កាលពីថ្ងៃអង្គារ ក្រុមហ៊ុន Huawei បានលើកឡើងពីភាពជោគជ័យរបស់អាជីវកម្មស្មាតហ្វូននៅអាហ្វ្រិកខាងត្បូង ។ ក្រុមហ៊ុននេះនិយាយថា ពួកគេគ្រប់គ្រងទីផ្សារស្មាតហ្វូនក្នុងប្រទេសនេះបានប្រមាណ១៦,៣% ។ យោងតាមរបាយការណ៍វាស់វែងទូរស័ព្ទដៃអាហ្វ្រិកខាងត្បូងក្នុងឆ្នាំ២០១៧ បង្ហាញថា Samsung នៅតែគ្រប់គ្រងទីផ្សារបានច្រើនជាងគេក្នុងប្រទេសនេះ គឺស្មើដល់ទៅ៤០% ខណៈ Apple គ្រប់គ្រង១០% និង Huawei ៩% ។
Huawei គ្រប់គ្រងទីផ្សារពិភពលោកបាន១០% និងបាននាំចេញទូរស័ព្ទប្រមាណ១៥៣លានគ្រឿងក្នុងឆ្នាំ២០១៧ ច្រើនជាងឆ្នាំ២០១៦ ដែលនាំចេញបានតែ១៣៩លានគ្រឿងប៉ុណ្ណោះ ។ សម្រាប់ទីផ្សារស្មាតហ្វូនកម្រិតខ្ពស់លើពិភពលោកវិញ Huawei គ្រប់គ្រងបាន៨,៤% ច្រើនជាងឆ្នាំ២០១៦ ដែលគ្រប់គ្រងបានតិចជាង៤% ។
លោក Zhao Likun អ្នកគ្រប់គ្រងផ្នែកអាជីវកម្មអតិថិជនរបស់ក្រុមហ៊ុន Huawei ប្រចាំអាហ្វ្រិកខាងត្បូង កត់សម្គាល់ថា ការលក់ទូរស័ព្ទ Mate 10 របស់ខ្លួនបានកើនឡើង៦៦% បើធៀបនឹងការលក់ Mate 9 ។ លោក Likun និយាយថា ៖« អតិថិជនចង់បានការបង្កើតថ្មីបន្ថែមទៀតផ្នែកបច្ចេកវិទ្យា ដែលជាមូលហេតុធ្វើឲ្យក្រុមហ៊ុននេះមានមោទនភាព ក្នុងការនាំមកនូវទូរស័ព្ទប្រើប្រាស់ Artificial Intelligence តាមទូរស័ព្ទ Mate 10 របស់ពួកគេ » ។
លោកកត់សម្គាល់ថា Huawei ក៏កំពុងតែនាំមុខផ្នែកបច្ចេកវិទ្យា 5G ផងដែរ ហើយនឹងចាប់ផ្តើមលក់ទូរស័ព្ទដែលអាចប្រើប្រាស់បច្ចេកវិទ្យានេះបាននៅឆ្នាំ២០១៩ ខាងមុខ ។ លោក Likun បន្តថា ក្រុមហ៊ុននឹងព្យាយាមពង្រឹងទីផ្សារស្មាតហ្វូនតម្លៃសមរម្យបន្ថែមទៀត ។ កាលពីថ្ងៃចន្ទ Huawei ក៏បានចេញលក់ទូរស័ព្ទ Honor 7X និង 9 Lite ផងដែរនៅអាហ្វ្រិកខាងត្បូង ៕
ចែករំលែកព័តមាននេះ