រាជធានីភ្នំពេញ ៖ បុរសជាជនសង្ស័យម្នាក់ ក្នុងចំណោមបក្ខពួកគ្នាពីរនាក់ ត្រូវបានកម្លាំងនគរបាលប៉ុស្តិ៍ជ័យចំនះ ចាប់ឃាត់ខ្លួន ក្រោយពេលដែលពួកគេបានជិះម៉ូតូមួយគ្រឿងនាំគ្នាធ្វើសកម្មភាពឆក់យកម៉ាស៊ីនថតម៉ាក SONY មួយគ្រឿង ពីបុរសជនជាតិអង់គ្លេសម្នាក់ ដែលកំពុងតែកាន់ក្នុងដៃ ដើម្បីដើរថតយករូបភាព ហើយក៏ត្រូវជនរងគ្រោះទាញឱ្យធ្លាក់ពីលើម៉ូតូ ។ ករណីនេះដែរ បានកើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី២១ ខែមីនា ឆ្នាំ២០១៨ នៅខាងមុខវត្តឧណ្ណាលោម ផ្លូវព្រះស៊ីសុវត្ថិ ក្នុងសង្កាត់ជ័យជំនះ ខណ្ឌដូនពេញ ។
តាមប្រភព័ត៌មានពីសម្ថកិច្ចម្នាក់បានប្រាប់ឱ្យដឹងថា បុរសជាជនសង្ស័យដែលបានឃាត់ខ្លួនមានឈ្មោះ រិន មករា អាយុ១៧ឆ្នាំ មានមុខរបរមិនពិតប្រាកដ ស្នាក់នៅផ្ទះជួលក្នុងសង្កាត់ផ្សារដើមថ្កូវ ខណ្ឌចំការមន ។ មុនពេលកើតហេតុ បុរសជាអ្នកទេសចរណ៍ជនជាតិអង់គ្លេស អាយុ៥៥ឆ្នាំម្នាក់ បានដើរកាន់ម៉ាស៊ីនថតម៉ាក SONY មួយគ្រឿង នៅក្នុងដៃ និងកំពុងតែដើរថតរូបនៅម្តុំខាងមុខវត្តឧណ្ណាលោម ។
តាមប្រភពដដែលបានប្រាប់បន្តទៀតថា ពេលដែលបុរសជនជាតិអង់គ្លេសកំពុងតែដើរថតនោះ ក៏ស្រាប់តែលេចមុខក្រុមជនសង្ស័យចំនួន២នាក់ ជិះម៉ូតូម៉ាកស៊ុយស៊ីគីស្មាស់ មិនចាំផ្លាកលេខមួយគ្រឿងធ្វើសកម្មភាពឆក់យកម៉ាស៊ីនថតពីដៃតែម្តង ។ ពេលនោះបុរសជាជនរងគ្រោះក៏បានប្រទាញប្រទុងគ្នា និងធ្វើឲ្យធ្លាក់ជនសង្ស័យម្នាក់ដែលជាអ្នកឆក់ខាងក្រោយ និងចាប់ជាប់ប្រគល់ឲ្យសម្ថកិច្ចតែម្តង ចំណែកឯបក្ខពួកម្នាក់ទៀតជិះម៉ូតូរត់គេចខ្លួនបាត់ស្រមោល ។
ក្រោយពេលកើតហេតុ ម៉ាស៊ីនថតម៉ាក SONY មួយគ្រឿងនោះ ត្រូវបានធ្វើការប្រគល់ទៅឲ្យបុរសជនជាតិអង់គ្លេសរងគ្រោះជាម្ចាស់វិញ ចំណែកឯជនសង្ស័យជាចោរឆក់ម្នាក់ខាងលើក៏បាននាំមកធ្វើការសាកសួរ និងកំណត់ហេតុ ដើម្បីបញ្ជូនទៅកាន់អធិការដ្ឋានខខណ្ឌដូនពេញ ចាត់ការទៅតាមផ្លូវច្បាប់ជាបន្តទៅទៀត ៕
ចែករំលែកព័តមាននេះ