ខេត្តមណ្ឌលគិរី ៖ កាលពីព្រឹកថ្ងៃទី២១ ខែមីនា ឆ្នាំ២០១៨នេះ មន្ត្រីជំនាញបរិស្ថានដែនជម្រកសត្វព្រៃភ្នំព្រេច បានប្រតិបត្តិការទប់ស្កាត់បទល្មើសសត្វព្រៃ និងឃាត់ខ្លួនបានជនសង្ស័យម្នាក់ ខណៈដែលជនសង្ស័យ៣នាក់ទៀតបានរត់គេចខ្លួនបាត់ នៅភូមិជីក្លប់ ឃុំសុខសាន្ដ ស្រុកកោះញែក ខេត្ដមណ្ឌលគិរី។ មន្ត្រីជំនាញបានដកហូតវត្ថុតាង រួមមាន ម៉ូតូ២គ្រឿង, អាវុធកែច្នៃ១ដើម, សត្វឈ្លូស(ងាប់)៦ក្បាល, សត្វសំពោច(ងាប់)២ក្បាល, និងសត្វទន្សាយ(ងាប់) ២ក្បាល។ ចំណែកជនសង្ស័យមានឈ្មោះ ម៉ូច ធុច ភេទប្រុស អាយុ២៣ឆ្នាំ រស់នៅភូមិជីក្លប់ ឃុំសុខសាន្ត ស្រុកកោះញែក។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានមានប្រសាសន៍ថា កម្លាំងឧទ្យានុរក្សបានកំពុងបន្ថែមការស៊ើបអង្កេតតាមមូលដ្ឋាន ចំពោះសកម្មភាពរបស់ព្រានព្រៃ ដើម្បីបង្កា និងទប់ស្តាប់ការបរបាញ់ ឬជួញដូររបស់ឈ្មួញខុសច្បាស់។ ហើយជាការជាក់ស្តែងករណីខាងលើនេះ ជំនាញបាន និងកំពុងបន្តនីតិវិធីចាត់ការតាមច្បាប់។ លោកប្រធានមន្ទីរបន្តថា ក្រុមការងារបរិស្ថានបានចុះផ្សព្វផ្សាយដល់ប្រជាពលរដ្ឋ ដើម្បីយល់ដឹងពីការអភិរក្សប្រភេទសត្វព្រៃនានា ដើម្បីនិរន្តរភាពធនធានធម្មជាតិនៅក្នុងខេត្ត។
ឯកឧត្ដម ស្វាយ សំអ៊ាង អភិបាលខេត្តមណ្ឌលគិរីបានមានប្រសាសន៍ឲ្យដឹងថា សូមប្រជាពលរដ្ឋមេត្តាបញ្ឈប់សកម្មភាពបរបាញ់ ដាក់អន្ទាក់ និងមន្ត្រីខិលខូចទាំងឡាយណាដែលបរបាញ់សត្វព្រៃ(ឆ្លុះសត្វ) ដើម្បីឲ្យមន្ត្រីអនុវត្តច្បាប់ចាត់វិធានការលើករណីនេះ ឲ្យបានធ្ងន់ធ្ងរ ដើម្បីជាការរៀងចាល ហើយចៀសវាងរាល់វប្បធម៌អន្តរាគមន៍។ បច្ចុប្បន្នមន្ត្រីជំនាញបាននាំយកវត្ថុតាង សំណាកសត្វព្រៃទៅរក្សាទុកដើម្បីពិសោធន៍DNA និងយកទៅដុតចោល។ ចំណែកជនសង្ស័យត្រូវបានមន្ត្រីជំនាញដែនជម្រកសត្វព្រៃភ្នំព្រេច កសាងសំណុំរឿងចាត់ការបន្តតាមនីតិវិធី៕
ចែករំលែកព័តមាននេះ