ខេត្តបន្ទាយមានជ័យ ៖ ច្រកទ្វារអន្តរជាតិប៉ោយប៉ែតជាច្រកសេដ្ឋកិច្ចដ៏សំខាន់របស់ប្រទេសកម្ពុជា ដោយក្នុង១ថ្ងៃៗទំនិញនាំចេញ-នាំចូលសព្វសារពើរវាងកម្ពុជា-ថៃ ដែលដឹកជញ្ជូនតាមផ្លូវគោក ត្រូវឆ្លងកាត់ច្រកទ្វារអន្តរជាតិមួយនេះ ។ មិនត្រឹមតែប៉ុណ្ណោះ ប្រជាពលរដ្ឋខ្មែរដែលចេញទៅរកស៊ី និងលក់ដូរនៅប្រទេសថៃ ពិសេសផ្សាររុងក្លឿ ក្នុងមួយថ្ងៃៗមានប្រមាណពី៨ពាន់ទៅ១ម៉ឺននាក់ផងដែរ ។ នេះបើយោងតាមប្រធានគណៈកម្មាធិការច្រកទ្វារអន្តរជាតិមួយនេះ ។
ថ្លែងប្រាប់កោះសន្ដិភាព លោក វួច អូន ប្រធានគណៈកម្មាធិការរូបនេះបានប្រាប់ថា ក្នុងឆ្នាំ២០១៨ ប្រជាពលរដ្ឋខ្មែរដែលចេញ-ចូលទៅប្រទេសថៃ ក្នុង១ថ្ងៃមានប្រមាណជា៨ពាន់ទៅ១ម៉ឺននាក់ ដែលភាគច្រើនមានអាជីវករ
ចូលទៅលក់ដូរនៅផ្សាររុងក្លឿ ។ លោកបន្ដថា ៖« បងប្អូនប្រជាពលរដ្ឋខ្មែរដែលចេញចូលប្រទេសថៃ គឺទៅព្រឹកវិលល្ងាច ហើយភាគច្រើនជាអាជីវករ និងកម្មករអូសរទេះដែលចេញចូលដឹកទំនិញពីផ្សាររុងក្លឿមកកម្ពុជា ប៉ុន្តែក៏មានមួយចំនួនតូចស្នាក់នៅទីនោះផងដែរ ដោយសារពួកគេប្រើប្រាស់ប័ណ្ណព្រំដែនដែលមានសុពលភាព១សប្ដាហ៍ » ។
លោក វួច អូន បានបញ្ជាក់ថា ៖« ក្រោយពេលរាជរដ្ឋាភិបាលកម្ពុជាបានសម្រួលសំបុត្រឆ្លងដែនលក់ជូនប្រជាពលរដ្ឋ បានបង្កលក្ខណៈងាយស្រួលដល់ប្រជាពលរដ្ឋចេញ-ចូលដោយស្របច្បាប់ ដោយលក់ជូនក្នុង១នាក់តម្លៃតែ១០០រៀលប៉ុណ្ណោះ ហើយក្នុង១ថ្ងៃលក់អស់ជាង១០០ដុំ ដោយក្នុង១ដុំស្មើនឹង១០០សន្លឹក»។ លោកបន្ដថា ការចេញប័ណ្ណព្រំដែនដែលអនុញ្ញាតឲ្យពលរដ្ឋខ្មែរឆ្លងកាត់ប្រទេសថៃនេះ ពិតជាផ្ដល់ផលប្រយោជន៍ច្រើនដល់អាជីវករ និងកម្មករ ថែមទាំងផ្ដល់នូវចំណូលសម្រាប់ជាតិថែមទៀត ។
យោងតាមកិច្ចព្រមព្រៀងរវាងរាជរដ្ឋាភិបាលនៃប្រទេសទាំងពីរ កម្ពុជា-ថៃ កាលពីឆ្នាំ២០០៣បានកំណត់ថា ការចេញប័ណ្ណឆ្លងដែននេះ គឺសម្រាប់តែពលរដ្ឋនៅខេត្តបន្ទាយមានជ័យ និងខេត្តសៀមរាបដែលអាចចេញចូលបានក្នុងរយៈពេល៧ថ្ងៃ សម្រាប់ខេត្តស្រះកែវ និងខេត្តប្រាជឹមបូរីរបស់ថៃ ហើយខាងពលរដ្ឋថៃក៏អនុវត្តដូចគ្នាដែរ ក្នុងការចូលមកប្រទេសកម្ពុជា ។ ប័ណ្ណនេះមានសុពលភាពរយៈពេល២ឆ្នាំ ។
លោក អ៊ុំ រាត្រី អភិបាលរងខេត្តបន្ទាយមានជ័យបានថ្លែងកាលពីអំឡុងចុងខែកុម្ភៈថា រាជរដ្ឋាភិបាលកម្ពុជា តាមរយៈក្រសួងមហាផ្ទៃបានធ្វើប័ណ្ណព្រំដែនកម្ពុជា-ថៃ (CAMBODIA.THAILAND BORDERPASS) ជូនប្រជាពលរដ្ឋខេត្តបន្ទាយមានជ័យ ដែលជាខេត្តជាប់ជាយដែន ដើម្បីសម្រួលការចេញចូលកម្ពុជា-ថៃ ៕
ចែករំលែកព័តមាននេះ