តើភាសាបារាំងនឹងបាត់បង់ពីកម្ពុជា ?
- ភ្នំពេញ
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍នៅព្រឹកថ្ងៃទី ២២ ខែមីនា ឆ្នាំ២០១៨នេះ ការសិក្សាភាសាបារាំងនៅកម្ពុជាមានការធ្លាក់ចុះច្រើន…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍នៅព្រឹកថ្ងៃទី ២២ ខែមីនា ឆ្នាំ២០១៨នេះ ការសិក្សាភាសាបារាំងនៅកម្ពុជាមានការធ្លាក់ចុះច្រើន…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍នៅព្រឹកថ្ងៃទី ២២ ខែមីនា ឆ្នាំ២០១៨នេះ ការសិក្សាភាសាបារាំងនៅកម្ពុជាមានការធ្លាក់ចុះច្រើន ខណៈដែលក្មេងសម័យបច្ចុប្បន្នមានទំនោរសិក្សាភាសាអង់គ្លេស និងភាសាចិនទៅវិញ ។ ថ្លែងនៅក្នុងពិធីប្រគល់សញ្ញាបត្រដល់គរុសិស្ស និស្សិតបញ្ចប់ការសិក្សានៅវិទ្យាស្ថានជាតិអប់រំឆ្នាំ២០១៦-២០១៧ ចំនួន១,៦៣០នាក់ សម្តេចតេជោ ហ៊ុន សែន បានសួររកមូលហេតុអ្វីបានជាមិនមានអ្នកបញ្ចប់ការសិក្សាភាសាបារាំងមកទទួលសញ្ញាបត្រនៅកម្មវិធីនេះ ។
សម្តេចតេជោ ហ៊ុន សែន មានប្រសាសន៍ថា៖ «បើឲ្យខ្ញុំនិទានរឿងភាសាបារាំងធ្លាក់ចុះ ។ រឿងមិនចាំបាច់ទៅបន្ទោសអ្នកណាទេ» ។
សម្តេចបានរម្លឹកថា ពេលសម្តេចអញ្ជើញទៅប្រទេសបារាំង១៩៨២ កាលពេលនោះ សម្តេចបានប្រាប់សមាជិកសភាបារាំងមកពីគណបក្សនយោបាយច្រើនដូចជា បក្ស RPR , សង្គមនិយម និងបក្សកម្មុយនីសជាដើម ពិសាបាយរួមគ្នា ដែលពេលនោះសម្តេចបានជម្រាបជូនទៅសមាជិកសភាបារាំងថា ៖ « ខ្ញុំបានប្រាប់ភាសាបារាំងមានការថមថយចុះហើយ ដូច្នេះបារាំងគួរតែគិតអំពីអតីតប្រទេសដែលជាអាណានិគមរបស់ខ្លួន ដែលបានប្រើប្រាស់ភាសាបារាំង បន្ទាប់ពីភាសាជាតិរបស់ខ្លួន» ។ សម្តេចនាយករដ្ឋមន្ត្រីបានបន្ថែមថា គ្រានោះសម្តេចបានលើកគំនិតបើកមជ្ឈមណ្ឌលវប្បធម៌របស់បារាំង ឬសាលាអាឡឺយ៉ង់ហ្វ្រង់ស៊ែរ នៅកម្ពុជាស្រាប់ តែសាលាមានអ្នកតំណាងរាស្ត្រមួយរូបនៃបក្ស RPR បានឆ្លើយតបថា បារាំងឥតទទួលស្គាល់រដ្ឋាភិបាលឯកឧត្តមទេ មិនបើកទេ ។
សម្តេចមានប្រសាសន៍បន្ថែមថា ពេលនោះ គឺសម្តេចបានតបថា ការឆ្លើយតបបែបនោះ «បានខ្ញុំក្តៅស្លឹកត្រចៀកដែរ ខ្ញុំថា ឲ្យត្រង់ៗហ្មង ។ ខ្ញុំថា នេះជាផលប្រយោជន៍របស់បារាំងទេ ។ អ្នកមិនត្រូវភ្លេចថា ប្រទេសរបស់ខ្ញុំ គឺមានភាសាជាតិរបស់ខ្ញុំមួយដោយឡែក ។ នឹងទីមួយ ។ ទី២ បច្ចុប្បន្ននេះខ្ញុំ កំពុងតែបញ្ជួននិស្សិត ទៅសហភាពសូវៀត និងអឺរ៉ុបខាងកើត ។ ឯទី៣ ខ្ញុំមានជម្រើសផ្សេងទៅទៀត ជាភាសាអង់គ្លេស ដទៃទៀតតាមគេចង់» ។ សម្តេចតេជោ ហ៊ុន សែន សង្កត់ធ្ងន់ថា៖ «ឥឡូវទីចុងបំផុតភាសាបារាំងនៅឯណា?» ។ ឆ្នាំ១៩៩០ ហើយទើបបារាំងមកបើកមជ្ឈមណ្ឌលភាសាបារាំងនៅកម្ពុជា ។ អញ្ចឹងហើយបានជា ចំនួនអ្នកនិយាយបារាំងតិចណាស់ ខ្ញុំនឹងបន្តខិតខំ ពង្រឹងកិច្ចសហប្រតិបត្តិការ ។
សម្តេចនាយករដ្ឋមន្ត្រីបានបញ្ជាក់ថា៖ «ក្មេងៗសម័យនេះ ក្រៅពីភាសាអង់គ្លេសដែលជាភាសាគោលគេចាប់យក គេទៅរៀនភាសាចិនឯណោះទៅវិញ ។ អញ្ចឹងភាសាបារាំងមិនដឹងថា អនាគតទៅជាយ៉ាងម៉េចទេ» ។ តែភាសារៀនក្នុងផ្នែកវេជ្ជសាស្ត្រ និងច្បាប់នៅប្រើភាសាបារាំង តែធ្វើម៉េចកុំឲ្យដំណើរការនេះធ្លាក់ចុះបន្ថែមទៀត តែយើងមិនអាចដាក់បង្ខំថា ត្រូវរៀនភាសានេះ ឬភាសានោះឲ្យនិស្សិតយើងបានទេ ខណៈមនុស្សចាស់ចេះភាសាបារាំងបានលាចាកលោកបន្តិចម្តងៗ ៕
ចែករំលែកព័តមាននេះ