រាជធានីភ្នំពេញ ៖ បច្ចុប្បន្នអ្នកសិល្បៈ ល្បីៗមួយចំនួនបាន និងកំពុងតែញាំញីដោយសារជំងឺ និងជរា ហើយបាត់បង់សមត្ថភាពសម្តែងទាំងស្រុង ។ ពួកគាត់ទាំងនោះធ្លាប់បានធ្វើទស្សនិកជនសប្បាយរីករាយ ។…
រាជធានីភ្នំពេញ ៖ បច្ចុប្បន្នអ្នកសិល្បៈ ល្បីៗមួយចំនួនបាន និងកំពុងតែញាំញីដោយសារជំងឺ និងជរា ហើយបាត់បង់សមត្ថភាពសម្តែងទាំងស្រុង ។ ពួកគាត់ទាំងនោះធ្លាប់បានធ្វើទស្សនិកជនសប្បាយរីករាយ ។ ដ្បិតមិនអាចឈរជើងសម្តែងបានក៏ពិតមែន ប៉ុន្តែអ្នកសិល្បៈទាំងអស់នោះត្រូវបានការយកចិត្តទុកដាក់ពីប្រមុខរាជរដ្ឋាភិបាលកម្ពុជា ក៏ដូចជាសមាគមសិល្បៈនានាផងដែរ ។
ជាតារាកំប្លែងដែលសម្តែងក្នុងវិស័យសិល្បៈមិនតិចឆ្នាំនោះតាប៉ិគក់បាន និងកំពុងញាំញីដោយជំងឺ ផ្សេងៗជាមួយនឹងភាពចាស់ជរា ហើយគាត់បានបាត់បង់សមត្ថភាពសម្តែងទាំងស្រុងជិត១០ឆ្នាំមកហើយ ។
លោកស៊ុយ ចាន់ ហៅតាប៉ិកគក់ មានអាយុជាង៧០ឆ្នាំ និងធ្លាក់ខ្លួនឈឺដុះសាច់ក្នុងតម្រងនោម និងឆ្អឹងខ្នង ជំងឺទាំងនេះបានរុញច្រានតារាកំប្លែករូបនេះឲ្យឃ្លាតឆ្ងាយទាំងស្រុងពីវិស័យសិល្បៈ ។
លោកតាប៉ិគួកចូលបម្រើវិស័យសិល្បៈតាំងពីទសវត្សឆ្នាំ៦០ និងមានឈ្មោះបោះសំឡេងគ្រាន់បើដែរ បើប្រៀបធៀបនឹងតារាកំប្លែងជើងចាស់ដទៃទៀត ហើយបច្ចុប្បន្នតារាកំប្លែងរូបនេះជួបការលំបាកផ្នែកជីវភាព ខណៈកំពុងធ្លាក់ខ្លួនឈឺ និងត្រូវការប្រាក់សម្រាប់ព្យាបាល ។
តារាកំប្លែងនាយវីមីនសេ បាន និងកំពុងតែញាំញីដោយសារជំងឺដំបៅក្រពះ ដុះសាច់ក្នុងថ្លើម បន្ថែមពីលើជំងឺទឹកនោមផ្អែម និងលើសឈាមដែលកើតរ៉ាំរ៉ៃជាយូរមកហើយនោះ។
ដោយសារតែជំងឺកាន់តែវិវឌ្ឍកាន់តែធ្ងន់បានធ្វើឲ្យតារាកំប្លែងដែលតែងតែធ្វើឲ្យគេផ្ទុះសំណើចរូបនេះបានចាកចេញស្ទើរទាំងស្រុងពីការសម្តែង ដោយតម្រូវឲ្យស្នាក់នៅព្យាបាលជំងឺក្នុងរយៈពេលយូរ ។ យ៉ាងណាក៏ដោយតារាកំប្លែងនាយវីតាមីនសេ ទំនងជានឹងមិនអាចវិលមកការសម្តែងវិញឡើយ បើទោះបីជាលោកអាចស្បើយពីជំងឺវិញយ៉ាងណាក៏ដោយ ខណៈពេលដែលសុខភាព និងរាងកាយរបស់គាត់កាន់តែទ្រុឌទ្រោម។
តារាកំប្លែង និងអ្នកចម្រៀងអាយ៉ៃសង់ស៊ីសបានធ្លាក់ខ្លួនឈឺដោយសារតែជំងឺលើសឈាមជាមួយវ័យកាន់តែជរានាំឲ្យគាត់បានឃ្លាតឆ្ងាយពីអាជីពសិល្បៈទាំងស្រុង។ នាយសង់ស៊ីស បានកើតជំងឺលើសឈាមនាំឲ្យលោកមិនអាចនិយាយអ្វីបានច្បាស់ដូចមុនឡើយ ហើយគាត់ត្រូវសម្រាកព្យាបាលជំងឺនៅផ្ទះ ក្រោមការមើលថែពីក្រុមគ្រួសារ ។
បច្ចុប្បន្ន លោកម៉ារី សុន ហៅនាយសង់ស៊ីស បានឈានដល់អាយុ៧២ឆ្នាំហើយ ហើយគាត់គឺជាតារាកំប្លែង មិនរើសក្រុម ដោយក្រុមណាអញ្ជើញទៅចូលរួមសម្តែងក៏បានដែរ។
នាយសង់ស៊ីស ចូលប្រឡូកក្នុងវិស័យសិល្បៈតាំងពីកុមារភាពមកដល់ពេលនេះទទួលបានជោគជ័យជាបន្តបន្ទាប់ ដោយមានការគាំទ្រពីមហាជនទូទៅ និងនៅក្រៅប្រទេសផងដែរ ។
អ្នកចម្រៀងអាយ៉ៃលោកតាផ្លុង មឿក បានបាត់បងសមត្ថភាពសម្តែងទាំងស្រុង បន្ទាប់ពីធ្លាក់ខ្លួនឈឺដោយសារជំងឺជាច្រើនមុខ ដែលបណ្តាលឲ្យគាត់មានការវង្វេង ម្តងៗ ។
តារារូបនេះត្រូវក្រុមគ្រួសារយកទៅព្យាបាលនៅមន្ទីរពេទ្យញឹកញាប់ ប៉ុន្តែដោយសារក្រុមគ្រួសាររបស់គាត់មានភាពខ្វះខាត ទើបនៅបន្តការព្យាបាលនៅផ្ទះដោយការលេបថ្នាំ ។ ប៉ុន្តែដោយសារតែមានការជ្រោមជ្រែងពីសមាគមសិល្បករខ្មែរ ក្រុមគ្រួសាររបស់គាត់អាចនាំគាត់ទៅព្យាបាលនៅមន្ទីរពេទ្យជាថ្មីម្តងទៀត ជាមួយការរ៉ាប់រងព្យាបាលទាំងស្រុងពីគ្រូពេទ្យស្ម័គ្រចិត្តរបស់លោកហ៊ុន ម៉ាណែត ។
លោកតាផ្លុង មឿក មានវ័យ៨៣ឆ្នាំជាអ្នកអាយ៉ៃជើងចាស់ ហើយអ្វីដែលត្រូវបានទស្សនិកជនកាន់តែស្គាល់នោះ គឺការចូលរួមសម្តែងរឿងកំប្លែង «តាភោគ» ។ លោកតាក៏ជាអតីតអ្នកបង្ហាត់បង្រៀនសិល្បៈអាយ៉ៃនៅក្រសួងវប្បធម៌ និងវិចិត្រសិល្បៈ និងជាអតីតសមាជិកក្រុមប្រឹក្សាសង្កាត់ទន្លេបាសាក់ផងដែរ ។
អតីតតារាកំប្លែងជើងចាស់ និងជាប្រធានអង្គការ N.A.C.A លោកស៊ូ សាវ៉ាង ហៅតា ហ្វ៊ុយហ្សូ បាន និងកំពុងធ្លាក់ខ្លួនឈឺដោយសារជំងឺមហារីក ជាមួយភាពជរា ហើយបានបាត់បង់សមត្ថភាពសម្តែងទាំងស្រុង ។ បើទោះបីជាមិនអាចសម្តែងបានបន្តទៀតក៏ដោយ ប៉ុន្តែលោកក៏បានបើកសមាគមសិល្បៈផ្ទាល់ខ្លួនមួយ ដើម្បីបណ្តុះបណ្តាលផ្នែកសិល្បៈដល់ក្មេងជំនាន់ក្រោយ ។
ក្នុងវ័យ៧៥ឆ្នាំលោកតាហ៊្វុយហ៊្សូ បានខិតខំទ្រទ្រង់អង្គការN.A.C.A តាំងពីអំឡុងឆ្នាំ២០០០ ដោយទទួលយកតែកុមារកំព្រា ឬកុមារដែលក្រីក្រគ្មានលទ្ធភាពទៅសាលារៀន ក្នុងចន្លោះពីអាយុ៦ឆ្នាំ រហូតដល់ទៅ១៨ឆ្នាំ ។ អង្គការមួយនេះមានបង្រៀនសិល្បៈរបាំគ្រប់ប្រភេទ សម្ដែងខារ៉ាអូខេ ពិធីករ បង្រៀនភាសាអង់គ្លេស និង ចំណេះដឹងទូទៅជាដើម ។
ជាតារាកំប្លែង អ្នកអាយ៉ៃ និងតួឯកយីកេប្រចាំវិទ្យុជាតិដ៏ល្បីអ្នកស្រីណយ សំណាង បាន និងកំពុងតែញាំញីដោយសារជំងឺ និងភាពចាស់ជរា ខណៈពេលអាជីពសិល្បៈរបស់គាត់បច្ចុប្បន្នថមថយច្រើន ។ គាត់អាចចេញសម្តែងវិញបានម្តងម្កាលប៉ុណ្ណោះអាស្រ័យលើសុខភាព ប៉ុន្តែរហូតមកដល់ពេលនេះអាជីពសិល្បៈរបស់គាត់ទំនងជាមិនអាចទៅមុខទៀតឡើយ ដោយសុខភាពកាន់តែទ្រុឌទ្រោមទៅហើយ ។ ក្នុងរូបកាយចាស់ជរាញាំញីដោយជំងឺគ្មានស្រាកស្រាន្ដ អតីតតារាកំប្លែងវ័យ៧៥ឆ្នាំ លោកយាយណយ សំណាង កំពុងតែរស់នៅជាមួយនឹងចៅៗទាំង៦នាក់ និងមានកូនប្រុសម្នាក់ឈ្មោះវណ្ណា ស័ក្ត ជាតារាចំរៀងផលិតកម្ម M ។ ចំណែកកូនប្រុសម្នាក់ទៀតបានបាត់បង់ជីវិតដោយសារគ្រោះថ្នាក់ចរាចរណ៍ ។
តារាចម្រៀងមានដើមកំណើតពីខេត្តស្វាយរៀងលោកសួស សងវាចា បានបាត់បង់អាជីពចម្រៀងទាំងស្រុង បន្ទាប់ពីតារារូបនេះបានពើបប្រទះជំងឺលើសឈាម រហូតបញ្ជូនទៅព្យាបាលនៅប្រទេសវៀតណាមនាពេលកន្លងមក ។ បើទោះបីជាពេលនេះជំងឺរបស់លោកបានធូរស្រាលបន្តិច ប៉ុន្តែលោកនៅមិនទាន់អាចកាន់ក្បាលមេក្រូច្រៀងឡើងវិញបាននៅឡើយទេ ក្នុងពេលដែលរាងកាយរបស់លោកក៏នៅមិនទាន់អាចកម្រើកបានល្អដូចធម្មតានោះទេ ។
លោកសួស សងវាចា ក្រៅពីមានជំងឺដាច់សរសៃឈាមខួរក្បាល លោកក៏មានជំងឺទឹកនោមផ្អែមកម្រិតធ្ងន់មួយមុខទៀត ដែលត្រូវចាក់ថ្នាំការពារជាប្រចាំផងដែរ ហើយលោកត្រូវចំណាយការព្យាបាលច្រើនជាមួយជំងឺមួយនេះ ៕
ចែករំលែកព័តមាននេះ