ខេត្តក្រចេះ ៖ គ្រោះថ្នាក់ចរាចរផ្លូវទឹកដែលពុំសូវធ្លាប់មានកន្លងមក រវាងទូកអ្នកនេសាទបុកជាមួយនឹងទូករបស់មណ្ឌលសុខភាពឃុំ ដែលកំពុងតែដឹកសាកសពនៅកណ្ដាលទន្លេដ៏ធំល្វឹងល្វើយ នៅស្រុកសំបូរ ក្នុងហេតុការណ៍នោះបានបង្កឲ្យបុរសជាអ្នកបើកទូកម្នាក់បាត់ខ្លួននៅក្នុងទឹកទន្លេ ។
ឧប្បត្តិហេតុគ្រោះថ្នាក់ចរាចរផ្លូវទឹកដែលនឹកស្មានមិនដល់រវាងទូក និងទូករហូតបាត់ខ្លួនមនុស្សម្នាក់នេះ នៅមិនទាន់រកឃើញនៅឡើយទេ ត្រូវបាននគរបាលស្រុកសំបូរ និយាយថា បានកើតឡើងនៅវេលាម៉ោង០៤ទាបភ្លឺ ថ្ងៃទី២២ ខែមីនា ឆ្នាំ២០១៨ នៅចំណុចភូមិសំភិន ឃុំកំពង់ចាម ស្រុកសំបូរ ។ មូលហេតុដែលបង្កឲ្យមានគ្រោះថ្នាក់ចរាចរនេះ ត្រូវបាននគរបាលសន្និដ្ឋានថា បណ្ដាលមកពីយប់ងងឹត ភាគីទូកទាំងសងខាងមើលគ្នាពុំឃើញ ។
អធិការនគរបាលស្រុកសំបូរ លោកវរសេនីយ៍ឯក ប៊ុន ឈឿន បានឲ្យដឹងថា បុរសជាអ្នកនេសាទដែលបានបាត់ខ្លួនឈ្មោះ ជា សីហា អាយុ៣៨ឆ្នាំ មានទីលំនៅក្នុងឃុំសំបូរ ពេលកើតហេតុគឺជនរងគ្រោះរូបនេះ បានបើកទូកប្រភេទអេវ (ទូកតូចតែលឿន) មកពីប៉ែកខាងលើដើម្បីរកទិញត្រីពីអ្នកនេសាទ ។ ចំណែកឯទូកម្ខាងទៀតជាប្រភេទទូកអេវដូចគ្នា ជាទូករបស់មណ្ឌលសុភាពឃុំ ដែលកំពុងតែបើកដឹកសាកសពអ្នកភូមិម្នាក់ ដែលស្លាប់ដោយសារពស់ចិកយកពីពេទ្យឆ្ពោះទៅធ្វើបុណ្យនៅលំនៅឋាន ។
លោកអធិការនគរបាលស្រុកបានបញ្ជាក់ថា ក្នុងហេតុការណ៍បុកគ្នានោះ ទូកទាំងពីរគ្រឿងនេះមិនត្រូវបានលិចនោះទេ តែបុរសជាអ្នកភូមិត្រូវបាត់ខ្លួន ។ ដោយលោកបានសន្និដ្ឋានថា ការបាត់ខ្លួនរបស់បុរសរងគ្រោះជាអ្នកភូមិទំនងជាស្លាប់ដោយសារលង់ទឹក ។ ហើយរហូតមកទល់នឹងពេលនេះកម្លាំងនគរបាលស្រុកកំពុងតែចុះស្វែករក តែនៅមិនទាន់ឃើញនៅឡើយដែរ ៕
ចែករំលែកព័តមាននេះ