ខេត្តសៀមរាប ៖ រថយន្តបាឡែនពណ៌ត្រីឆ្លូញមួយគ្រឿង បើកបរច្រាសទិសគ្នា ពីលិចមកកើត ក្នុងល្បឿនលឿនដូចហោះ បម្រុងឡើងវ៉ាជែងរថយន្តមួយដែលបើកស្របទិសគ្នា ខណៈពេលនោះវ៉ាមិនផុតក៏ជ្រុលទៅបុកម៉ូតូសេ១២៥ ពណ៌ខ្មៅ មួយគ្រឿង បណ្ដាលឱ្យស្លាប់ភ្លាមៗ រួចបើករត់ ប៉ុន្តែទៅបុកម៉ូតូស្ត្រីម្នាក់ទៀត ដែលបើកបរពីលិចទៅកើត បណ្ដាលឱ្យរបួសធ្ងន់ ហើយចុះគេចខ្លួនបាត់ទាំងយប់ បន្យល់ទុករថយន្តនៅកន្លែងកើតហេតុ ។
ករណីគ្រោះថ្នាក់ចរាចរមួយនេះបានកើតឡើងនៅវេលាម៉ោង០៧និង៤០នាទីយប់ ថ្ងៃទី២១ ខែមីនា ឆ្នាំ២០១៨ ស្ថិតនៅចំណុចលើកំណាត់ផ្លូវជាតិលេខ៦ ក្នុងភូមិរកាកំបុត ឃុំត្រពាំងធំ ស្រុកប្រាសាទបាគង ខេត្តសៀមរាប ។
តាមប្រភពពីមន្ត្រីនគរបាលស្រុកប្រាសាទបាគង បានប្រាប់នៅព្រឹកថ្ងៃទី២២ ខែមីនា ឆ្នាំ២០១៨ នេះថា ករណីគ្រោះថ្នាក់ចរាចររវាងរថយន្តម៉ាក់កាមម៉ារីបាឡែន ពណ៌ត្រីឆ្លូញ ពាក់ផ្លាកលេខ សៀមរាប ២B-១៣៧៤ បើកបរដោយបុរសម្នាក់មិនស្គាល់អត្តសញ្ញាណ ដែលបើកពីលិចទៅកើត បានបុកជាមួយម៉ូតូ១គ្រឿងម៉ាក HONDA C១២៥ ពណ៌ខ្មៅ ស៊េរី២០០៥ ពាក់ផ្លាកលេខ សៀមរាប ១A-៤៩៧៥ បើកបរដោយឈ្មោះ ផែន ទីន ភេទប្រុស អាយុ២៨ឆ្នាំ រស់នៅភូមិភ្នំដី ឃុំត្រពាំងធំ ស្រុកប្រាសាទបាគង បានបើកបរពីទិសខាងកើតទៅលិច បណ្ដាលឱ្យស្លាប់ភ្លាមៗនៅហ្នឹងកន្លែង ។
ប្រភពបានបន្តថា បន្ទាប់ពីបុកម៉ូតូ១គ្រឿង បណ្ដាលឱ្យស្លាប់ហើយនោះ ម្ចាស់រថយន្តបាឡែនបានខំបើកទៅមុខ ដើម្បីគេចខ្លួនទាំងយប់ ប៉ុន្តែជ្រុលទៅប៉ះទង្គិចនឹងម៉ូតូ១គ្រឿងទៀតម៉ាក HONDA C១២៥ ពណ៌ខ្មៅ ស៊េរី២០១៦ គ្មានផ្លាកលេខ បើកបរដោយឈ្មោះ សន ផល្លា ភេទស្រី អាយុ៣៣ឆ្នាំ រស់នៅភូមិដកពោធិ៍ សង្កាត់ស្លក្រាម ក្រុងសៀមរាប បែកក្បាលចំហៀងឆ្វេង (របួសធ្ងន់) ដែលបើកបរពីលិចទៅកើត ។
ក្រោយពេលកើតហេតុភ្លាមៗ កម្លាំងនគរបាលជំនាញ នៃអធិការដ្ឋាននគរបាលស្រុកប្រាសាទបាគង យើងបានចុះទៅដល់កន្លែងកើតហេតុ រួចធ្វើការពិនិត្យ និងវាស់វែងដើម្បីយករថយន្តបង្ក និងម៉ូតូជនរងគ្រោះទាំង២គ្រឿងចេញ កុំឱ្យកកស្ទះចរាចរណ៍នៅលើដងផ្លូវជាតិ ។ ចំណែកអ្នកបើកបររថយន្តចុះរត់គេចខ្លួនបាត់ដោយពុំស្គាល់អត្តសញ្ញាណ បន្សល់ទុករថយន្តនៅហ្នឹងកន្លែងកើតហេតុ ដូច្នេះសមត្ថកិច្ចកំពុងស្រាវជ្រាវ យកមកផ្តន្ទាទោសទៅតាមផ្លូវច្បាប់ ។
បច្ចុប្បន្ន សាកសពត្រូវបានកម្លាំងជំនាញធ្វើការប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីខ្មែរ ។ ចំណែកជនរងគ្រោះ (ស្ត្រី) ត្រូវបានបញ្ជូនទៅមន្ទីរពេទ្យឯកជនដែលមានទីតាំងស្ថិតនៅតាមបណ្ដោយផ្លូវ៦០ម៉ែត្រ ក្នុងក្រុងសៀមរាប ។ ឬឯរថយន្តបង្កខូចខាតមុខទាំងស្រុង និងម៉ូតូជនរងគ្រោះក៏ខូចខាតមួយចំនួនធំដែរ ត្រូវបានយកមករក្សាទុកនៅអធិការដ្ឋាននគរបាលស្រុកប្រាសាទបាគង ដើម្បីកសាងសំណុំរឿងចាត់ការទៅតាមផ្លូវច្បាប់ ៕
ចែករំលែកព័តមាននេះ