ខេត្តកំពង់ចាម ៖ ភ្លើងស្តុបដាក់នៅត្រង់កែងសាលាដំបូងខេត្ត ស្ថិតនៅក្នុងសង្កាត់កំពង់ចាម ក្រុងកំពង់ចាមត្រូវបានគេមើលឃើញថា បានដាច់ភ្លើងមិនដំណើរការជាច្រើនថ្ងៃមកហើយ ។ ជាមួយនោះក៏មានប្រជាពលរដ្ឋមួយចំនួនហាក់បីដូចជា មិនគោរពច្បាប់ចរាចរណ៏ដោយជិះម៉ូតូមិនបានពាក់មួកសុវត្ថិភាពនោះទេ ដែលច្បាប់បានតម្រូវឲ្យពាក់មួក និងដាក់កញ្ចក់សម្រាប់មើលក្រោយផងដែរ ។
លោកវរសេនីយ៍ត្រី ស៊ាម យូសេង អធិការរងនគរបាលក្រុងកំពង់ចាមទទួលផែនសណ្តាប់ធ្នាប់ប្រាប់
ឲ្យដឹងនៅរសៀលថ្ងៃទី២២ ខែមីនា ឆ្នាំ២០១៨ ថា ទីតាំងភ្លើងស្តុបខាងលើនេះ ត្រូវបានលោកនាយការិយាល័យនគរបាលចរាចរណ៍ផ្លូវគោកខេត្តបានរាយការណ៍មកលោកឧត្តមសេនីយ៍ទោ ឯម កុសល
ស្នងការនគរបាលខេត្ត ដើម្បីជូនដំណឹងទៅលោកប្រធានមន្ទីរសាធារណៈការ និងដឹកជញ្ជូនខេត្ត ដើម្បីមានវិធានការជួសជុលបន្ទាន់ ងាយស្រួលដល់ប្រជាពលរដ្ឋ មើលបើកឆ្លងកាត់ផ្លូវបំបែកជាបួន ។
លោកអធិការរងនគរបាលក្រុងកំពង់ចាម ទទួលផែនសណ្តាប់ធ្នាប់ប្រាប់បន្តថា ប្រជាពលរដ្ឋមួយចំនួន
ដែលជិះម៉ូតូមិនពាក់មួកសុវត្ថិភាព និងមិនដាក់កញ្ចក់ សម្រាប់មើលក្រោយនោះ គឺពួកគាត់បានប្រព្រឹត្តនូវទង្វើខុសច្បាប់ ប៉ុន្មានថ្ងៃនេះ ដោយសារតែមានកិច្ចការរវល់ច្រើន មិនបានចុះផាកពិន័យ ។ មួយវិញទៀតអ្នកដែលមានមួកសុវត្ថិភាពហើយ មិនពាក់ លុះពេលដែលជិះមកជិតដល់ ឫពេលឃើញសមត្ថកិច្ចក៏បានទាញមួកមកពាក់ លុះពេលជិះទៅផុតរាងឆ្ងាយដោះមួកចេញមានន័យថា គាត់មិនគោរពច្បាប់ ។
លោកសុខ ស្រ៊ុន ប្រធានមន្ទីរសាធារណៈការ និងដឹកជញ្ជូនខេត្តវិញ ប្រាប់ឲ្យដឹងដែរថា ក្នុងរដូវប្រាំង
នេះនាពេលកន្លងមកភ្លៀងបានបង្អុរធ្លាក់ចុះមកលើក្រុងកំពង់ចាម ក៏ស្រាប់មានផ្គររន្ទះបានបាញ់ជា
ហេតុធ្វើឲ្យឆ្លងចរន្តឆេះប្រអប់បូតនៅក្នុងទូរទើបភ្លើងស្តុបមិនដំណើរការ ។ ជាមួយនោះរូបលោកបាន
ទាក់ទងអ្នកបច្ចេកទេសខាងអគ្គិសនីម្នាក់ ដើម្បីទៅទិញសម្ភារពីបរទេសមកបំពាក់ឡើងវិញ ក្នុងរយៈ
ពេលយ៉ាងយូរ៣ថ្ងៃទៀត នឹងបានជួសជុលរួចរាល់ ហើយភ្លើងអគ្គិសនីភ្លើងស្តុប នៅកែងនឹងសាលាដំបូងខេត្ត និងដំណើរការប្រសើរឡើងវិញហើយ ៕
ចែករំលែកព័តមាននេះ