទាំងប្រទេស។
ទី២- ខិតខំរួមគ្នាធានាឲ្យបាននូវការបោះឆ្នោតជាតិលើកទី៦ ដែលនឹងប្រព្រឹត្តទៅនៅ ថ្ងៃទី២៩ ខែកក្កដា ឆ្នាំ២០១៨ខាងមុខនេះ ឲ្យដំណើរការប្រកបដោយលក្ខណៈសេរីត្រឹមត្រូវយុត្តិធម៌ និងមានសុវត្ថិភាពដោយត្រូវរួមគ្នាគាំទ្រ និងចូលរួមអនុវត្តកិច្ចការនានាស្របតាមច្បាប់បោះឆ្នោតតម្រូវ។ ព្រមទាំងផ្តល់នូវកិច្ចសហការគាំទ្រដល់គណៈកម្មាធិការជាតិរៀបចំការបោះឆ្នោត និងគណៈកម្មការរៀបចំការបោះឆ្នោតគ្រប់លំដាប់ថ្នាក់ ក្នុងការបំពេញការងាររបស់ខ្លួន ដោយលក្ខណៈឯករាជ្យ មិនលម្អៀងស្របតាមច្បាប់បទបញ្ជា និងនីតិវិធីនៃការបោះឆ្នោត។ ទី៣- ត្រូវបន្តលើកកំពស់ការរក្សាសន្តិសុខសណ្តាប់ធ្នាប់សាធារណៈក្នុងសង្គម សុខសុវត្ថិភាព ដោយខិតខំលើការពង្រឹងការងារដឹកនាំ និងការទទួលខុសត្រូវរបស់អគ្គស្នងការនគរបាលជាតិនិងគណៈបញ្ជាការឯកភាពគ្រប់ថ្នាក់ក្នុងការពង្រឹងវិធានការជំនាញ ពង្រឹងវិន័យ ជំនាញ វិជ្ជាជីវៈ និងក្រមសីធម៌ដល់កងកម្លាំងនគរបាលជាតិពិសេសកងកម្លាំងនគរបាលដែលបំពេញការងារផ្ទាល់ជាមួយប្រជាជនក្នុងការងារអនុវត្តគោលមយោបាយភូមិ/ឃុំមានសុវត្ថិភាព។ ទី៤- ពាក់ព័ន្ធបទល្មើសគ្រឿងញៀនខុសច្បាប់ នៅតែជាបញ្ហាប្រឈមក្នុងពេលចំពោះមុខ និងរយៈពេលវែងក្នុងសង្គមដោយសារនិ្ននាការផលិត ចរាចរណ៍ ចែកចាយគ្រឿងញៀនក្នុងតំបន់ និងពិភពលោកហាក់មិនមានសញ្ញាថមថយនោះឡើយ។
ដើម្បីដោះស្រាយបញ្ហានេះអាជ្ញាធរជាតិប្រយុទ្ធប្រឆាំងគ្រឿងញៀនត្រូវដឹកនាំសហការសម្របសម្រួលជាមួយក្រសួងស្ថាប័ន និងអាជ្ញាធរគ្រប់លំដាប់ថ្នាក់ និងអ្នកពាក់ព័ន្ធនានាអនុវត្តកម្មភាពប្រយុទ្ធប្រឆាំងគ្រឿញៀនឲ្យខ្លាំងក្លា រស់រវើកស្របតាមការវិវត្តប្រែប្រួលនៃការផលិត ការជួញដូរ ចែកចាយ ការប្រើប្រាស់គ្រឿងញៀន។ ទី៥- គ្រោះថ្នាក់នានាក្នុងសង្គមកំពុងបង្កឲ្យមានការប៉ះពាល់ដល់ងាយុជីវិតប្រជាជនកាន់តែច្រើនឡើងៗពិសេសគ្រោះថ្នាក់ចរាចរណ៍ និងអគ្គីភ័យ។ ក្នុងន័យនេះត្រូវលើកកម្ពស់ការផ្សព្វផ្សាយអប់រំ ច្បាប់ស្តីពីចរាចរណ៍ជើងគោក និងពង្រឹងជាប់ជាប្រចាំនូវការអនុវត្តច្បាប់។ ទន្ទឹមនេះ ត្រូវរៀបចំផែនការមេ ស្តីពីចរាចរណ៍ និងការដឹកជញ្ជូននៅតាមទីក្រុងទីប្រជុំជនដោយផ្សារភ្ជាប់ជាប្រព័ន្ធ នូវការរអភិវឌ្ឍន៍ ហេដ្ឋារចនាសម្ព័ន្ធទីក្រុង ទីប្រជុំជន រៀបចំសណ្តាប់ធ្នាប់របៀបរៀបរយតាមដងផ្លូវសាធារណៈ ការចតយានយន្ត ស្លាកសញ្ញាចរាចរណ៍។ ចំពោះបញ្ហាអគ្គីភ័យត្រូវបន្តខិតខំពង្រឹងការចូលរួម របស់ប្រជាជន ម្ចាស់លំនៅដ្ឋាន ម្ចាស់អាជីវកម្ម អគារសំណង់នានាឲ្យចូលរួមក្នុងការបង្ការពន្លត់អគ្គីភ័យ ប្រកបដោយស្មារតីម្ចាស់ការប្រុងប្រយ័ត្នខ្ពស់បំផុត និងត្រូវធានាប្រសិទ្ធភាពឧបករណ៍ពន្លត់អគ្គីភ័យ។
ទី៦-ចំពោះការអនុវត្តការកែទម្រង់វិមជ្ឈការ និងវិសហមជ្ឈការ ខ្ញុំសូមស្នើគណៈកម្មាធិការជាតិ សម្រាប់ការអភិវឌ្ឍន៍ តាមបែបប្រជាធិបតេយ្យនៅថ្នាក់ក្រោមជាតិក៏ដូចក្រសួងមហាផ្ទៃ និងក្រសួងស្ថាប័នពាក់ព័ន្ធមួយចំនួនទៀត ធ្វើការពន្លឿនថែមទៀតនូវការផ្ទេរមុខងារ និងធនធានឲ្យបានសមស្រប ឲ្យទៅរដ្ឋបាលថ្នាក់ក្រោមជាតិ ដើម្បីរដ្ឋបាលថ្នាក់ក្រោមជាតិមានសិទ្ធអំណាចមុខងារ និងធនធាន សមស្រប ក្នុងការលើកកំពស់ប្រសិទ្ធភាព គណនេយ្យភាពចំពោះប្រជាជនឆ្លើយតបទៅនឹងសេចក្តីត្រូវការក៏ដូចបម្រើសេវាសាធារណៈជូនប្រជាជន និងអភិវឌ្ឍន៍នៅមូលដ្ឋាន។ ទី ៧-ត្រូវខិតខំលើកកម្ពស់ ការបម្រើសេវាសាធារណៈ និងការដោះស្រាយបញ្ហាប្រឈមនានាជូនប្រជាជន ឲ្យកាន់តែមានប្រសិទ្ធភាព ខ្ពស់ សមធម៌ និង ត្រូវខិតខំកែលម្អ អាកប្បកិរិយា សីលធម៌ ឥរិយាបទរបស់មន្ត្រី អាជ្ញាធរ នៅមូលដ្ឋាន ក្នុងការប្រាស្រ័យទាក់ទង និងការផ្តល់សេវារដ្ឋបាលនានាជូនប្រជាជនដោយមិនមានការរើសអើង ពិសេសអត្តសញ្ញាណប័ណ្ណសញ្ជាតិខ្មែរ សំបុត្រអត្រានុកូលដ្ឋាន សៀវភៅគ្រួសារ និងសៀវភៅស្នាក់នៅព្រមតាំងលិខិតស្នាមផ្សេងៗទៀតដែលពាក់ព័ន្ធជីវភាពប្រចាំថ្ងៃរបស់ប្រជាជន។
សម្តេចតេជោបានគូសបញ្ជាក់ថា ជារួមមុនអ្វីទាំងអស់ យើងត្រូវតម្កល់សន្តិភាពជាធម៌។សន្តិភាពពេញលេញដែលយើងកំពុងមាននៅទូទាំងប្រទេសនាពេលបច្ចុប្បន្ននេះបានមកដោយចំណាយពេលវេលាដ៏យូរ ព្រមជាមួយការតស៊ូព្យាយាម និងការលះបង់សាច់ស្រស់ ឈាមស្រស់ របស់យុទ្ធជន និងអ្នកស្នេហាជាតិរបស់យើងជាច្រើនរូប។ បើគ្មានសន្តិភាពទេ ការអភិវឌ្ឍន៍ក៏គ្មានដែរ។ ដូច្នេះយើងទាំងអស់គ្នា ត្រូវខិតខំទប់ស្កាត់ និងបង្ក្រាបឲ្យបាននូវ រាល់សកម្មភាពខុសច្បាប់ទាំងឡាយណាដែលប៉ុនប៉ងធ្វើឲ្យសន្តិភាពនៅកម្ពុជាបាត់បង់ នឹងត្រូវរួមកម្លាំងគ្នាជាធ្លុងមួយ ដើម្បីបន្តអភិវឌ្ឍន៍សេដ្ឋកិច្ចជាតិឲ្យមានកំណើនប្រកបដោយចីរភាព ក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានប្រាក់ចំណូលខ្ពស់ក្នុងឆ្នាំ២០៥០៕
ចែករំលែកព័តមាននេះ