តោះ… ទៅស្គាល់បុគ្គល«ម៉ារី»ឱ្យកាន់តែច្បាស់
- កំពត
ខេត្តកំពត ៖ ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានប្រាប់បណ្តាញសារព័ត៌មានថា កាលពីព្រឹកថ្ងៃទី២១ មីនា ឆ្នាំ២០១៨…
ខេត្តកំពត ៖ ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានប្រាប់បណ្តាញសារព័ត៌មានថា កាលពីព្រឹកថ្ងៃទី២១ មីនា ឆ្នាំ២០១៨ កម្លាំងសមត្ថកិច្ចរបស់លោកបានឃាត់ខ្លួនបុគ្គលឈ្មោះ
«ម៉ារី» បានហើយ នៅភូមិព្រែកគ្រឹះ ឃុំព្រែកគ្រឹះ ស្រុកកំពង់ត្រាច ខេត្តកំពត ។ លោកថា បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសដាក់បទបញ្ជាឲ្យអាជ្ញាធរតាមរកបុគ្គលរូបនេះ ទើបសមត្ថកិច្ចរបស់លោកដឹងពីកន្លែងស្នាក់នៅ ក៏ចាប់ភ្លាមតែម្តង ។
ការតាមឃាត់ខ្លួនបុគ្គលឈ្មោះ ម៉ា រី នេះ ដោយសារតែគាត់បានទៅដើរភូតកុហកប្រជាពលរដ្ឋលើបញ្ហាប្រទេសជាតិនៅតាមខេត្ត ក្នុងនោះ មានខេត្តកែប ខេត្តកំពតជាដើម ពីដំណើរទស្សនកិច្ចរបស់សម្តេច
តេជោ ហ៊ុន សែន ទៅប្រទេសអូស្ត្រាលី ដោយនិយាយថា ទទួលភាពបរាជ័យទាំងស្រុង ។ លោកឧត្តមសេនីយ៍ស្នងការបានបញ្ជាក់ថា នៅពេលនេះ កម្លាំងសមត្ថកិច្ចកំពុងនាំខ្លួនជននេះទៅស្នងការដ្ឋាននគរបាលខេត្ត ដើម្បីបន្តការសួរនាំចាត់វិធានការបន្តទៀត ។
តាមឯកសារនានារបស់សមត្ថកិច្ចបញ្ជាក់ថា ឈ្មោះ ម៉ា រី អាយុ៧៤ឆ្នាំ មានស្រុកកំណើតនៅភូមិកោះចំការ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត និងមានលំនៅបច្ចុប្បន្ន ក្នុងភូមិអូរដូង ឃុំពងទឹក ស្រុកដំណាក់ចង្អើរ ខេត្តកែប ឪពុកឈ្មោះ សុខ សៀន (ស្លាប់) និងម្ដាយឈ្មោះ សុខ ខាត់ (ស្លាប់) ។ តាមឯកសារនគរបាលបញ្ជាក់ទៀតថា លោកតា ម៉ា រី មានប្រពន្ធឈ្មោះ គង់ លាន បច្ចុប្បន្នបួសជាដូនជី ស្នាក់អាស្រ័យនៅវត្តព្រៃតាកុយ មានស្រុកកំណើតនៅភូមិអូរដូង ឃុំភ្នំលាវ ស្រុកកំពង់ត្រាច ខេត្តកំពត ។ លោកតា ម៉ា រី មានកូន៥នាក់ ក្នុងនោះស្រី៣នាក់ ១-ឈ្មោះម៉ា អាន ភេទស្រី អាយុ៤៦ មុខរបរបម្រើការងារតាមផ្ទះប្រទេសថៃ ២-ឈ្មោះ ម៉ា អេង ភេទស្រី អាយុ៣៨ ជាកសិករ រស់នៅក្នុងភូមិឃុំជាមួយឪពុក ៣-ឈ្មោះ ម៉ា ទិត្យ ភេទប្រុស អាយុ ៣៦ ជាកម្មករនេសាទនៅខេត្តព្រះសីហនុ ៤-ឈ្មោះ ម៉ា ចាន់ ភេទប្រុស អាយ២៩ ជាកម្មករនេសាទនៅខេត្តព្រះសីហនុ និង៥-ឈ្មោះ ម៉ា ពៅ ភេទស្រី អាយុ២៨ ជាកសិករ ។
ប្រភពព័ត៌មានខ្លះបានបញ្ជាក់ថា នៅឆ្នាំ១៩៩៣ លោកម៉ារី ជាសមាជិកគណបក្សហ៊ុនស៊ិនប៉ិច លុះដល់ឆ្នាំ២០០៣ លោកម៉ារី បានចូលជាសមាជិកសកម្មរបស់គណបក្សសង្គ្រោះជាតិជាមួយលោក ឈូក រីន អតីតមេខ្មែរក្រហមភ្នំវល្លិ ។ លោក ម៉ា រី បួសជាព្រះសង្ឃនៅថ្ងៃទី១៣ មេសា ២០១៥ នៅក្នុងវត្តមនោរម្យទួលសាងាំ ស្ថិតក្នុងស្រុកដំណាច់ចង្អើរ ខេត្តកែប ។ លោកតា ម៉ា រី បានសឹកពីព្រះសង្ឃកាលពីមួយខែមុននេះ ។
ព័ត៌មានចុងក្រោយបានបញ្ជាក់ថា ក្រោយពេលនាំខ្លួនមកដល់ស្នងការដ្ឋាន ក៏បានសួរចម្លើយនៅក្នុងបន្ទប់ ។ ចំណែកអ្នកកាសែតនៅចាំថតឱ្យរហង់នៅខាងក្រៅ ។ នគរបាលប្រាប់ថា តាមបញ្ជាពីលើសូមអ្នកកាសែតយោគយល់ផង មិនឱ្យថតរូបទេ និងក៏មិនឱ្យសម្ភាសន៍ដែរ មិនចិត្តអាក្រក់ទេ ធ្វើម៉េចបញ្ជាពីភ្នំពេញ ។
ចុងក្រោយទៀតបាននិយាយថា លោកតាម៉ា រី មិនត្រូវបានផ្តន្ទាទោសណាមួយទេ ព្រោះគាត់សារភាពកំហុសដឹងថា ធ្វើខុស ព្រមទាំងសន្យាថារាងហើយ ឈប់ប្រព្រឹត្តអាក្រក់ទៀតហើយ ។ ដោយគាត់ទទួលស្គាល់កំហុស ត្រូវបានឱ្យគាត់ធ្វើកិច្ចសន្យាផ្តិតមេដៃ រួចដោះលែងឱ្យមានសេរីភាពវិញហើយ ៕
ចែករំលែកព័តមាននេះ