រាជធានីភ្នំពេញ ៖ បច្ចុប្បន្ន ការចាយរូបិយប័ណ្ណបរទេសនៅលើទីផ្សារកម្ពុជា ជាពិសេស ប្រាក់ដុល្លារ គឺស្ទើរតែស្មើនឹង៩០%ក្នុងការទូទាត់ទំនិញទាំងលក់ដុំ និងរាយទៅហើយ។ ចំណែកនៅតាមព្រំដែនថៃ គេនិយមចាយលុយបាត…
រាជធានីភ្នំពេញ ៖ បច្ចុប្បន្ន ការចាយរូបិយប័ណ្ណបរទេសនៅលើទីផ្សារកម្ពុជា ជាពិសេស ប្រាក់ដុល្លារ គឺស្ទើរតែស្មើនឹង៩០%ក្នុងការទូទាត់ទំនិញទាំងលក់ដុំ និងរាយទៅហើយ។ ចំណែកនៅតាមព្រំដែនថៃ គេនិយមចាយលុយបាត ហើយនៅតាមព្រំដែនវៀតណាម គេនិយមចាយលុយដុង ដែលធ្វើឱ្យប្រាក់រៀលខ្មែរមិនមានឥទ្ធិពល ។ ទោះបីយ៉ាងណា នៅប៉ុន្មានឆ្នាំចុងក្រោយនេះ បន្ទាប់ពីធនាគារជាតិនៃកម្ពុជាបានធ្វើយុទ្ធនាការមួយចំនួនដើម្បីជំរុញឱ្យមានការប្រើប្រាស់រូបិយប័ណ្ណជាតិ ឃើញថាការចាយប្រាក់រៀលខ្មែរមានកំណើនជាលំដាប់ ។
ថ្លែងក្នុងទិវាប្រារព្ធខួបលើកទី៣៨ នៃការដាក់ឱ្យចរាចរណ៍ប្រាក់រៀលឡើងវិញ កាលពីថ្ងៃទី២០ មីនា នៅមជ្ឈមណ្ឌលសហប្រតិបត្តិការកម្ពុជា-កូរ៉េ លោកជំទាវ ជា សិរី អគ្គនាយកបច្ចេកទេសនៃធនាគារជាតិនៃកម្ពុជា មានប្រសាសន៍ថា ការប្រើប្រាស់ប្រាក់រៀលនៅក្នុងចរន្តសេដ្ឋកិច្ច មានការកើនឡើងជាលំដាប់ ដោយសារតែការយល់ដឹងពីការប្រើប្រាស់ប្រាក់រៀល ក៏ដូចជាអត្ថប្រយោជន៍នៅក្នុងសង្គមមានច្រើនជាងមុន ។
លោកជំទាវថ្លែងថា ៖« កំណើននេះក៏ជាមោទនភាពមួយដែររបស់ធនាគារជាតិនៃកម្ពុជា ហើយយើងក៏កំពុងសហការជាមួយស្ថាប័នទាំងអស់ ពិសេសពីវិស័យឯកជនឱ្យគាត់ចូលរួមប្រើប្រាស់ប្រាក់រៀល » ។
លោកជំទាវលើកឡើងថា ៖« តាមការអង្កេតរបស់យើង ការប្រើប្រាស់ប្រាក់រៀលច្រើនជាងគេ គឺនៅតាមតំបន់ជនបទភូមិភាគកណ្តាលដែលជាខេត្តមិនជាប់ព្រំប្រទល់ជាមួយប្រទេសជិតខាង ដូចជា ខេត្តកំពង់ធំ, កំពង់ចាម, បាត់ដំបង និងខេត្តតំបន់ទេសចរណ៍ » ។
លោក គា បូរាណ ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុ មានប្រសាសន៍ថា ៖«បន្ទាប់ពីធនាគារជាតិជំរុញឱ្យមានការប្រើប្រាស់ប្រាក់រៀលកន្លងមក យើងសង្កេតឃើញថា ប្រជាជនយើងមានការប្រើប្រាស់ប្រាក់រៀលច្រើនជាងមុន ។ សូម្បីតែប្រាក់សន្សំដែលខាងគ្រឹះស្ថានមីក្រូហិរញ្ញវត្ថុ អេអឹមខេ ក៏មានការកើនឡើងជាប្រាក់រៀលច្រើនដែរ ពិសេសប្រជាជនដែលគាត់មានចំណូលទាប គាត់ត្រូវការប្រាក់រៀលច្រើនជាងប្រាក់ដុល្លារ » ។
លោកជំទាវ អ៊ុក ម៉ាលី ទេសាភិបាលរងធនាគារជាតិនៃកម្ពុជា បានមានប្រសាសន៍ថាការប្រើប្រាស់ប្រាក់រៀលកាន់តែច្រើន នឹងធ្វើឱ្យកម្ពុជាទទួលបានចំណេញចម្បងៗទាំងផ្នែកសេដ្ឋកិច្ច និងសង្គម ។
លោកជំទាវថ្លែងថា ៖« ការប្រើប្រាស់ប្រាក់រៀលជាផ្នែកមួយនៃការបង្ហាញពីអត្តសញ្ញាណប្រទេស, បង្កើនទុនបម្រុងជាតិរបស់កម្ពុជា ដែលពង្រឹងភាពធន់នៃសេដ្ឋកិច្ច និងវិស័យហិរញ្ញវត្ថុ, ពង្រឹងប្រសិទ្ធភាពគោលនយោបាយរូបិយវត្ថុ ដែលនឹងរួមចំណែករក្សាស្ថិរភាពថ្លៃនិងស្ថិរភាពម៉ាក្រូសេដ្ឋកិច្ចនិងហិរញ្ញវត្ថុ, ពង្រឹងប្រសិទ្ធភាពគោលនយោបាយអត្រាប្តូរប្រាក់ ដែលនឹងរួមចំណែកក្នុងការជំរុញពាណិជ្ជកម្ម ទេសចរណ៍ ក៏ដូចជារួមចំណែកជួយសេដ្ឋកិច្ចនៅពេលមានការប៉ះទង្គិចជាយថាហេតុ ។ ជាមួយគ្នានេះ បានបង្កើនចំណូលពីការបោះពុម្ពក្រដាសប្រាក់ដែលនឹងរួមចំណែកបង្កើនចំណូលជូនរាជរដ្ឋាភិបាល ដើម្បីយកទៅអភិវឌ្ឍន៍សេដ្ឋកិច្ចជាតិ ដូចជា ការកសាងហេដ្ឋារចនាសម្ព័ន្ធ និងការចំណាយសាធារណៈជាដើម និងពង្រឹងអធិបតេយ្យភាពរូបិយវត្ថុ ដោយកាត់បន្ថយភាពងាយរងឥទ្ធិពលពីការប្រែប្រួលនៃតម្លៃប្រាក់ដុល្លារអាមេរិក ដែលអាចធ្វើឱ្យប៉ះពាល់ដល់សេដ្ឋកិច្ចជាតិ » ។
លោកជំទាវ អ៊ុក ម៉ាលី លើកឡើងថា ក្នុងរយៈពេល២០ឆ្នាំចុងក្រោយនេះ កម្ពុជាទទួលបានកំណើនសេដ្ឋកិច្ចខ្ពស់និងរឹងមាំ ក្នុងអត្រាមធ្យមប្រមាណ៨% ជាមួយអតិផរណាទាបប្រមាណ៣% ។
បើតាមលោក គា បូរាណ ប្រធានក្រុមប្រឹក្សាភិបាលសមាគមយល់ឃើញថា ដើម្បីជំរុញឱ្យមានការប្រើប្រាស់ប្រាក់រៀលកាន់តែច្រើនឡើង ស្ថាប័នពាក់ព័ន្ធត្រូវព្យាយាមពន្យល់ដល់ប្រជាពលរដ្ឋទូទៅ ។
លោកបណ្ឌិត គី សេរីវឌ្ឍន៍ បានផ្តល់អនុសាសន៍ថា ដើម្បីឱ្យការចាយលុយរៀលមានសន្ទុះជាងបច្ចុប្បន្ននេះ រាជរដ្ឋាភិបាលត្រូវតម្រូវឱ្យបើកប្រាក់ខែគ្រប់វិស័យតាមប្រព័ន្ធធនាគារ និងបើកជាប្រាក់រៀល ។ លោកថា ធ្វើដូចនេះ រាជរដ្ឋាភិបាលអាចគ្រប់គ្រងរូបិយវត្ថុបានផង ក៏ដូចជាលើកទឹកចិត្តឱ្យចាយប្រាក់រៀលផងដែរ។ វិធានការមួយទៀត លើកទឹកចិត្តឱ្យមានការដាក់សន្សំជាប្រាក់រៀលទទួលបានអត្រាការប្រាក់ខ្ពស់ជាងប្រាក់ដុល្លារ ។ ចំណែកការទិញទំនិញត្រូវគិតជាលុយរៀល តែកុំគិតតាមអត្រាប្រាក់ដុល្លារ ។
ទោះជាបែបនេះក្តី លោក គី សេរីវឌ្ឍន៍ លើកឡើងថា ការប្រើប្រាស់ប្រាក់រៀល និងប្រាក់ដុល្លារ មានផលប្រយោជន៍ដូចគ្នាចំពោះសេដ្ឋកិច្ចកម្ពុជា ។ លោកបន្តថា ៖« ប៉ុន្តែជាទូទៅ នៅក្នុងប្រទេសនីមួយៗ កាលណាជាប្រទេសសម្រាប់នាំចេញ គឺចង់ឱ្យចរន្តនៃការចាយវាយនេះជាលុយនៅក្នុងស្រុក ដើម្បីឱ្យរាជរដ្ឋាភិបាលអាចគ្រប់គ្រងថ្លៃដើមផលិតកម្មបានស្រួលជាងយើងចាយជាលុយដុល្លារ » ៕
ចែករំលែកព័តមាននេះ