ខេត្តមណ្ឌលគិរី ៖ ស្ត្រីថៅកែជួញដូរសត្វព្រៃនៅក្រុងសែនមនោរម្យម្នាក់ ត្រូវបានជំនាញអង្គការវ៉ាយអេត សហការជាមួយកម្លាំងកងរាជអាវុធហត្ថក្រុង ចុះចាប់ដល់ក្នុងផ្ទះទាំងព្រឹកព្រលឹម កាលពីវេលាម៉ោង០៦ និង៣០នាទីថ្ងៃទី២១ មីនា ឆ្នាំ២០១៨ រួចធ្វើពិធីដុតកម្ទេចចោលទាំងអស់ នូវសត្វណាដែលងាប់ ។សមត្ថកិច្ចបានឲ្យដឹងថា មន្ត្រីជំនាញបានចុះចាប់សត្វព្រៃនៅចំណុចផ្សារគុម្ពប្ញស្សី ម្ចាស់ឈ្មោះ សោម គឹមសាង ភេទស្រី អាយុ២៩ឆ្នាំ ជាអ្នកលក់ដូរ ស្ថិតនៅភូមិកណ្តាល សង្កាត់ស្ពានមានជ័យ ក្រុងសែនមនោរម្យ ។
ប្រភពបន្តថា សត្វព្រៃដែលចាប់រួមមាន ១-កាំប្រមា៥១,៥គីឡូក្រាម ២-ត្រកួតរស់៤,៣០គីឡូក្រាម ៣-កន្ធាយរស់ ៤គីឡូក្រាម ៥-ក្តាន់ញ៉ែង ៦,៣០គីឡូក្រាម ៦-ឆ្មាបាងាប់ ៥,៣០គីឡូក្រាម ៧-សាច់ឈ្លូស៣២គីឡូក្រាម ៨-សំពោចងាប់ ២,៧០គីឡូក្រាម ៩-ពស់ព្រៃងាប់ ១,៥០គីឡូក្រាម ១០-ក្រពះប្រមាចំនួន៣ សរុបចំនួន១០មុខ ស្មើ១១២,៦គីឡូក្រាម ក្រពះប្រមាចំនួន៣ ។ បច្ចុប្បន្នម្ចាស់ផ្ទះ និងសត្វព្រៃបញ្ជូនទៅខណ្ឌរដ្ឋបាលព្រៃឈើខេត្តមណ្ឌលគិរី ដើម្បីចាត់ការតាមនីតិវិច្បាប់ ។លោកជ័យ សុខា នាយផ្នែករដ្ឋបាលព្រៃឈើសែនមនោរម្យបានឲ្យដឹងថា ចំពោះស្ត្រីខាងលើមិនត្រូវបានបញ្ជូនទៅសាលាដំបូងទេ ព្រោះបទ
ល្មើសនេះជាប្រភេទសត្វព្រៃធម្មតា ដោយមិនចាត់ចូលជាប្រភេទសត្វកម្រ ។
លោកនាយផ្នែកបញ្ជាក់ថា ករណីនេះត្រឹមតែពិន័យអន្តរកាលប៉ុណ្ណោះ ។ លោកហែម បូណារ៉ែល មេបញ្ជាការអាវុធហត្ថខេត្តមណ្ឌលគិរីបានថ្លែងថា កម្លាំងរបស់លោកបានចូលរួមសហការជាមួយជំនាញដើម្បីទប់ស្តាត់និងបង្ក្រាបការជួញដូរសត្វព្រៃខុសច្បាប់ ។ កន្លងមកលោកតែងដាក់បញ្ជាដល់មន្ត្រីតាមមូលដា្ឋនត្រូវយកចិត្តទុកដាក់ឃ្លាំមើលសកម្មភាពក្រុមឈ្មួញដែលលួចរកស៊ីបទល្មើសធនធានធម្មជាតិទាំងនេះ ។ ប្រជាពលរដ្ឋរស់នៅក្រុងសែនមនោរម្យបាននិយាយថា ទីតាំងផ្ទះស្ត្រីឈ្មោះ សោម គឹមសាង បានលួចរកស៊ីលក់សត្វព្រៃរាប់ឆ្នាំមកហើយមិនដែលឃើញមានសមត្ថកិច្ចក្នុងខេត្តណាម្នាក់ ចេញមុខបង្ក្រាបទេ។ ទើបតែពេលនេះមានជំនាញអង្គការវ៉ាយអេតចុះស្រាវជ្រាវសម្ងាត់ទើបអាចចាប់បង្ក្រាបបាន ។
គួរកត់សម្គាល់ថា បទល្មើសជួញដូរសត្វព្រៃក្នុងខេត្តមណ្ឌលគិរី បានកើតមានស្ទើរគ្រប់ទីកន្លែងទាំង៥ក្រុងស្រុក ខណៈជំនាញមេព្រៃក្រោមការគ្រប់គ្រងរបស់លោក អ៊ុំ វណ្ណសុភៈ នាយខណ្ឌរដ្ឋបាលព្រៃឈើមណ្ឌលគិរី មិនសូវឃើញចុះបង្ក្រាបឡើយ ពោលគឺទាល់តែមានមន្ត្រីជំនាញមកពីថ្នាក់លើ ឬអង្គការវ៉ាយអេត ចុះដល់ទឹកដីខេត្តមណ្ឌលគិរី ទើបបទល្មើសទាំងនោះត្រូវបានបង្ក្រាប ជាក់ស្តែងដូចករណីខាងលើនេះអីុចឹង ។ ក្នុងករណីដូចគ្នានេះដែរ កាលពីព្រឹកថ្ងៃទី២១ ខែមីនា ឆ្នាំ២០១៨ មន្ត្រីជំនាញបរិស្ថានដែនជម្រកសត្វព្ រៃភ្នំព្រេច បានប្រតិបត្តិការទប់ស្កាត់បទល្មើសសត្វព្រៃ និងឃាត់ខ្លួនបានជនសង្ស័យម្នាក់ ខណៈជនសង្ស័យ៣នាក់ទៀតបានរត់គេចខ្លួនបាត់ នៅភូមិជីក្លប់ ឃុំសុខសាន្ដ ស្រុកកោះញែក ខេត្ដមណ្ឌលគិរី។ មន្ត្រីជំនាញបានដកហូតវត្ថុតាងរួមមាន ម៉ូតូ២គ្រឿង, អាវុធកែច្នៃ១ដើម, សត្វឈ្លូស (ងាប់)៦ក្បាល, សត្វសំពោច (ងាប់) ២ក្បាល, សត្វនិងសត្វទន្សាយ (ងាប់) ២ក្បាល។
ចំណែកជនសង្ស័យមានឈ្មោះម៉ូច ធុច ភេទប្រុស អាយុ២៣ឆ្នាំ រស់នៅភូមិជីក្លប់ ឃុំសុខសាន ស្រុកកោះញែក។លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានមានប្រសាសន៍ថា កម្លាំងឧទ្យានុរក្សបានកំពុងបន្ថែមការស៊ើបអង្កេតតាមមូលដ្ឋាន ចំពោះសកម្មភាពរបស់ព្រានព្រៃដើម្បីបង្ការនឹងទប់ស្តាប់ការបបាញ់ ឬជួញដូររបស់ឈ្មួញខុសច្បាស់ ។ ហើយជាការជាក់ស្តែងករណីខាងលើនេះ ជំនាញបាននឹងកំពុងបន្តនិតីវិធីចាត់ការតាមច្បាប់ ។ លោកប្រធានមន្ទីរបន្តថា ក្រុមការងារបរិស្ថានបានចុះផ្សព្វផ្សាយដល់ប្រជាពល រដ្ឋដើម្បីយល់ដឹងពីការអភិរក្សប្រភេទសត្វព្រៃនានាដើម្បីនិរន្តរ៍ភាពធនធានធម្មជាតិនៅក្នុងខេត្ត ៕
ចែករំលែកព័តមាននេះ