រាជធានីភ្នំពេញ ៖ ក្នុងរង្វង់២ឆ្នាំចុងក្រោយនេះគេកត់សម្គាល់ថា ព្រឹត្តិការណ៍ប្រដាល់
ដាក់ទ្រុងបានក្លាយជាទីផ្សាររបស់កីឡាករ-កីឡាការិនីកម្ពុជាយ៉ាងខ្លាំង ដោយក្នុងមួយឆ្នាំៗគេឃើញកីឡាករ-កីឡាការិនីខ្មែរច្រើននាក់ត្រូវបានបញ្ជូនឱ្យចេញប្រកួតនៅក្រៅប្រទេសយ៉ាងញឹកញាប់ ខណៈដែលនៅកម្ពុជាក៏មានក្លិបទទួលបណ្ដុះបណ្ដាល និងបញ្ជូនកីឡាករ-កីឡាការិនីទាំងនោះឱ្យចេញប្រកួតស្ទើរគ្មានលោះពេលនោះទេ ។
ស្របគ្នាដែលប្រដាល់ដាក់ទ្រុង ក៏មានការវិវត្តទៅជាប្រដាល់ក្បាច់គុនចម្រុះក្រោមការរៀបចំរបស់ថៃ និងប្រទេសផ្សេងទៀតនោះផង ទើបកីឡាករកម្ពុជាច្រើនឡើងមានឱកាសបានចេញប្រកួត ។ យ៉ាងណាក៏ដោយ គេកត់សម្គាល់ថា មានតែកីឡាការិនីកម្ពុជា៤រូបប៉ុណ្ណោះ ដែលមានសំណាងបានឡើងប្រកួតដាក់ទ្រុងញឹកញាប់ជាងគេ ដោយអ្នកទាំង៤ ថែមទាំងមានមុខឡើងប្រកួតនៅក្នុងព្រឹត្តឹការណ៍ធំៗដែលរៀបចំនៅកម្ពុជា និងនៅប្រទេសផ្សេងៗជាពិសេសប្រទេសក្នុងតំបន់អាស៊ាន។
កីឡាការិនីកម្ពុជាដែលមានសំណាងបានប្រកួតប្រដាល់ដាក់ទ្រុងនោះ រួមមាន កីឡាការិនី អេ យ៉ានុត កីឡាការិនីសម ថារ័ត្ន កីឡាការិនីវី ស្រីខួច និងកីឡាការិនីវី ស្រីឆាយ ។ អ្នកទាំង៤ត្រូវគេទទួលស្គាល់ថា បានក្លាយជាកីឡាការិនីប្រដាល់មានកេរ្តិ៍ឈ្មោះបោះសំឡេងនាពេលចុងក្រោយ ទោះបីមានប្រភពដោយឡែកពីគ្នា ប៉ុន្តែចុងក្រោយក៏មានឈ្មោះក្នុងបញ្ជីឡើងប្រកួតដាក់ទ្រុងជាមួយគ្នា ។ អ្នកខ្លះចេញពីប្រភពប្រដាល់សេរី ខ្លះចេញពីក្បាច់គុនល្បុក្កតោ និងខ្លះទៀតចេញពីប្រដាល់សាកល ហើយទោះបីស្រីស្អាតទាំង៤នៅតែលេចធ្លោក្នុងប្រដាល់ដាក់ទ្រុងមែន ក៏នៅតែបានចូលរួមក្នុងសហព័ន្ធកីឡាកម្ពុជាក្នុងទម្រង់មួយផ្សេងពីគ្នាដដែល។
– អេ យ៉ានុត ៖ គឺជាកូនស្រីសំណព្វចិត្តតែមួយគត់របស់អតីតកីឡាករល្បីឈ្មោះ លោក អេ ភូថង ។ នាងជាកីឡាការិនីដែលបានប្រឡូកការប្រដាល់តាមឪពុកតាំងពីវ័យ១០ឆ្នាំម្ល៉េះ ដើម្បីរកលុយជួយម្ដាយចិញ្ចឹមក្រពះ ប៉ុន្តែក្រោយមកក៏ចាប់យកជាអាជីព ហើយបានល្បីឈ្មោះមិនចាញ់ឪពុកដល់បច្ចុប្បន្ន ។ នាងបានឡើងប្រដាល់ដំបូងបំផុតនៅលើសង្វៀនទូរទស្សន៍បាយ័ន ក្នុងពេលដែលស្ថាប័ននេះបើកការប្រដាល់ផ្នែកនារី ប៉ុន្តែនៅក្នុងពេលនោះ នាងទទួលបានឱកាសឈ្នះការប្រកួតតិចណាស់ ដោយសារតែនាងនៅក្មេងមិនសូវមាំមួន តែខំដំឡើងអាយុដើម្បីឱ្យមានការផ្គូផ្គងគ្រាន់បានលុយ ។ បន្តបន្ទាប់មកការប្រដាល់សេរីផ្នែកនារីក៏ត្រូវបានរំសាយចោល ទើបធ្វើឱ្យឪពុកនាងយកនាងទៅបណ្ដុះខាងផ្នែកប្រដាល់សាកល ហើយបានដាក់នាងនៅក្នុងសហព័ន្ធប្រដាល់សាកលដើម្បីឱ្យនាងបានតំណាងប្រទេសចេញទៅប្រកួតនៅក្រៅប្រទេស ។
មកទល់ពេលនេះ អេ យ៉ានុត បានចេញប្រកួតក្រៅស្រុកជាច្រើនលើកក្នុងនាមជាកីឡាការិនីជម្រើសជាតិខាងផ្នែកប្រដាល់សាកល បើទោះជានាងមិនទាន់ទទួលបានមេដាយមាស និងប្រាក់ពីព្រឹត្តិការណ៍អន្តរជាតិធំៗណាមួយក្ដី ។ ក្រៅពីបានក្លាយខ្លួនជាកីឡាការិនីជម្រើសជាតិក្នុងអាជីពប្រដាល់សាកលហើយ នាងក៏បានហ្វឹកហាត់ចំបាប់ និងក្បាច់គុនប្រដាល់ដាក់ទ្រុងផងដែរក្រោមការជ្រោមជ្រែងរបស់ឪពុក ទើបក្នុងរយៈពេលចុងក្រោយ អេ យ៉ានុត បានឡើងប្រកួតតំណាងឱ្យកម្ពុជានៅក្នុងព្រឹត្តិការណ៍ប្រដាល់ដាក់ទ្រុងជាហូរហែមិនសូវបាត់ព្រោះតែនៅកម្ពុជាមិនសូវសំបូរអ្នកខ្លាំងខាងផ្នែកប្រដាល់ដាក់ទ្រុង ។ នាងបានចេញប្រកួតជាញឹកញយ ដោយភាគច្រើនប៉ះជាមួយកីឡាការិនីបារាំង និងប្រទេសផ្សេងមួយចំនួនតែក៏មានឈ្នះខ្លះ ចាញ់ខ្លះ មិនសូវបានផ្លែផ្កាតាមការចង់បាន១០០ភាគរយនោះដែរ។
– វី ស្រីខួច ៖ នាងគឺជាកីឡាការិនីដែលធ្លាប់ហែលឆ្លងការងារជាកម្មការិនីរោងចក្រ និងការងារសំណង់ជាមួយឪពុក ហើយដោយសារតែចង់បានលុយ ក៏សុំឪពុកចូលហាត់ប្រដាល់នៅជិតផ្ទះក្នុងស្រុកកណ្ដាលស្ទឹង រួចក៏មានឱកាសឡើងប្រដាល់នៅទូរទស្សន៍បាយ័នតែម្ដង ។ នាងឡើងប្រដាល់បើកឆាកដំបូងទទួលបានការចាប់អារម្មណ៍តែម្ដង ដោយសារតែនាងគឺជានារីក្មេងវ័យស្រស់ស្អាត មុខមាត់មិនសូវសមជាអ្នកប្រដាល់ ហើយបើនិយាយពីលទ្ធផលដំបូងគឺនាងធ្វើបានល្អនឹកស្មានមិនដល់ ។ នាងឡើងសង្វៀនទូរទស្សន៍បាយ័នញឹកញាប់ជាងគេ ដោយបានវាយផ្ដួលកីឡាការិនីរួមជំនាន់មិនឱ្យអ្នកណាងើបមុខរួចទេ ។ នាងបានវាយឈ្នះពានជើងឯករបស់ទូរទស្សន៍បាយ័ន និងត្រូវបានបញ្ជូនចេញទៅប្រកួតនៅក្នុងប្រទេសបារាំងដោយទទួលបានខ្សែក្រវាត់មួយ ក្រោយពីឈ្នះកីឡាការិនីបារាំងនោះផង ។
នាងគឺជាកីឡាការិនីមួយរូបដែលគេចាត់ទុកថាល្បីល្បាញដោយអត់ប្រើខ្សែទុយោនោះទេ ហើយភាពខ្លាំងរបស់នាងគឺជាកត្តាតែមួយមុខដែលធ្វើឱ្យនាងល្បីឈ្មោះ ។ មកទល់ពេលនេះ នាងគឺជាកីឡាការិនីជម្រើសជាតិផ្នែកវ៉ូវីណាម ហើយយូរៗម្ដងនាងត្រូវបានគេអញ្ជើញឱ្យឡើងប្រកួតក្នុងព្រឹត្តិការណ៍ប្រដាល់ដាក់ទ្រុងទាំងក្នុង និងក្រៅប្រទេសស្ទើរតែរាប់ភ្លេច ។ ស្ទើរមិនមានដៃគូណាមួយដែលនាងប៉ះប្រកួតជាមួយហើយមិនទ្រមខ្លួន និងមិនវេទនានោះទេ ដោយសារតែនាងគឺជាកីឡាការិនីល្អម្នាក់ ដែលមានកណ្ដាប់ដៃខ្លាំង ។
យ៉ាងណាមិញ នៅលើសង្វៀនប្រដាល់ដាក់ទ្រុង នាងក៏មិនសុទ្ធតែឈ្នះនោះដែរ តែគេចាត់ទុកថានាងឈ្នះដោយកិត្តិយស ហើយបើចាញ់ក៏ចាញ់ដោយឱ្យអ្នកគាំទ្រពេញចិត្ត ដោយអាចនិយាយបានថា អ្នកឡើងប្រកួតជាមួយនាង គឺទោះបីឈ្នះ ឬចាញ់ សុទ្ធតែមានលទ្ធផលមិនស្រួលខ្លួនដូចគ្នា។
– សម ថារ័ត្ន ៖ នាងជាកីឡាការិនីផ្នែកល្បុក្កតោ ដែលក្រោយមកក៏បានហក់ចូលប្រដាល់ដាក់ទ្រុងដោយសារតែកាយសម្បទាល្អ និងមានចិត្តក្លាហាន ។ នាងបានចេញទៅប្រកួតនៅក្រៅប្រទេសញឹកញាប់ជាងគេនោះផង ដោយសារតែនាងល្បីក្នុងការប្រើប្រាស់ក្បាច់គុនបានល្អ ។ មកទល់ពេលនេះ នាងស្ងាត់មិនសូវឡើងរេញ គឺដោយសារតែខ្វះគូប្រកួត ក្នុងពេលដែលនាងឡើងរេញប្រដាល់ដាក់ទ្រុង ស្ទើរតែដល់ថ្នាក់កំណត់លែងឱ្យឡើងរេញទៀតទៅហើយ ។
នាងក៏ជាតារាសម្ដែងមួយរូបដែលមានកេរ្តិ៍ឈ្មោះបោះសំឡេងផងដែរ ដោយនាងប្រកាសថានៅទទួលប្រកួតតែការប្រដាល់អន្តរជាតិធំៗប៉ុណ្ណោះ ទើបក្នុងរយៈពេលចុងក្រោយគេឃើញនាងស្ងាត់ការប្រកួត។
– វី ស្រីឆាយ ៖ នាងក៏ជាអតីតអ្នកប្រដាល់សេរីដូចគ្នានឹង អេ យ៉ានុត ផងដែរ ប៉ុន្តែក្រោយការរំសាយការប្រកួតនេះ នាងក៏ងាកទៅប្រឡូកការប្រដាល់សាកល ហើយចុងក្រោយនាងក៏ជាកីឡាការិនីដែលមានទីផ្សារប្រដាល់ដាក់ទ្រុងមិនគួរឱ្យជឿ ។ នាងត្រូវបានគណៈកម្មការប្រដាល់ដាក់ទ្រុងយកទៅប្រកួតនៅក្រៅប្រទេសច្រើន ដោយសារតែនាងក្មេងហើយត្រូវគីឡូនឹងកីឡាការិនីផ្នែកនេះច្រើនជាងគេ៕
ចែករំលែកព័តមាននេះ