រាជធានីភ្នំពេញ ៖ បុរសជាជនមានសតិមិនប្រក្រតីម្នាក់បានព្យាយាមរត់ចូលរថយន្ត ដែលកំពុងបើកតាមផ្លូវ ប៉ុន្តែមិនបានសម្រេចដោយរថយន្តផ្សេងៗខ្លះគេចចេញផុត និងខ្លះទៀតឈប់ ។ លុះបន្តិចក្រោយមកស្រាប់តែមានរថយន្តម៉ាកកាមរីបាឡែនមួយគ្រឿង បានបើកបោះពួយក្នុងល្បឿនលឿនជ្រុលទៅបុកពេញទំហឹង ក្នុងខណៈពេលបុរសកំពុងរត់ឆ្លងផ្លូវ បណ្ដាលឲ្យរងរបួសធ្ងន់ធ្ងរ និងត្រូវបានរថយន្តសង្គ្រោះអង្គភាព៧១១ ដឹកយកទៅកាន់មន្ទីរពេទ្យភ្លាមៗដែរ ។ ចំណែករថយន្តរងការខូចខាតបែកកញ្ចក់មុខ និងត្រូវបាននគរបាលឃាត់នាំយកទៅរក្សាទុករង់ចាំចាត់ការតាមច្បាប់ ។ ឧប្បត្តិហេតុនោះបានកើតឡើងកាលពីវេលាម៉ោង១០និង២៥នាទីព្រឹក ថ្ងៃទី២១ ខែមីនា ឆ្នាំ២០១៨ នៅលើកំណាត់ផ្លូវជាតិលេខ៤ ត្រង់ចំណុចមុខផ្សារជម្ពូវ័ន្ត ភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា បុរសជាជនរងគ្រោះមិនត្រូវបានគេស្គាល់អត្តសញ្ញាណនោះទេ មានអាយុប្រហែល៣០ឆ្នាំ បានរងរបួសបែកក្បាលធ្ងន់ធ្ងរ ។ ចំណែករថយន្តបង្កម៉ាកកាមរីបាឡែន ពណ៌ស ពាក់ផ្លាកលេខ ភ្នំពេញ ២Y-២៥០០ បើកបរដោយបុរសមិនស្គាល់ឈ្មោះម្នាក់ ហើយរថយន្តនោះបានរងការខូចខាតបែកកញ្ចក់មុខយ៉ាងដំណំ និងត្រូវបាននគរបាលនាំទៅរក្សាទុករង់ចាំការដោះស្រាយគ្នានៅពេលក្រោយ ។
ប្រភពដដែលបានបន្តថា នៅមុនពេលកើតហេតុ ជនរងគ្រោះខាងលើបានព្យាយាមរត់ចូលរថយន្តដែលកំពុងបើកបរតាមផ្លូវនោះ ប៉ុន្តែមិនបានបណ្ដាលឲ្យគ្រោះថ្នាក់នោះទេ ដោយរថយន្តខ្លះគេចចេញទាន់និងខ្លះទៀតឈប់ហើយក៏ត្រូវបានប្រជាពលរដ្ឋឃាត់ផង ទើបមិនត្រូវបានរថយន្តបុក ។ លុះក្រោយមកស្រាប់តែរត់ឆ្លងផ្លូវក្នុងទិសដីពីជើងទៅត្បូង ចេញពីផ្សារជម្ពូវ័ន្តទៅវត្តជម្ពូវ័ន្ត ហើយស្របពេលនោះរថយន្តកាមរីបាឡែនបើកបរក្នុងទិសដៅពីលិចទៅកើតក្នុងល្បឿនលឿន និងជែងរថយន្ត១គ្រឿងផ្សេងទៀតនៅខាងមុខ ហើយដោយបាំងរថយន្តខាងមុខនោះមើលមិនឃើញ ក៏បានជ្រុលទៅបុកពេញទំហឹង បណ្ដាលឲ្យមានគ្រោះថ្នាក់រងរបួសធ្ងន់ធ្ងរសន្លប់ស្ដូកស្ដឹងតែម្ដង ។ ប្រភពដដែលបានបន្តថា ក្រោយពេលកើតហេតុរថយន្តបានបែកកញ្ចក់មុខ និងត្រូវបាននគរបាលឃាត់នាំយកទៅរក្សាទុករង់ចាំការដោះស្រាយ ចំណែកជនរងគ្រោះត្រូវបានរថយន្តសង្គ្រោះអង្គភាព៧១១នាំយកទៅសង្គ្រោះភ្លាមៗដែរ ៕
ចែករំលែកព័តមាននេះ