រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចនាយករដ្ឋមន្ត្រី ហ៊ុន សែន បានជួយសាងសង់ដំបូលសង្ក័សីដ៏ធំគ្របហ៊ុំព័ទ្ធផ្ទៃបរិវេណផ្សារច្បារអំពៅទាំងមូល និងជួយស្ថាបនាផ្លូវចំនួន២ខ្សែ នៅជាប់ផ្សារ ជូនបងប្អូនអាជីវករទាំងអស់…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចនាយករដ្ឋមន្ត្រី ហ៊ុន សែន បានជួយសាងសង់ដំបូលសង្ក័សីដ៏ធំគ្របហ៊ុំព័ទ្ធផ្ទៃបរិវេណផ្សារច្បារអំពៅទាំងមូល និងជួយស្ថាបនាផ្លូវចំនួន២ខ្សែ នៅជាប់ផ្សារ ជូនបងប្អូនអាជីវករទាំងអស់ ពិសេសបងប្អូនអាជីវករដែលរងគ្រោះក្នុងមហន្តរាយអគ្គីភ័យឆាបឆេះបំផ្លាញ តូបលក់ដូរ របស់បងប្អូនអស់៥៨៨តូប លើ១៤៤៧តូប កាលពីយប់ថ្ងៃទី១៥ ខែមីនា ឆ្នាំ២០១៨កន្លងទៅថ្មីៗនេះ។ ថ្លែងប្រាប់ចំពោះមុខបងប្អូនអាជីវករផ្សារជាច្រើន ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ នាវេលារសៀលថ្ងៃទី២០ ខែមីនា ឆ្នាំ២០១៨នេះ ឲ្យដឹងថា ដោយមើលឃើញនូវការលំបាករបស់បងប្អូនអាជីវករ ដែលរងគ្រោះ ក្នុងមហន្តរាយអគ្គិភ័យដ៏កំណាចដែលបានឆាបឆេះបំផ្លិចបំផ្លាញទ្រព្យសម្បត្តិរកស៊ីរបស់បងប្អូននោះ សម្តេចនាយករដ្ឋមន្ត្រី ហ៊ុន សែន បានជួយសាងសង់ដំបូលសង្ក័សីដ៏ធំមួយ ដោយសង់ឡើងក្នុងកម្ពស់ខ្ពស់គួរសម បង្កលក្ខណៈជាម្លប់ត្រជាក់អាចមានខ្យល់អាកាសបក់ចេញចូលទៅមកបានស្រួលសម្រាប់បងប្អូនអាជីវករអាចលក់ដូរ មិនពិបាករងកម្តៅដូចមុន។
លោកអភិបាលរាជធានី បានបន្តថា លើសពីនេះ សម្តេចនឹងជួយស្ថាបនាជួសជុលផ្លូវ ចំនួន២ខ្សែ នៅជាប់ផ្សារដែលរងការខូចខាត គឺផ្លូវលេខ៣៦៣ (ខាងកើត) និងផ្លូវលេខ៦២០ (ខាងជើង) ជូនបងប្អូនអាជីវករ ក៏ដូចជាសម្រាប់ពលរដ្ឋទូទៅអាចធ្វើដំណើរទៅមកបានងាយស្រួលផងដែរ។ អភិបាលរាជធានី បន្តថា ការយកចិត្តទុកដាក់ខ្ពស់របស់ប្រមុខរាជរដ្ឋាភិបាលកម្ពុជា ចំពោះបងប្អូនអាជីវករនៅពេលនេះ ថ្វីត្បិតមិនអាចបំពេញគ្រប់គ្រាន់ លើអ្វីដែលបងប្អូនបានបង់រលាយអស់ក្នុងភ្នក់ភ្លើងដ៏កំណាចក៏ដោយ តែនេះ គឺជាការគិតគូរខ្ពស់ ក៏ដូចជាការមើលឃើញសុខទុក្ខលំបាករបស់ពលរដ្ឋ ក្នុងការចូលរួមចំណែក រំលែកនូវការលំបាកជូនរបស់បងប្អូនអោយធូរស្រាលក្នុងកម្រិតមួយផងដែរ។ លោកបន្ថែមថា នាពេលបច្ចុប្បន្ននេះ អាជ្ញាធរទាំងអស់ ទាំងគណៈកម្មាការផ្សារ អាជ្ញាធរថ្នាក់សង្កាត់ ខណ្ឌ និងរាជធានីភ្នំពេញ រួមជាមួយក្រុមជំនាញ បាននឹងកំពុងព្យាយាមយ៉ាងខ្លាំង ក្នុងការខិតខំកាយយកកាកសំណល់ និងគ្រោងឆ្អឹងសំណង់ផ្សេងៗ ដែលសេស់សល់ពីមហន្តរាយអគ្គិភ័យដែលបានឆាបឆេះ។
ក្រោយការកើបនូវកាកសំណល់ទាំងនោះចេញ ពីបរិវេណខាងលើអស់រួចរាល់ហើយនោះ អាជ្ញាធរនឹងចាក់សាប នៃផ្ទៃបាតផ្សារឡើងលើថែម១តឹកបន្ថែមទៀត ទើបសម្រេចសាងសង់ដំបូលដែកប្រក់សង្ក័សីជូនបងប្អូនតាមក្រោយតែម្តង។ សូមបញ្ជាក់ថា ក្រោយការជួលជុល និងសាងសង់ដំបូលជូនបងប្អូនរួចរាល់ហើយនោះ អាជ្ញាធរនឹងសម្រេចឲ្យបងប្អូនអាជីវករចូលលក់ដូរតាមតូបនីមួយៗ របស់ខ្លួនដូចធម្មតាវិញ។ ប៉ុន្តែក្នុងនោះ ចំពោះទីតាំងតូបលក់ដូរបងប្អូនត្រូវសាងសង់ដោយខ្លួនឯង។ ហើយចំពោះទីតាំងតូបដែលជាកម្មសិទ្ធិរបស់ខ្លួននោះ បងប្អូនមិនចាំបាច់ខ្លាចមានការបាត់បង់ឡើយ ព្រោះអាជ្ញាធរបានស្រង់ស្ថិតិច្បាស់លាស់អស់ហើយ នៃតួលេខតូបនីមួយៗរបស់បងប្អូន មានទាំងអត្តសញ្ញាណម្ចាស់តូបទាំង៥៨៨ដែលរងការឆាបឆេះនោះ។
គួរបញ្ជាក់ថា គិតមកត្រឹមថ្ងៃទី២០ ខែមីនា ឆ្នាំ២០១៨នេះ បងប្អូនជាអាជីវករមួយចំនួនធំទាំងក្នុងផ្សារ និងក្រៅផ្សារ បានមកលក់ដូរដូចសព្វដងធម្មតា ហើយក៏មានបងប្អូនពលរដ្ឋចូលមកទិញទំនិញធម្មតាផងដែរ នៅឡើយតែបងប្អូនដែលរងគ្រោះក្នុងមហន្តរាយអគ្គិភ័យ ប៉ុណ្ណោះ ដែលមិនទាន់មានទីតាំងសម្រាប់លក់ដូរត្រឹមត្រូវដូចអាជីវករទូទៅដទៃ។ ជុំវិញការគិតគូរពីសំណាក់ប្រមុខ រាជរដ្ឋាភិបាលកម្ពុជា បងប្អូនអាជីវករក្នុងផ្សារទាំងមូល បានសម្តែងអារម្មណ៍ត្រេកអរ និងសប្បាយចិត្តចំពោះ ការជួយជ្រោមជ្រែងគិតគូរពីសុខទុក្ខរបស់ពួកគាត់។ ពួកគាត់លើកឡើងថា គាត់ពិតជាមានការសោកស្តាយណាស់ ចំពោះការបាត់បង់ទ្រព្យសម្បត្តិជាទំនិញលក់ដូរ ដែលជាមុខរបរស្នូលសម្រាប់ផ្គត់ផ្គង់ជីវភាពគ្រួសារពួកគាត់បច្ចុប្បន្ន ប៉ុន្តែទោះបីជាយ៉ាងណា ទ្រព្យទាំងនោះវាបានបាត់បង់អស់ទៅហើយដែរ ដោយសារគ្រោះមហន្តរាយដែលមើលមិនឃើញ និងអាចកើតឡើងជាយថាហេតុ៕
ចែករំលែកព័តមាននេះ