ទីក្រុងតូក្យូ ៖ យោងតាមទិន្នន័យពីរដ្ឋាភិបាលចេញផ្សាយកាលពីថ្ងៃចន្ទ ឲ្យដឹងថា ប្រទេសជប៉ុនមានផលលើសពាណិជ្ជកម្មប្រមាណ៣២,១លានដុល្លារក្នុងខែកុម្ភៈ ខណៈការនាំចេញបន្តរឹងមាំ និងការនាំចូលថាមពលកើនឡើង ។
ផលលើសពាណិជ្ជកម្មកើតមានឡើង ខណៈការនាំចេញកើនឡើង១,៨%បើធៀបនឹងឆ្នាំមុន ហើយការនាំចូលកើនឡើង១៦,៥% ។ ប្រទេសជប៉ុនបានទទួលអត្ថប្រយោជន៍ពីតម្រូវការនៅបរទេស ព្រោះតែសេដ្ឋកិច្ចសកលបន្តលូតលាស់បន្ថែមទៀត ។
ទោះជាយ៉ាងណា ផលលើសពាណិជ្ជកម្មនេះបានធ្លាក់ចុះ៩៩,៦%ក្នុងខែកុម្ភៈ ព្រោះមួយផ្នែកធំមកពីបុណ្យចូលឆ្នាំចិន ដែលបានចាប់ផ្តើមនៅពាក់កណ្តាលខែ ។ ការនាំចេញទៅកាន់ប្រទេសចិនតែងតែធ្លាក់ចុះ ខណៈការនាំចូលកើនឡើងក្នុងអំឡុងពេលនេះ ។
ការនាំចេញទៅកាន់តំបន់អាស៊ីបានធ្លាក់ចុះ៣,២% ដែលជាការធ្លាក់ចុះលើកដំបូងក្នុងរយៈពេល១៦ខែមកនេះ មកស្មើតែ៣២ប៊ីលានដុល្លារប៉ុណ្ណោះ ។ រីឯការនាំចូលពីអាស៊ីវិញបានកើនឡើង២៦,៥% មកស្មើប្រមាណ៣០ប៊ីលានដុល្លារ ។ ទោះជាយ៉ាងណា ប្រទេសជប៉ុនមានឱនភាពពាណិជ្ជកម្មប្រមាណ៤លានដុល្លារជាមួយប្រទេសចិន ។
លោក Yuichiro Nagai សេដ្ឋវិទូក្នុង Barclays Securities Japan Ltd. បាននិយាយថា៖« តម្រូវការពីអាស៊ីអាចនឹងជួយដល់ការនាំចេញរបស់ជប៉ុន ប៉ុន្តែយើងត្រូវតែមើលថា និន្នាការលូតលាស់នេះនឹងបន្ត ឬវាកំពុងផ្តល់សញ្ញាអន់ថយបន្ទាប់ពីខែមីនា ទៅ » ។
ចំណែកផលលើសពាណិជ្ជកម្មជាមួយសហរដ្ឋអាមេរិកវិញបានកើនឡើង៣,៤% មកស្មើជិត៦លានដុល្លារ ដែលជាកំណើនលើកដំបូងក្នុងរយៈពេល៣ខែមកនេះ ។
ប្រទេសជប៉ុនពឹងផ្អែកយ៉ាងខ្លាំងលើការនាំចូលថាមពលដើម្បីផ្គត់ផ្គង់តម្រូវការក្នុងស្រុក ដែលធ្វើឲ្យតម្លៃប្រេងឆៅ និងធនធានដទៃប៉ះពាល់ដល់ពាណិជ្ជកម្មយ៉ាងខ្លាំង ។ ការនាំចូលប្រេងឆៅបានកើនឡើង២,៥% មកស្មើប្រមាណ៦,២២លានដុល្លារ ។
យោងតាមសេដ្ឋវិទូ តម្លៃប្រាក់យេនបានកើនឡើងក្នុងពេលថ្មីៗនេះ ក៏ជាកត្តាសំខាន់សម្រាប់តាមដានផងដែរ ៕
ចែករំលែកព័តមាននេះ