ប្រទេសចិន ៖ មានអំណាចខ្លាំងជាងពេលណាទាំងអស់ ប្រធានាធិបតីចិន លោកស៊ី ជីនពីង កាលពីថ្ងៃទី២០ មីនា ពេលបិទសម័យប្រជុំប្រចាំឆ្នាំរបស់សភាប្រជាជនចិន ដែលផ្តល់ឱ្យលោកស្ថិតនៅជាប្រធានាធិបតីអស់មួយជីវិតនោះបានធ្វើការព្រមានយ៉ាងចាស់ដៃដល់កោះតៃវ៉ាន់…
ប្រទេសចិន ៖ មានអំណាចខ្លាំងជាងពេលណាទាំងអស់ ប្រធានាធិបតីចិន លោកស៊ី ជីនពីង កាលពីថ្ងៃទី២០ មីនា ពេលបិទសម័យប្រជុំប្រចាំឆ្នាំរបស់សភាប្រជាជនចិន ដែលផ្តល់ឱ្យលោកស្ថិតនៅជាប្រធានាធិបតីអស់មួយជីវិតនោះបានធ្វើការព្រមានយ៉ាងចាស់ដៃដល់កោះតៃវ៉ាន់ ។
ប្រធានាធិបតីចិនសង្ស័យកោះតៃវ៉ាន់ចង់ប្រកាសពីឯករាជ្យ ខណៈទំនាក់ទំនងក្រៅផ្លូវការរបស់ខ្លួនជាមួយសហរដ្ឋអាមេរិកត្រូវបានពង្រឹង ។ លោកស៊ី បានសន្យាថា រាល់អំពើ និងរាល់យុទ្ធសាស្ត្រដែលសំដៅពុះបំបែកចិនត្រូវវាយឱ្យបរាជ័យ ហើយនឹងរងការថ្កោលទោសរបស់ប្រជាជន និងការដាក់ទោសរបស់ប្រវត្តិសាស្ត្រ ។ លោកថ្លែងបែបនេះញ៉ាំងឱ្យមានការទះដៃយ៉ាងកងរំពងរបស់សមាជិកសភាចិនប្រមាណជា៣.០០០រូប ។ លោកថា សកម្មភាពបំបែកខ្លួនណាមួយនឹងត្រូវកម្ទេច ។
ក្រុងប៉េកាំងដែលពុំអនុញ្ញាតឱ្យមានទំនាក់ទំនងការទូតរវាងក្រុងតៃប៉ិ និងបណ្តាប្រទេសទាំងឡាយនោះពុំសប្បាយចិត្តឡើយ ចំពោះច្បាប់មួយដែលសហរដ្ឋអាមេរិក ទើបអនុម័ត ហើយដែលលើកទឹកចិត្តឱ្យបណ្តាអ្នកទទួលខុសត្រូវជាន់ខ្ពស់អាមេរិកមកកាន់តៃវ៉ាន់ និងឱ្យបណ្តាអ្នកទទួលខុសត្រូវជាន់ខ្ពស់តៃវ៉ាន់មកកាន់អាមេរិក ។ ក្រុងវ៉ាស៊ីនតោនពុំមានទំនាក់ទំនងផ្លូវការជាមួយតៃវ៉ាន់ឡើយ ក៏ប៉ុន្តែមានការប្រាស្រ័យទាក់ទងក្រៅផ្លូវការដោយលក់ជាពិសេសនូវអាវុធឱ្យតៃវ៉ាន់ ។
កោះតៃវ៉ាន់ដែលមេដឹកនាំជាតិនិយមជៀងកៃចៀករត់ភៀសខ្លួនមកកាន់ទីនោះកាលពីឆ្នាំ១៩៤៩ ក្រោយជ័យជម្នះរបស់កងកម្លាំងកុំមុយនីស្តនោះ តាមពិតទៅប្រកាន់នយោបាយឯករាជ្យមួយ ។ ក៏ប៉ុន្តែក្រុងប៉េកាំងតែងចាត់ទុកដែនដីកោះនោះថាជាផ្នែកមួយនៃដែនដីខ្លួន ។ ទំនាក់ទំនងរវាងផ្នែកទាំង២នៃច្រកសមុទ្រតៃវ៉ាន់មានភាពតានតឹងខ្លាំងពីដើមឆ្នាំ២០១៦មក ពេលប្រធានាធិបតីតៃវ៉ាន់ លោកស្រី TSAI ING WEN ប្រកាន់ជំហរម៉ឺងម៉ាត់ចំពោះក្រុងប៉េកាំង ហើយដឹកនាំគណបក្សចម្រើនជឿនលឿន ប្រជាធិបតេយ្យជាគណបក្សស្និទ្ធឯករាជ្យភាព ។
ចិនសង្ស័យមេដឹកនាំតៃវ៉ាន់ចង់ប្រកាសឯករាជ្យជាផ្លូវការរបស់ដែនកោះនេះ ។ ទោះបីយ៉ាងណា ប្រធានាធិបតីរូបនេះអះអាងថា ចង់រក្សាទុកស្ថានភាពដដែល ។
លោកស៊ី ជីនពីង អះអាងម្យ៉ាងទៀតថា គឺដើម្បីផលប្រយោជន៍ជាសារវ័ន្តរបស់ប្រជាជនចិនដែលត្រូវថែរក្សាបូរណភាពដែនដីចិន ហើយធ្វើឱ្យសម្រេចការបង្រួបបង្រួមដែនដីចិនទាំងមូល ។ លោកព្រមានថា ប្រទេសលោកនឹងមិនទទួលយកដាច់ខាតការបំបែកដែនដី ទោះមួយចំអាមណាក្តី ។
ទោះបីយ៉ាងណា លោកស៊ី ជីនពីង ពោលថា ការពង្រឹងខ្លួនឱ្យកាន់តែខ្លាំងរបស់មហា
អំណាចសេដ្ឋកិច្ចពិភពលោកទី២នេះពុំមែនជាការគំរាមកំហែងដល់ពិភពលោកឡើយ ។ មានតែពួកអ្នកមានទម្លាប់គំរាមកំហែងអ្នកដទៃៗទេ ដែលចាត់ទុកអ្នកឯទៀតថាជាការគំរាមកំហែងមួយ ។ ចិនដាច់ខាតនឹងមិនដណ្តើមផលប្រយោជន៍របស់ប្រទេសឯទៀតៗ ដើម្បីយកមកធ្វើការអភិវឌ្ឍន៍របស់ខ្លួនផ្ទាល់ឡើយ ។ លោកថ្លែងបែបនេះ ខណៈសមភាគីអាមេរិកលោកដូណាល់ ត្រាំ ត្រៀមដាក់របាំងពន្ធប្រឆាំងមហាអំណាចអាស៊ី ៕
ចែករំលែកព័តមាននេះ