ទីក្រុងប៊ុយណូស៊ែ ៖ ប្រធានមូលនិធិរូបិយវត្ថុអន្តរជាតិ (IMF) លោកស្រី Christine Lagarde បានព្រមានសហរដ្ឋអាមេរិកពីការដាក់ឧបសគ្គពាណិជ្ជកម្ម នៅក្នុងបទសម្ភាសន៍មួយកាលពីថ្ងៃអាទិត្យ ។…
ទីក្រុងប៊ុយណូស៊ែ ៖ ប្រធានមូលនិធិរូបិយវត្ថុអន្តរជាតិ (IMF) លោកស្រី Christine Lagarde បានព្រមានសហរដ្ឋអាមេរិកពីការដាក់ឧបសគ្គពាណិជ្ជកម្ម នៅក្នុងបទសម្ភាសន៍មួយកាលពីថ្ងៃអាទិត្យ ។
លោកស្រីបានឆ្លើយតបនឹងសំណួរទាក់ទិននឹងការសម្រេចចិត្តរបស់លោកប្រធានាធិបតីអាមេរិក ដូណាល់ ត្រាំ ក្នុងការដាក់ពន្ធលើដែកថែប និងអាលុយមីញ៉ូមនាំចូលថា ៖« ការដាក់ពន្ធនេះនឹងមិនទទួលជោគជ័យទេ នៅក្នុងសង្គ្រាមពាណិជ្ជកម្ម » ។
លោកស្រីបន្តថា ប្រទេសក្រីក្រ និងប្រជាពលរដ្ឋក្រីក្រក្នុងប្រទេសស្តុកស្តម្ភ ទទួលបានអត្ថប្រយោជន៍ពីការលូតលាស់នៃការធ្វើពាណិជ្ជកម្មពិភពលោក ក្នុងរយៈពេល១០ឆ្នាំកន្លងមកនេះ ប៉ុន្តែលោកស្រីទទួលស្គាល់ថា តំបន់ និងវិស័យមួយចំនួន ក៏ទទួលរងការប៉ះពាល់ដែរ ។
លោកស្រីនិយាយថា ៖« ការប៉ះពាល់នេះកើតឡើងដោយការបង្កើតថ្មី ហើយការធ្វើពាណិជ្ជកម្មគួរតែពិចារណាពីវិធីសាស្ត្រដោះស្រាយ ។ រីឯការព្យាយាមកាត់បន្ថយការធ្វើពាណិជ្ជកម្ម ឬបន្ថែមឧបសគ្គពាណិជ្ជកម្ម គឺមិនទទួលបានជោគជ័យទេ » ។
លោកស្រីបន្ថែមថា សេដ្ឋកិច្ចពិភពលោកកំពុងស្ថិតក្នុងស្ថានភាពរឹងមាំ ហើយគេព្យាករថា នឹងលូតលាស់បានប្រមាណ៣,៩%ក្នុងឆ្នាំនេះ ខណៈជំនឿចិត្តរបស់វិនិយោគិនក៏មានកម្រិតខ្ពស់ផងដែរ ។ លោកស្រីថា ៖« ប៉ុន្តែវាមិនមានន័យថា គ្មានភាពប្រាកដប្រជាដែលពួកយើងគួរតែតាមដានទេ » ។
គួរបញ្ជាក់ថា ការសម្រេចចិត្តរបស់លោកត្រាំ កាលពីដើមខែនេះ ក្នុងការដាក់ពន្ធ២៥%លើដែកថែប និង១០%លើអាលុយមីញ៉ូមនាំចូល បានបង្កក្តីបារម្ភថា អាចនឹងកើតមានសង្គ្រាមពាណិជ្ជកម្ម ។
សហភាពអឺរ៉ុបបានគំរាមថា នឹងដាក់ពន្ធលើផលិតផលអាមេរិកវិញ ប្រសិនបើពួកគេមិនអាចរួចផុតពីការដាក់ពន្ធនេះទេ ។ រីឯប្រទេសកូរ៉េខាងត្បូង ក៏កំពុងតែព្យាយាមទទួលបានការអនុញ្ញាតឲ្យរួចពន្ធដែរ ខណៈប្រទេសចិនព្រមានថា ពួកគេនឹងមិនឈរស្ងៀមឡើយ ប្រសិនបើប៉ះពាល់ដល់អត្ថប្រយោជន៍របស់ខ្លួន ៕
ចែករំលែកព័តមាននេះ