ខេត្តស្វាយរៀង ៖ ប្រជាពលរដ្ឋនៅក្រុងបាវិតបានរិះគន់ដល់អាជ្ញាធរក្រុងនិងមន្ទីរជំនាញថា បានបណ្តោយឲ្យថៅកែក្រុមហ៊ុនចំនួន០៤ប្រើប្រាស់រថយន្តស្លាកលេខខេមរភូមិន្ទ និងអេស្កាវ័រទ័រ ជីកយកអាចម៍ដីជ្រៅដល់ក្បាលប្រេត ធ្វើឲ្យមានការព្រួយបារម្ភដល់សត្វពាហនៈ និងកូនចៅលង់ទឹកស្លាប់ ព្រមទាំងបាក់ដីស្រែរបស់ពួកគាត់នៅក្បែរកន្លែងរណ្តៅនោះ ដែលប្រជាពលរដ្ឋហៅថារណ្តៅមរណៈ។ ការព្រួយបារម្ភពីសំណាក់ប្រជាពលរដ្ឋ និងមន្ត្រីរាជការមួយចំនួនបានថ្លែងប្រាប់ អ្នកសារព័ត៌មាន កាលពីររសៀលថ្ងៃទី២១ ខែមីនា ឆ្នាំ២០១៨នេះ ដោយរិះគន់ថា មិនមានការអើពើពីអាជ្ញាធរ និងមន្ទីរជំនាញ។ ពលរដ្ឋបានបានប្រាប់ឲ្យដឹងទៀតថា សព្វថ្ងៃនៅសង្កាត់បាវិតមានថៅកែដឹកអាចម៍ដី ចំនួន០៤នាក់កំពុងបានដៃខ្លាំងណាស់ហាក់បីដូចមិនសូវក្រែងរអាអាជ្ញាធរបន្តិចសោះ គឺពួកគេដឹកដីនៅ ចំណុចខាងលិចវត្តព្រៃយាយ ស្ថិតក្នុងភូមិសាស្ត្រសង្កាត់បាវិត ក្រុងបាវិត ដែលមានរណ្តៅដីជាច្រើន កន្លែងដោយកន្លែងខ្លះជ្រៅដល់ក្បាលប្រេតទៅហើយមិនដែលឃើញអាជ្ញាធរក្រុង ឬមន្ត្រីជំនាញចុះមក ធ្វើការហាមឃាត់នោះទេ គឺបណ្តោយឲ្យក្រុមរថយន្តដឹកដីនេះធ្វើអ្វីស្រេចតែក្បាលចិត្ត។
ពលរដ្ឋបានលើក ឡើងទៀតថា មិនដឹងថាថៅកែដឹកដីនេះគាត់ធ្វើការងារអីនោះទេ បានជាហ៊ានប្រើប្រាស់ស្លាកលេខសុទ្ធតែ ខ.ម(ខេមរៈភូមិន្ទ)យកមករកស៊ីជាលក្ខណៈឯកជនយ៉ាងដូច្នេះ។ មិនតែប៉ុណ្ណោះរថយន្តដឹកដី បើកលឿនៗណាស់ បើកបង្ហុយដីដាក់ផ្ទះពលរដ្ឋ និងអ្នកធ្វើដំណើរស្ទើតែថប់ដង្ហើមម្តងៗ។ បើតាមមន្ត្រីម្នាក់បានលួចបង្ហើបឲ្យដឹងថា ក្រុមរថយន្តដឹកដីនេះបានមករកស៊ីនៅក្នុងក្រុងបាវិត ជាយូយាណាស់មកហើយមិនដែលឃើញអាជ្ញាធរ ឬមន្ទីររ៉ែ និងថាមពលចុះមកហាមឃាត់មិនឲ្យ ជីកជ្រៅៗនោះដែរគឺកន្លែងខ្លះជីកជម្រៅទៅក្រោមមិនក្រោម១០ម៉ែត្រនោះទេ ហើយពុំបានទប់ទំនប់ការពារបាក់ដី និងសត្វគោក្របី ឬមនុស្សធ្លាក់ចូលនោះឡើយ។ ការជីកយកអាចម៍ដីនេះក៏នៅមិនឆ្ងាយពីទីប្រជុំជនឡើយ មានប្រមាណតែជាង២គីឡូម៉ែត្រប៉ុណ្ណោះ ពីតំបន់ទីប្រជុំក្រុងបាវិត។
ហើយអាចម៍ដីដែលត្រូវចាក់នោះគឺចាក់ដីឲ្យក្រុមហ៊ុនកាស៊ីណូដែលមាន គោលបំណងចង់កសាងអាគារមានកម្ពស់ជាច្រើនជាន់នៅទីតាំងដីមួយកន្លែងនៅក្នុងសង្កាត់បាវិតតាមផ្លូវចូលទៅវត្តព្រៃយាយ។ ទោះបីយ៉ាងណាប្រជាពលរដ្ឋ និងមន្ត្រីរាជការមួយចំនួននៅក្រុងបាវិត បានសំណូមពរទៅលោកអភិបាលខេត្តស្វាយរៀង និងមន្ទីរជំនាញមេត្តាចុះពិនិត្យរណ្តៅដីដែលក្រុមរថយន្តដឹកដីជីកដល់ជម្រៅក្បាលប្រេតផង ពីព្រោះពួកគាត់មានការព្រួយបារម្ភអំពីគ្រោះថ្នាក់ដែលកើតឡើងជាយថាហេតុដល់កូនចៅ សត្វពាហនៈ និងបាក់ដីស្រែ។ល។ ជាពិសេសក្រសួងការពារជាតិសូមជួយពិនិត្យមើលរថយន្តដឹកដី ដែលប្រើប្រាស់ ស្លាកលេខ(ខ.ម) មករកស៊ីជាលក្ខណៈឯកជនមិនបម្រើដល់ការងាររដ្ឋ តែបែរមករកស៊ីបម្រើឲ្យក្រុមហ៊ុន ទៅវិញ សូមមានវិធានការចំពោះរថយន្តទាំងនេះផង។
ពាក់ព័ន្ធនឹងករណីខាងលើនេះ លោក ប៉ុក តក ប្រធានមន្ទីរ៉ែ និងថាមពលខេត្តស្វាយរៀងបានថ្លែងប្រាប់ឲ្យដឹងថា រយៈកាលកន្លងមកលោកបានឲ្យមន្ត្រី របស់លោកចុះទៅណែនាំដល់ក្រុមហ៊ុនរថយន្តដឹកដីនៅសង្កាត់បាវិតហ្នឹងដែរ ហើយឲ្យមកចុះបញ្ជីការ ច្បាប់អាជីវកម្មឲ្យត្រឹមត្រូវផងដែរ។ ដោយពីរខែចុះទៅពិនិត្យរណ្តៅដីម្តងទៅពីដង។ លោកបានបញ្ជាក់ថា រណ្តៅដីដែលអាចជីកបានអាស្រ័យទៅលើសណ្ឋានដីនៅតំបន់នោះថាវាប៉ះពាល់ដល់ដីស្រែប្រជាពលរដ្ឋឬយ៉ាងណាហើយបើអាចជីកបានត្រឹមតែ៥ឬ៦ម៉ែត្រទៅក្រោមប៉ុណ្ណោះ។ ចំពោះបញ្ហានេះលោកនឹងចុះទៅ ពិនិត្យមើលតែម្តងក្នុងពេលឆាប់ៗនេះ។ រីឯលោកអភិបាលក្រុងបាវិតមិនអាចទំនាក់ទំនងរកការបំភ្លឺបានទេ នៅថ្ងៃទី២១ ខែមីនា ឆ្នាំ២០១៨នេះ៕
https://youtu.be/dHTif_f5W64
ចែករំលែកព័តមាននេះ