រាជធានីភ្នំពេញ ៖ ខណៈធនាគារជាតិរៀបចំទិវាស្រឡាញ់ប្រាក់រៀល ការធ្វើបដិដុល្លារនីយកម្មនៅតែមានភាពប្រទាំងប្រទើស ប៉ុន្តែដុល្លារូបនីយកម្មនៅតែមានសញ្ញាវិជ្ជមាន ដោយវាបានរួមចំណែក៨,៥% ក្នុងការជំរុញកំណើនសេដ្ឋកិច្ចជាតិ ។ យោងតាមរបាយការណ៍របស់ធនាគារជាតិនៃកម្ពុជា ស្តីពី…
រាជធានីភ្នំពេញ ៖ ខណៈធនាគារជាតិរៀបចំទិវាស្រឡាញ់ប្រាក់រៀល ការធ្វើបដិដុល្លារនីយកម្មនៅតែមានភាពប្រទាំងប្រទើស ប៉ុន្តែដុល្លារូបនីយកម្មនៅតែមានសញ្ញាវិជ្ជមាន ដោយវាបានរួមចំណែក៨,៥% ក្នុងការជំរុញកំណើនសេដ្ឋកិច្ចជាតិ ។
យោងតាមរបាយការណ៍របស់ធនាគារជាតិនៃកម្ពុជា ស្តីពី សារសំខាន់នៃប្រាក់រៀលសម្រាប់កម្ពុជាបានបង្ហាញថា មកដល់បច្ចុប្បន្ន ដុល្លារូបនីយកម្មបានចូលរួមចំណែកជាវិជ្ជមានដល់ការរីកចម្រើនសកម្មភាពសេដ្ឋកិច្ចកម្ពុជា ដែលមានកម្រិតមធ្យមប្រមាណ៨,៥% នៅក្នុងរយៈពេល១៥ឆ្នាំចុងក្រោយនេះ ។ ក្នុងនោះល្បឿនកំណើនដែលគួរឲ្យកត់សម្គាល់នេះ ត្រូវបានជំរុញការវិនិយោគផ្ទាល់ពីបរទេស ការនាំចេញ និងសមាហរណកម្មយ៉ាងឆាប់រហ័សទៅក្នុងតំបន់ និងពិភពលោក ។
របាយការណ៍នេះបានបង្ហាញថា ខណៈកម្ពុជាកំពុងក្លាយទៅជាប្រទេសមានចំណូលមធ្យមកម្រិតដុល្លារូបនីយកម្មខ្ពស់ បានធ្វើឲ្យកម្ពុជារងនូវឥទ្ធិពលពីខាងក្រៅ ហើយប្រឈមនឹងហានិភ័យជាចម្បងៗ ដែលអាចធ្វើឲ្យប៉ះពាល់ដល់កំណើនសេដ្ឋកិច្ចកម្ពុជាផងដែរ ។
របាយការណ៍ដដែលបានសង្កត់ធ្ងន់ថា កម្ពុជាចាំបាច់ត្រូវបង្កើនភាពឯករាជ្យពីការប្រើប្រាស់រូបិយប័ណ្ណ ដើម្បីធ្វើឲ្យលទ្ធភាពនៃការគ្រប់គ្រងគោលនយោបាយម៉ាក្រូសេដ្ឋកិច្ចកាន់តែមានប្រសិទ្ធភាពខ្ពស់ ក្នុងនោះដោយយល់ឃើញពីសារសំខាន់នៃតួនាទីរូបិយប័ណ្ណជាតិក្នុងការជំរុញសេដ្ឋកិច្ច រាជរដ្ឋាភិបាលកម្ពុជាបានអនុវត្តយុទ្ធសាស្ត្រជំរុញការប្រើប្រាស់ប្រាក់រៀល
ដូចបានចែងក្នុងយុទ្ធសាស្ត្រចតុកោណ និងអភិវឌ្ឍន៍វិស័យហិរញ្ញវត្ថុ ។ ជាក់ស្តែង រាជរដ្ឋាភិបាលបានជំរុញការបង់ពន្ធ បង់ថ្លៃទឹក-ភ្លើង ត្រូវធ្វើឡើងជាប្រាក់រៀល រួមនឹងការរក្សាតម្លៃប្រាក់រៀលតាមរយៈការធ្វើឲ្យអត្រាប្តូរប្រាក់មានស្ថិរភាព ជាដើម ។
ទោះជាយ៉ាងណា មានប្រតិកម្មចម្រុះទាក់ទងនឹងភាពវិជ្ជមាន និងអវិជ្ជមានលើដុល្លាររូបនីយកម្មនៅកម្ពុជា ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ការប្រើប្រាស់ប្រាក់ដុល្លារនៅកម្ពុជាមានទាំងចំណុចវិជ្ជមាន និងអវិជ្ជមាន ប៉ុន្តែភាពអវិជ្ជមានអាចមានច្រើន ដោយសារកម្ពុជានាំចេញដោយប្រើប្រាស់ប្រាក់ដុល្លារ ហេតុនេះ នៅពេលប្រាក់ដុល្លារឡើងថ្លៃ នឹងធ្វើឲ្យទំនិញកម្ពុជាមានតម្លៃថ្លៃ និងពិបាកក្នុងការប្រកួតប្រជែងជាមួយបណ្តាប្រទេសដទៃទៀត ។
លោកបន្តថា ៖« ទោះជាការចរាចរប្រាក់ដុល្លារនៅកម្ពុជាមានចំណុចអវិជ្ជមានច្រើនក្តី ប៉ុន្តែខ្ញុំលើកទឹកចិត្តឲ្យមានការធ្វើបដិដុល្លារនីយកម្មបន្តិចម្តងៗ ដើម្បីឲ្យប្រាក់របស់ជាតិមានស្ថិរភាព និងជាការលើកកម្ពស់មោទនភាពជាតិ » ។
ទោះជាយ៉ាងណា អ្នកវិនិយោគតៃវ៉ាន់ ដែលបានវិនិយោគគម្រោង TK Royal One នៅកម្ពុជា លោក Chenyi Liu បានថ្លែងថា ការប្រើប្រាស់ប្រាក់ដុល្លារយ៉ាងទូលំទូលាយនៅកម្ពុជា ជាចំណុចវិជ្ជមាន ដោយសារយើងមានភាពកក់ក្តៅ និងមានទំនុកចិត្តនូវការចរាចរប្រាក់ដុល្លារនៅកម្ពុជា ប៉ុន្តែយ៉ាងណា វាមិនមែនជាផ្នែកតែមួយ ដែលបានទាក់ទាញអ្នកវិនិយោគបរទេសមកវិនិយោគនៅកម្ពុជានោះទេ ។
លោកបន្តថា ៖« ការចរាចរប្រាក់ដុល្លារយ៉ាងសកម្ម និងទូលំទូលាយនៅក្នុងទីផ្សារនៅទីនេះ ពិតជាល្អប្រសើរ ដែលធ្វើឲ្យអ្នកវិនិយោគកាន់តែមានទំនុកចិត្ត » ។
អគ្គនាយកក្រុមហ៊ុន WTC Phnom Penh លោក KAZUYA URATA បានយល់ស្របនឹងការវិនិយោគរបស់ជនជាតិតៃវ៉ាន់ ដោយលោកបានថ្លែងថា ការអនុញ្ញាតឲ្យមានការចរាចរប្រាក់ដុល្លារយ៉ាងទូលំទូលាយនៅកម្ពុជា ពិតជាផ្នែកមួយយ៉ាងសំខាន់ក្នុងការផ្តល់ឲ្យអ្នកវិនិយោគមានទំនុកចិត្ត និងមានភាពកក់ក្តៅនៅក្នុងទីផ្សារនេះ ប៉ុន្តែការមានច្បាប់វិនិយោគដ៏ល្អ កំណើនសេដ្ឋកិច្ចល្អ និងការអនុញ្ញាតឲ្យជនបរទេសមានសិទ្ធិបោះទុនវិនិយោគ១០០% ក៏ជាផ្នែកដ៏សំខាន់ដែលបាននិងកំពុងទាក់ទាញអ្នកវិនិយោគជាច្រើនមកកម្ពុជាផងដែរ ៕
ចែករំលែកព័តមាននេះ