រាជធានីភ្នំពេញ ៖ មកទល់ពេលនេះ មិនទាន់មានមន្ត្រីណាម្នាក់ ឬសហព័ន្ធណាមួយ ចេញមុខបញ្ជាក់ថា កីឡាករកម្ពុជារូបណាឡើងប្រកួតជាមួយកីឡាករបរទេសច្រើនជាង គេនោះទេ បន្ទាប់ពីសង្វៀនក្នុងស្រុករៀបចំការប្រកួតអន្តរជាតិយ៉ាងផុសផុលនោះ ប៉ុន្តែចម្លើយមួយខ្លី…
រាជធានីភ្នំពេញ ៖ មកទល់ពេលនេះ មិនទាន់មានមន្ត្រីណាម្នាក់ ឬសហព័ន្ធណាមួយ ចេញមុខបញ្ជាក់ថា កីឡាករកម្ពុជារូបណាឡើងប្រកួតជាមួយកីឡាករបរទេសច្រើនជាង
គេនោះទេ បន្ទាប់ពីសង្វៀនក្នុងស្រុករៀបចំការប្រកួតអន្តរជាតិយ៉ាងផុសផុលនោះ ប៉ុន្តែចម្លើយមួយខ្លី គឺមានកីឡាករច្រើននាក់មានទីផ្សារក្នុងព្រឹត្តិការណ៍មួយនេះ ។
ក្នុងនោះកីឡាករដែលមានទីផ្សារក៏អាស្រ័យលើប្រភេទទម្ងន់នីមួយៗផងដែរ ដោយកីឡាករដែលមានទម្ងន់ស្ថិតក្នុងចន្លោះពី៦៣,៥ដល់៦៩គីឡូក្រាម គឺមានឱកាសទទួលបានការផ្គូផ្គងជាមួយកីឡាករបរទេសបំផុត ដោយអាចនិយាយបានថា ដើម្បីបានពួកគេឡើងប្រកួតម្ដងៗ គឺត្រូវកក់ទុកមុនយូរមិនខុសពីតារាចម្រៀង Super Star នោះទេ។
លោក ញាណ សុធី អ្នករៀបចំការប្រកួតប្រចាំសង្វៀនទូរទស្សន៍អាស៊ីអាគ្នេយ៍ បានថ្លែងបញ្ជាក់ថា សម្រាប់កីឡាករនៅលើសង្វៀនអន្តរជាតិ មិនអាចកំណត់ថា អ្នកណាឡើងប្រកួតច្រើនជាងអ្នកណាបានទេនាពេលចុងក្រោយ ដោយសារតែកីឡាករទាំងនោះគឺប្រកួតស្ទើរមិនមានពេលសម្រាក ហើយបើនិយាយពីតួលេខដែលដាក់នៅក្នុងឯកសារទៀតសោតក៏ត្រូវបានគេបន្ថយដើម្បីកុំឱ្យឃើញប្រកួតច្រើន ។
លោកថា កីឡាករខ្លះឡើងប្រកួតចង់រាប់រយដង ប៉ុន្តែបានដាក់ត្រឹមតែជាង១០០ ឬក្រោម១០០ដងប៉ុណ្ណោះ ដើម្បីការពារកុំឱ្យពេលចាញ់រងការអាម៉ាស់ខ្លាំង ព្រោះតែមានការប្រកាសថាប្រកួតបានច្រើន តែបែរជាបរាជ័យ ។ ស្របគ្នាដែលកីឡាករខ្លះក៏ត្រូវបានទូរទស្សន៍ CTN និង Bayon ផ្ដល់ប្រាក់ខែជាប្រចាំ ហើយមិនឱ្យទទួលប្រកួតនៅតាមបណ្ដាប៉ុស្ដិ៍ផ្សេង ទើបមិនអាចកំណត់បានថា កីឡាកររូបណាប្រកួតអន្តរជាតិច្រើនជាងគេនោះ ។ លោកនិយាយថា៖«បើឱ្យមើលប្រវត្តិប្រកួតក្នុងឯកសារយកជាការបានតិចណាស់ ព្រោះកីឡាករខ្លះប្រកួតអន្តរជាតិតាំងពីណាពីណី តែដល់មើលឃើញតែជាង១០០លើករាប់ទាំងប្រកួតជាមួយកីឡាករក្នុងស្រុកទើបថាយកជាការមិនបាន ប៉ុន្តែបើនិយាយថា កីឡាករណាខ្លះមានទីផ្សារខ្លាំង មានគេចូលចិត្តមើលច្រើនសម្រាប់ការប្រកួតអន្តរជាតិ គឺអាចកំណត់បាន ។
លោកបន្តថា សម្រាប់កីឡាករដែលមានទីផ្សារអន្តរជាតិ ដោយគេចូលចិត្តផ្គូផ្គងឱ្យឡើងប្រកួតច្រើនជាងរួមមាន កីឡាករ ឃុន ឌីម៉ា កីឡាករ រឿង សោភ័ណ្ឌ កីឡាករ មាស ច័ន្ទមាន កីឡាករ ឡៅ ចន្ទ្រា កីឡាករ ឡុង សុវណ្ណឌឿន កីឡាករ ផាន់ គ្រាន់ និងកីឡាករ ពុទ្ធ ឆាយរិទ្ធី ជាដើម ។ លោកថា កីឡាករដែលមានឈ្មោះបោះសំឡេងនៅក្នុងសង្វៀនអន្តរជាតិទាំងនេះ មិនត្រូវបានប្រកួតឆ្លងប៉ុស្ដិ៍នោះផង ដោយកីឡាករខ្លះប្រកួតបានតែទូរទស្សន៍បាយ័ន ខ្លះបានតែ CTN ប៉ុន្តែសម្រាប់សង្វៀនរបស់លោក គឺអត់មានបំបិទ
កីឡាករមិនឱ្យឡើងប្រកួតប៉ុស្ដិ៍ផ្សេងនោះទេ សូម្បីតែម្ចាស់ខ្សែក្រវាត់ដែលលោកជម្រើសបាន ក៏លោកបើកសិទ្ធិឱ្យឡើងប្រកួតប៉ុស្ដិ៍ផ្សេង ដើម្បីឱ្យរកចំណូលផងដែរ ដោយសារតែយល់ថា បើទោះជាផ្ដល់ប្រាក់ខែឱ្យក៏ពិតជាពិបាកក្នុងការបំបិទកីឡាករមិនឱ្យប្រដាល់ប៉ុស្ដិ៍ផ្សេង។
លោកថា កីឡាករនៅក្នុងប្រទេសកម្ពុជាត្រូវបែងចែកជា២ប្រភេទ គឺកីឡាករពេញនិយមសម្រាប់ការឡើងរេញអន្តរជាតិជាលក្ខណៈទូទៅ និងកីឡាករដែលពេញនិយមក្នុងការប្រកួតប្រដាល់ជាមួយបរទេសជាលក្ខណៈប្រចាំប៉ុស្ដិ៍។
ក្នុងនោះក៏ត្រូវបែងចែកកីឡាករទៅតាមប្រភេទទម្ងន់ផងដែរ ដោយលោកអាចនិយាយបានថាកីឡាករក្នុងប្រភេទទម្ងន់នីមួយៗគឺជាSuper Starសម្រាប់ការផ្គូផ្គងនៅលើសង្វៀនតែម្ដង។
លោក ញាណ សុធី បន្តថា សម្រាប់ប្រភេទទម្ងន់៦៣,៥គីឡូក្រាមគឺមានកីឡាករ ឃុន ឌីម៉ា កីឡាករ ផាន់ គ្រាន់ និងកីឡាករ ឌុម កែវដា ។ ប្រភេទទម្ងន់៦៥គីឡូក្រាម មានកីឡាករ មឿន សុខហ៊ុច ។ ប្រភេទទម្ងន់៦៧គីឡូក្រាមមានកីឡាករ ពុទ្ធ ឆាយរិទ្ធី និងកីឡាករ រឿង សោភ័ណ្ឌ និងប្រភេទទម្ងន់៦៩គីឡូក្រាមមានកីឡាករ ឡុង សុភី និងកីឡាករអ៊ុ ចំរើន ។ លោកថា កីឡាករដែលបានរៀបរាប់នេះបានក្លាយជាទីផ្សារប្រកួតអន្តរជាតិស្ទើរមិនមានពេលសម្រាកតែម្ដង បើចង់ផ្គូផ្គងឱ្យប្រកួតម្ដងៗ គឺលុះត្រាទាក់ទងជាមុនយូរៗទើបអាចយកមកប្រកួតបាន ។
យ៉ាងណាមិញ សម្រាប់កីឡាករដែលមានទីផ្សារចម្រុះគ្រប់ប៉ុស្ដិ៍គឺមាន ឃុន ឌីម៉ា, ឡុងសុភី,រឿង សោភ័ណ្ឌ, ពុទ្ធ ឆាយរិទ្ធី, ផាន់ គ្រាន់, ផល សោភ័ណ្ឌ, ឡៅ ចន្ទ្រា, វង្ស ណយ,
ម៉ឺន សុភា ប៉ុន្តែសម្រាប់កីឡាករខ្លាំងៗ៤រូបរួមមាន កីឡាករ ផល សោភ័ណ្ឌ ឡៅ ចន្ទ្រា វង្ស ណាយ និងម៉ឺន សុភា មិនអាចទទួលប្រកួតប៉ុស្ដិ៍ផ្សេងក្រៅពីទូរទស្សន៍បាយ័ននោះទេ ដោយសារតែអ្នកទាំង៤គឺជាកីឡាករក្នុងក្របខ័ណ្ឌទាហាន ហើយត្រូវបានកុងត្រាឱ្យប្រកួតផ្ដាច់មុខប្រចាំនៅប៉ុស្ដិ៍បាយ័ន ដោយមិនអាចទទួលប្រកួតបានដូចមុន ។
លោកថា កីឡាករដែលបានរៀបរាប់គឺមានទីផ្សារឡើងប្រកួតវិលជុំចុះឡើងៗ មិនថាកីឡាករដែលឡើងប្រកួតទូទៅដោយមិនប្រកាន់ប៉ុស្ដិ៍ និងកីឡាករដែលប្រកួតប្រចាំប៉ុស្ដិ៍សុទ្ធតែមានការប្រកួតសឹងតែ១ឬ២សប្ដាហ៍ម្ដងស្មើគ្នា ដោយសារតែការប្រកួតអន្តរជាតិមានចំនួនច្រើនសង្វៀនគ្រប់ប៉ុស្ដិ៍ទូរទស្សន៍ ។ កីឡាករទាំងនោះក៏ទទួលបានតម្លៃខ្លួនកើនឡើងចាប់ពីចន្លោះ៣៥០ដុល្លារដល់ជិត៦០០ដុល្លារក្នុងមួយលើកនោះផង ទើបលោកនិយាយថា កីឡាករឡើងប្រកួតអន្តរជាតិនៅកម្ពុជាកាន់តែមានក្រេឌីត បើទោះជាមិនទាន់អាចប្រៀបប្រដូចនឹងកីឡាករនៅក្រៅប្រទេសបាននៅឡើយក្ដី។
មិនខុសគ្នាដែរ លោក នាង ស៊ីវត្ថា អ្នករៀបចំការប្រកួតប្រចាំសង្វៀនទូរទស្សន៍បាយ័ន បានអះអាងថា កីឡាករល្បីៗសព្វថ្ងៃមានការផ្គូផ្គងឱ្យប្រកួតស្ទើរតែមិនទំនេរនោះទេ ទើបតម្រូវឱ្យស្ថាប័នរបស់លោកសម្រេចចិត្តផ្ដល់ជាប្រាក់ខែ ហើយចងជើងមិនឱ្យដើរប្រកួតប៉ុស្ដិ៍ផ្សេងតែម្ដង តែបានតម្រូវឱ្យពួកគេឡើងប្រកួតយ៉ាងហោចម្ដងក្នុងមួយខែ បន្ថែមពីលើទឹកប្រាក់តម្លៃខ្លួន ។ លោកថា កីឡាករដែលអ្នកទស្សនាចូលចិត្តការប្រកួតរបស់ពួកគេនឹងត្រូវជ្រើសរើសឱ្យចុះកុងត្រា ប៉ុន្តែការចុះកុងត្រាក៏មានកំណត់រយៈពេលដើម្បីផ្លាស់ប្ដូរសមាសភាពផងដែរ ដើម្បីកុំឱ្យកីឡាករទាំងនោះសំអាងថាទទួលបានប្រាក់ខែហើយប្រហែសខ្លួន ។
លោកថា កីឡាករ វង់ ណយ, ម៉ឺន សុភា, ឡៅ ចន្ទ្រា និងផល សោភ័ណ្ឌ មានអ្នកចូលចិត្តមើលការប្រកួតច្រើន ទើបសម្រេចដាក់ឱ្យប្រកួតញឹកញាប់ ដោយឡើងប្រកួតលើកណាក៏មានអ្នកទស្សនាកកកុញពេលហ្នឹង ។ លោកថា ការប្រកួតអន្តរជាតិត្រូវតែមើលសន្ទុះគាំទ្ររបស់មហាជន អ៊ីចឹងហើយទើបលោកសប្បាយចិត្តក្នុងការកុងត្រាយកកីឡាករទាំងនោះ ប៉ុន្តែមិនមានន័យថា ក្រៅពីកីឡាករកុងត្រា មិនដាក់កីឡាករកម្ពុជាដែលមានទីផ្សារផ្សេងទៀតនោះទេ គឺដាក់ជាប្រចាំ គឺគ្រាន់តែក្នុងព្រឹតិ្តការណ៍ធំៗលោកដាក់តែកីឡាករដែលជាប់កុងត្រាប៉ុណ្ណោះ៕
ចែករំលែកព័តមាននេះ