រាជធានីភ្នំពេញ ៖ រថយន្តកុងតឺន័រមួយគ្រឿងសង្ស័យតៃកុងស្រវឹងស្រាបើកឡើងលើខឿនបុកបង្គោលភ្លើងដួលបាក់មួយដើម តៃកុងរត់គេចខ្លួនបាត់ បង្កឲ្យមានការភ្ញាក់ផ្អើល កាលពីវេលាម៉ោង១១យប់ ថ្ងៃទី២០ ខែមីនា ឆ្នាំ២០១៨ នៅតាមបណ្ដោយផ្លូវទំនប់កប់ស្រូវ ទល់មុខផែស្ងួតតែងឡាយ ស្ថិតនៅភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តកុងតឺន័រ មានតែក្បាលមិនមានទូ ពណ៌ខៀវ ពាក់ផ្លាកលេខ ព្រះសីហនុ ៣A-២៦៩៥ ជារថយន្តរបស់ផែស្ងួតអូលែរ ដែលមានផែនៅម្តុំក្រោយវត្តជម្ពូវ័ន បានបើកតាមបណ្ដោយផ្លូវទំនប់កប់ស្រូវ បើកបរក្នុងទិសដៅពីត្បូងទៅជើងក្នុងល្បឿនលឿន លុះបើកមកដល់ចំណុចកើតហេតុ រថយន្តកុងតឺន័រខាងលើ បានរេចង្កូតទៅផ្នែកខាងឆ្វេងបានឡើងលើខឿនពុះចែកទ្រូងផ្លូវ បន្ទាប់មកបានបុកបង្គោលភ្លើងបំភ្លឺផ្លូវ បណ្ដាលឲ្យដួលបាក់សង្កត់ទទឹងផ្លូវ បណ្ដាលឲ្យងងឹតធ្វើឲ្យប្រជាពលរដ្ឋធ្វើដំណើរតាមដងផ្លូវដួលជាច្រើននាក់ភ្លាមៗផងដែរ ចំណែកអ្នកបើកបររថយន្តបង្កខាងលើ ភ្លាមៗបានចុះពីលើរថយន្តហើយរត់គេចខ្លួនបាត់ប្រមោលផងដែរ ។
ក្រោយពេលកើតហេតុ កម្លាំងនគរបាលប៉ុស្តិ៍បានមកអន្តរាគមន៍ភ្លាមៗ ហើយបានទាក់ទងជំនាញចរាចរណ៍ផ្លូវគោគរាជធានីភ្នំពេញ យកទៅរក្សាទុករងចាំការដោះស្រាយថ្ងៃក្រោយ ៕
ចែករំលែកព័តមាននេះ