ខេត្តមណ្ឌលគិរី ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានណែនាំឱ្យសាខា កាកបាទក្រហមកម្ពុជាខេត្តមណ្ឌលគិរី ចុះពិនិត្យពីស្ថានភាពរស់នៅជាក់ស្តែងរបស់គ្រួសារប្អូនស្រី ថន រដ្ឋា ដែលរស់នៅភូមិពូរ៉ាប៉ែត ឃុំស្រែអំពូម ស្រុកពេជ្រាដា ខេត្តមណ្ឌលគិរី នៅពេលបានដឹងពីទុក្ខលំបាករបស់ប្អូនស្រីដែលជា សិស្សពូកែលេខ១ ទូទាំងខេត្តផ្នែកអក្សរសាស្ត្រខ្មែរ។ ក្រោយពីបានឃើញស្ថានភាពជាក់ស្តែងនៃទុក្ខលំបាករបស់គ្រួសារ ប្អូនស្រី ថន រដ្ឋា ដែលមានឪពុកជាអ្នកចាំចម្ការឱ្យគេ និងម្តាយជាអ្នករកឧសខិតខំចិញ្ចឹមកូនៗឱ្យបានរៀនសូត្រនោះ នៅថ្ងៃទី១៩ មីនា ២០១៨ គណៈកម្មាធិការសាខាកាកបាទក្រហមកម្ពុជា ខេត្តមណ្ឌលគិរី បានសម្រេច៖
១. ផ្តល់ស្បៀង និងថវិកាជួយសម្រាលជីវភាពរស់នៅ ២.ធ្វើការជាមួយអាជ្ញាធរភូមិ-ឃុំ រកទីតាំងសម្រាប់សង់ផ្ទះ ៣. គណៈកម្មាធិការ សាខានឹងសង់ផ្ទះមួយខ្នងជូនគ្រួសាររបស់ប្អូនស្រី ៤.ផ្តល់ទីកន្លែងស្នាក់នៅក្នុងអន្តេវាសិកដ្ឋានដល់ប្អូនស្រី ថន រដ្ឋា ដែលនឹងត្រូវទៅបន្តការសិក្សាកម្រិតវិទ្យាល័យនាពេលខាងមុខ។ ក្រុមគ្រួសារប្អូនស្រី ថន រដ្ឋា បានថ្លែងអំណរគុណ យ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមានក្តីមេត្តា ករុណា និងបានយកចិត្តទុកដាក់ គិតគូរជួយដោះស្រាយទុក្ខលំបាកជូនគ្រួសារប្អូនស្រី ក៏ដូចជាប្រជាជនជួបការលំបាកទូទៅ ដោយគ្មានការរើសអើង មិនប្រកាន់វណ្ណៈ ពូជសាសន៍ ពណ៌សម្បុរ ឬនិន្នាការនយោបាយអ្វីឡើយ៕
ចែករំលែកព័តមាននេះ